ХIашпсы дзыгIв йгIанагуа ахIаш йаджвджваз, ауагIа рыла тшачвыкъазчIвахыз, километркI аъара зуру ХIашпсы быхъвпсыхIва Апсны апны, Гагра район йаланакIуа ХIашпсы кыт аргванква йаъапI.

Гагра район йаланакIуа Цандрыпщ кыт цба-быжьба километрла йачвыхъарата гIвщхъадзыгIвкI – Жвуапси Цандрыпщи – алачIвитI, ауат рыщтра утагылата хъахьыла уцарыквынгьи абыхъвква йырбжьу йауырачвам апсыхIваква урынйитI. Ауат ъалачIвауа апны ХIашпсы дзыгIв агIвадахьыла ахъа джвыквнацIитI. Ауи ащтра йапхъахауа акилометр ХIашпсы быхъвпсыхIва йакIитI. УацIыхъван адзыгIв рыцIа йыгъвгъвару аштала йымгIвайситI, ацхIакIьантIа йаныцIсра зыцIгIва хIакъвару анахьанат адзыгIвква йрапшхитI.

Ари йджьащахъву ашIыпIа йшгIаншаз йаъаркIвапIта – апшдзара уыла азхIвапситI. Ауи "паштахI быхъвпсыхIва"-хIвагьи йапхьитI. Ауи йахъадзгылу абыхъвбльынква рхIагIара метр 100 йайхIапI, аган хметркI йъанамдзауа аъапI, ауи йгIалцIла апсыхIва мара дукI йгьабумта абльынква ашвараххIвра йхънагIватI.

ХIашпсы псыхIва Апсны апны рыцIа майрата узызцауа абыхъвпсыхIва мачI йрыуапI. Араъа атуристквагьи йара ашIыпIа абзазагIвчвагьи гIамдарныс бзи йырбитI. Ауаъа агIамдара дукI йамщцас агIвычIвгIвысгьи дызбжьалуаштI. ХIашпсы быхъвпсыхIва ауагIа рыцIа йангIайлауа апхынла акIвпI, йауа ухIварыквын ауи адзы швабыж йхьшвашвапIта агъныла дзы злымсуа йазалху чгIвыча уышвамкIва угьызтысуашым.