Адуней апсуа-абаза конгресс ЙхIаракIу асовет аунашвачпагIв Эгьзакь Мусса сентябрь а 8 атшын Апсны апремьер Гагулиа Геннадий пхастала дъадзыз йгвы йыцIалуата йцрикви йаргванкви ргвакъвпра рыцагIвишатI.

Эгьзакь Мусса йгIаликIгIатI акъральыгIва уысхагIв ду Гагулиа Геннадий Леонид йпа Апсны Республика акъральыгIвара арыбагъьари ажвлара-экономика атшауацIыхри йхатI ду шрылайцIаз. 

«Швабыж йбаргвыпI хвы аквуцIарныс Апсны ахьыз пшдзарала адуней йдырдырра апны шIырпшыра змам ауи йалацIара. Ауи йапш гIвычIвгIвыс ду йагIамкIва абзазара дъалцIыз апсыуа уагIа зымгIва рыхъазлагьи йузыгIащаквмыргылхуаш лдзгIарапI», – йхIватI Эгьзакь Мусса. 

А-Конгресс ЙхIаракIу асовет аунашвачпагIв йгIацицIахтI анцIрала зпсадгьыл йазцIабыргыз ари агIвычIвгIвыс йуыжвгIанчIвиква зынгьи дшырхъмаштылуаш. Эгьзакь Мусса багъьата йазхъайцIитI Гагулиа Геннадий йгIаджвыквцIараква Апсны акъагIара знархару ажвлара уыс дуква йрылата щардала штшауацIырхуаш. 

Апсны апремьер-министр Гагулиа Геннадий сентябрь а 8 атшын Псоу-Согъвым амгIва апны йгIаншаз апхаста даладзтI. Сирия йаъата йгIайхуаз Апсны Республика аунашвачпагIвчва Сочи аэропорт йгIатыцIта йангIамгIвайсхуаз ркортеж амашина дтачIван ауи. 

Гагулиа Геннадий асквш 1948 январь а 4 агIан Лыхны кыт апны дйытI. 

Асквш 1972 агIан Белоруссия политехника институт ауыхвара факультет дгIалгатI. 
Асквшква 1977-1986 рагIан Рица гвал апны ажвлара чара акомбинат аунашвачпагIв дитарагылагIвын. 

Асквшква 1986-1991 рагIан  Гудаута район агIарысабапра кооперация даунашвачпагIвта дынхатI. 

Асквш 1991 йгIашIарышвта Апсны АССР гIвымакъраль экономика абадыррала АкъральыгIва комитет даунашвачпагIвын. Асквшква 1992-1995 рагIан ауи Апсны а-Министрква р-Совет аунашвачпагIв дитарагылагIвын, асквш 1995 йгIашIарышвта асквш 1997 агIандза ауи ареспублика дапремьер-министрын. Асквш 1997 йгIашIарышвта Россия АкъральыгIва Дума адепутат дицхърагIагIвта дынхатI. Асквш 2002 агIан дахъадахатI Апсны АхвгIахвтра-рхарджьра палата, асквшква 2002-2003 рурала Апсны апремьер-министр йъанатIа нкъвигатI. 

Асквшква 2003-2004 рагIан унашва ахъицIун Апсны апрезидент й-Администрация. Асквш 2005 агIан йатаркIвах дахъадахатI Апсны АхвгIахвтра-рхарджьра палата. 

Гагулиа Геннадий Апсны апремьер-министр йъанатIа асквш 2018 апрель а 24 йгIашIарышвта йынкъвигун.