Барганджиа Саид

Апсны апны агIацIщтра йаздрыхIазыритI АбраскIьыл йгIайыквчважвауа апсуа турых йгIахъыху амультипликация фильм. Амультфильм дадынхалитI йбергьльу аопера ашвахIвагIв, асуратгIвгIвы, апсуа мифология йгIахъыху акомикс джьащахъваква равтор Квициниа Астамур. Акомиксква гIайрысабапуата ужвы Квициниа мультфильм гIанйыршитI «АбраскIьыл йфырра хъацIараква» ахьызта. Апхъала акомиксква шгIацIцIыз апшта афильмгьи апсуа бызшвала йгIацIцIуаштI.

АбраскIьыл гIатхъара зымдыруа згвы йахвиту дпельуанпI. Адуней дыззгIаквылыз йцри уагIа агъачва йырчвихчарныс ахъазла акIвпI, йаргьи дбагъьата, дымчхъата, дджырта дгIадзынгылтI. «Араш» – хIва йызпхьуз атшы ангIайау амщтахь ауи йбзазара мгIва хъада дыквылтI. АпхъанчIви турых йшгIанахIвауала, ауи дызпшIагылыз агъачва йгьырхъазымызтI, анчваквагьи дырпшIагылтI. Ауи ашвхIаусыгIвала ауат йхIаквым рхатI, дыдрыкъарусызтI. Ауи АбраскIьыл йагъачва йгIадрысабапын йаргьи йтшгьи пшвахIвла абыхъв хIатшпы апны дкIыдырхIвалтI.

«ГIарыкIапгата йбергьльу ахабар гIасрысабаптI, ауаса ауи абгата йспсахтI, – йхIватI амультипликатор. – Ауи комедия квпшыра амазлуштI. Амультфильм дугьи хвыцгьи йыргвапхушта йаъапI. Ауи ахронометраж 17 дакъикъакI раъара гIацIанакIуаштI».

Квициниа Астамур йшихIвауала, мультфильм агIаныршара нхара хьанта ауырапI. УадыргIванагьи ауи амультфильм анхIазырхуш апIатла щаквйыргылтI: хIапхъа май мыз.

«Йазалху студия уымамкIва мультфильм уадынхалырныс баргвыпI. Ари аршIыйара нархара хIпны ужвы йщаквгылгIвацитI, ауи ауыс рахIагьи йархIатлитI. Амультфильм йара йачIвызлуш музыка кIьыда азаларцIитI, ауи дадынхалитI Арухаа Денис (йбергьльу апсуа музыкаршIыйагIв – аредакция ррытаразга)», – йгIацицIахтI Квициниа.

Ужвы асахIат афыр хъадаква рбыжьква анырцIитI. Ауат рыуа азаджв КВН йрылата зыхьыз бергьльу Аршба Тимур йбжьыла дчважвуштI. «Швабыж сайгвыргъьитI Апсны апны ауи апш мультфильм джьащахъва ъагIацIырщтуа. Схъатала йсзымчхIахуата сазпшитI амультфильм ангIацIцIуаш, са сгIариквагьи сыцта сапшуаштI. Астамур зымгIва бзидздзата йшгIайыдахIвуаш кьангьаш гьазгIазгуам», – араса йхIватI Аршба йаргьи дызпщылу апроект даквчважвауата.

Датшагьи амультфильм афырква рбыжьква анырцIатI актёрква Шакая Руслан, Цкуа Михаил, МикIаа Эрик. Абжьы дарежиссёрпI йбергьльу апсуа актёр Жорданиа Джамбул.

АбраскIьыл йгIайыквчважвуз Квициниа Астамур йкомикс йапхъахауата асквш 2009 агIан йгIацIцIтI. Ауи асхъан акомикс агIацIщтра йацхърагIатI Апсуа бызшва атшауацIыхра знархараз афонд (асквш 2016 январь йгIашIарышвта ауи алаща тшапсахтI – «абызшва политика ауысла акъральыгIва комитет» – хIва йапхьитI – аредакция ррытаразга). Акомикс ауагIа йрымаджьащахъвата йхънахтI, йыргвапхатI, ауи амщтахь Квициниа йгIвбахуз акомикс гIацIищттI, ауыгьи апсуа турых «НапхIа КIьагва» йгIахъыхын. УахьчIвала амультфильм адынхалра йаццауата Астамур акомикс шIыцквагьи йрыхIазыритI. ЙхIазыругьи рылапI, ауаса ужвыгьи йгьгIацIымцIстI