Арат амшква нхара уысла Апсны йаъу АААК ЙхIаракIу асовет аунашвачпагIв Эгьзакь Мусса Баслахв кыт дцан ауаъа йгIаныршу ашIыпIа хъвшара ауысхагIвчва дрынйатI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны нхара уысла даъата ахваша, мартI а 26 атшын, Баслахв кыт дцан ауаъа йгIаныршу ашIыпIа хъвшара ауысхагIвчва дрынйатI.
Анйара Хьыба ЧIичIикIо йыхьыз зхъу Баслахв аквтанай апхьарта апны йакIвшатI. Асасчва – Эгьзакь Мусси ауи йыцыз а-Конгресс анхагIвчви – ауаъа акыт абзазагIвчва джьгаркви апхьарта анхагIвчви апсуа фаша зшвыз апхьагIвчви джькIахбастала йгIарпылтI. Асабиква асасчва ргIайра йаквдыршвауата НартргIа рэпос йгIалху ахабарквала ргылчIвкI дрыхIазыртI.
А-Конгресс ашIыпIа хъвшара ауысхагIвчва драчважвауата Эгьзакь Мусса апсуа кыт атшауацIыхра йыла йшгIацIайжьуа райхIвтI.
«Анчва йанакIвызлакIгьи мамырта хIйырбзазатI, ауаса хIпсадгьыл хIхчара анатахъхара хIара ауи хIазгылитIта йхIчпушгьи йшхIчпушгьи гIдыритI. Ауаса ансимшбзазара апынгьи къарута йатахъхауа рыцIа йайхIамызтын йгьмачIым. Зынзамыза баргвхитI ауагIа йгIаргвынуыргIвырныс тшадкIылра, азаджв азаджв йаргван угылра, уйачважвара, угвы йзыхътIзара, кытипхьадза, тгIачвипхьадза, гIвычIвгIвысипхьадза баргвырата йзынйауа гIаугвынгIвра шатахъу. УахьчIва хIара йаргвану а 10-15 сквша руацIа йчпачIву лыхIхта йхIырхъйауа хIалагара атахъыпI. ХIгIатгарипхьадза хIара хIаднакIылуаштI, хIацыта хIпхыцIа шхIчпуш хIазнархъвыцуаштI. Лшарата йаъу гIахIауаштI. УахьчIвала ауи хачIв хъадапI», – йгIаликIгIатI АААК ЙхIаракIу асовет аунашвачпагIв.
Апхьарта адиректор Пачулиа Асида асасчва гвщтIыхра ду лылата дырпылтI.
«УахьчIва хIара хIыхъазла гвыргъьара мшыпI, хIара Адуней апсуа-абаза конгресс аунашвачпагIв Эгьзакь Мусса дхIызгIайтI. Ауи йгIайра хIапхьарти Мыкв кыт апхьарти НартргIа рэпос адыррала ареспублика ауацIа йакIвшаз анкъвакъвра апны хIъайгIайызгьи йапщылапI. Швабыж йхIтахъыпI хIсабиква акъраль апны магIныкI змата йакIвшалауа ауысква йрылазларныс. А-Конгресс хIапхьарта йызнымкIва спорт ъамапсымалагьи арыпхьара апны йатахъхалауа апкъыгIваквалагьи йгIацхърагIатI. Ауи зкъару алазцIаз зымгIвагьи сшырзыразу расхIвра стахъыпI», – лхIватI адиректор.
Анйара амщтахь апхьарта аунашвачпагIвчва араъа йщаквгылыз ацIас асасчва йрархIвтI: Апсны агIвгIвчва йырчвахъабагу апарк апны апхьарта йгIайуа асасчва дуква цIла ларцIалитI. Ауи ацIас апхьарта йадиректорыз, сквшышвбжакI ауаъа йынхаз Хьыба ЧIичIикIо йгIаджвыквицIатI. Асквш 2016 агIан апарк апсуа гIвгIвы Тарба Иван йыхьыз ахьырцIахтI, ауи йыхъазла мрамор йгIалхта чвахъабага гъвы кIыдырцIатI. АцIас уахьчIва йъагIадзазгьи йынкъвыргитI. Эгьзакь Муссагьи цIла лазцIаз агIвычIвгIвыс дуква дгьрылрымхтI, йаргьи анйара аналга апхьарта аунашвачпагIвчва рахIварала Тарба Иван йыхьыз зхъу апарк апны цIла лайцIатI.
Апхьарта амщтахь Эгьзакь Мусса сквшыкI цIуата акыт абзазагIвчва ркъарула, а-Конгресси згвы цхIауа ауагIи рцхърагIарала тдзы ззыдыргылуа щарда мцIуата унагIвара йалалыз ЧрыгбаргIа ртгIачва дрызцатI.
АААК ЙхIаракIу асовет ахъада йхъагвы аквыта йхIватI абараса хIацацхърагIалузтын уыста йхIпыру зымгIва шхIзырхъйуш.
«Азаджв азаджв йыцхIкIуазтын зымгIва гIахIыдахIвуаштI. Ауи магIын ду амапI – ауагIа айгвыгIвра рызбжьазларныс, ахъазгIваца хIшагвлачвам, ахъазгIваца хIшакытлагIвчвам – хIштгIачвакIу гIаргвынгIвырныс. АтгIачва йанакIвызлакIгьи бзибара рызбжьапI. Ари йапшу ауыс бзиква йрыцта ауи абзибарагьи рыцIа-рыцIа йазхIалауа Анчва йхIйырбарагIатI», – йхIватI ауи.
Акыт аунашвахъцIарта ахъада Пагава Дауыр ужвыгьи зны а-Конгресс агвыпгьи йара Эгьзакь Муссагьи цхърагIарата йгIаддрадзауа ахъазла дшырзыразу райхIвтI.
«Баслахв кыт абзазагIвчва зымгIва рыхъазла уахьчIва мыш тлапIапI. ХIара хIыхъазла гIаншара дупI Эгьзакь Мусса ХIабальа йпа йапш гIвычIвгIвыс дхIрайгварныс. ХIизыразпI ауи гIамта хIзалихта уахьчIва дъахIызгIайыз. МачIкI йгвасру – амшква ъалапIатIаз йгIалцIла атдзы ауыхвара заманкIла йашIахIрыстI, ауаса апхъала апшта акыт шабгу атгIачва йырцхърагIаркIвитI. Баслахв аунашвахъцIарта ахьызла ауи ауыс йацIагылуа зымгIва – “Анчва дшвзыразхатI” – расхIвитI», – йажва далгатI Пагава.
Эгьзакь Мусса Апсны нхара уысла мартI а 24 йгIашIарышвта а 27-дза даъан. Ауи Апсны а-Президент Бжаниа Аслан дйынйатI, уацIыхъван йара а-Президент АААК ауысхарта дцан а-Конгресс агвып дрынйатI. Анахьанат амшква руацIа АААК ЙхIаракIу асовет аунашвачпагIв ЙхIаракIу асовет, апхIвыс советква, Баслахв кыти СогIвым арайон шIыци рпны йгIаныршу ашIыпIа хъвшараква йрылу ауысхагIвчва дрынйатI.
швталра йа тшаншвцIара атахъыпI.