12908

АуагIахъа хъвыцща, цри бызшва атшауацIнарыхра, апсыуакви абазакви рацзакIыра, арепатриация йгьи Апсны къральыгIва атшауацIнарыхра апны адиаспора рынхараамагIны знархару ауысква дрылачважватI Апсны апрезидент Хаджимба Рауль АААК ахабарргарта портал ахъазла йакIвшаз аинтервью апны.

Адуней апсыуа абаза конгресс ахабарргарта портал акорреспондент йазцIгIаракваджьауап ритуата апрезидент Хаджимба Рауль йгIаликIгIатI ари: йзапш уагIахъазлакIгьи, рпхьадзарала йдууызтынгьи йхвыцызтынгьи, уагIахъа хъвыцщата йрымазара атахъу рхъашырхчуш, йызтабзазауа ркъраль шгIащаквхуш знархару амальква рнахвра акIвпI.

Хаджимба дшхъвыцуала, ари ахачIвы архъйара гьмайрам.

«ХIара хIгьуагIахъа дууым, хIкъральгьи акъраль дуква йгьрыуам. Ауаса хIуагIа асквшызкьква йгIарылстI, уыжв хIзамандза йгIабзазатI йгьи хIапхъахьыла йщтIу азамантшалахIрыдзырныс хвитнагIа гьхIымам. ХIара уагIахъата хIгIащаквхарныс,хIкъральбагъьата йщаквгылырныс, ауи йазынарху амальква йрылахIарныс ахъазла йхIылшауазымгIва хIчпара атахъыпI», – йхIватI апрезидент.

Ауи йшгIаликIгIазла, Апсны къральыгIва дуумызтынгьи агIалцIыртаква амапI, адунейахъахь ауи ъаныргIалу ашIыпIа ахъгалраква гIарысабапра атахъыпI,  абзазагIвчвагьиакъраль багъьата йщаквгылырынс ахъазла дахIврала йазынхарныс йхIазырпI.