АААК ЙхIаракIу асовет аунашвачпагIв Эгьзакь Мусса апсыуа-абаза уагIа Макьа апны ахIаджьчпара аналгауа Амшла драйхIвахIвтI.

Ауи йшгIаликIгIазла, йхъададзу агIид мшква йрыуазакIу а-Къвырман-гIид сквшышвпхьадзара рурала амсылман жвлара рпны магIны ду амата йгIамгIвайситI. Ауи ауагIа араргванитI, апхъанчIви турых, ацIасква, апхъанчIви тынха рмагIны гIаугвыннаргIвитI, ауат ргIахчара, рызсакъра, рыртлапIара уазнабжьитI.

ЙхIвахIвра тшазынархара апны Эгьзакь Мусса йшихIвазла, апсыуа-абаза диаспора ъатабзазауа акъральква рпны амсылманква адин ацIасква йрызцIабыргта йынкъвыргитI, йауацIыхта а-Къвырман-гIид дыртлапIитI.

«Апсыуа-абаза мсылман жвлара джьгарта абзазара уысква йрылапI Апсны, Къарча-Черкес, Трыквшта, Сирия, Иордания, датшагьи къраль щарда рпны, ралацIара дупI чкIвынргIа рбжьара, зъиманла йапшым адиннкъвгагIвчви зыбызшвала йапшым ауагIахъакви ращтаныкъвара атшауацIнарыхра апны. Амсылман жвлара рынхара амагIны швабыж йдупI амамырра арыбагъьара апынгьи абзазагIвчва ангIалра рызбжьата рацбзазара апынгьи», – йгIаликIгIатI АААК ЙхIаракIу асовет аунашвачпагIв.

Ауи мамырра, гвапара, згIвадара йгьи насыпра рзитахъта зымгIвагьи драйхIвахIвтI. 

Амсылманква ансисквша а-Къвырман-гIид дыртлапIитI амсылман календар йжвыгIвхауа амыз йжвабахауа атшын. Ари агIид афигIамбар Ибрахим йщыз акъвырман йгIахъшахъыцIта йырпхьадзитI, хымшкI руацIа йдыртлапIитI.