4121

Ансисквша йадыргаллауа «Абаза» культура-спорт фестиваль июль а 22-и а 23-и рагIан йакIвшуштI. Афестиваль аднагаллитI Абаза-апсуа уагIахъа ртшауацIыхра ацхърагIара знархару «Алашара» Дуней адкIылара.

Акультура-спорт фестиваль асквш 2014 йгIашIарышвта йакIвшалитI. Ауи гIвхъвыкIта йшапI: Абаза уагIа ркультура Амш йгьи Абаза уагIа рхъвмарраква. ЦIаста йшщаквгылызла, Акультура амш июль а 23 – Апсны Республика акъральыгIва баракъ амш андыртлапIауа атшын – йакIвшалитI. СынчIва ауи йалазлуш Черкесск, «АдзыгIвбжьа йачIва» парк апны йайззуштI.

Абаза уагIа рхъвмарраква – спорт Олимпиадата ухIва ауаштI. Ауат ангIаджвыквылсахIат Къарча-Черкес абаза кытква ракIвын йрылаз, уацIыхъван рыцIа-рыцIа тшауацIырхуамца Апсны, Къабард-Балкъар республикаква, Москва, Ставрополь, Черкесск къалаква ргвыпквагьи гIарылалуа йалагатI. СынчIва Ахъвмарраква КъЧР йалу Абаза район йаланакIуа Псыжв кыт апны йакIвшуштI.

«Абаза» фестиваль ацзакIыри айщчвари йыргвыргъьахъвпI. Спортла рыцIа йымчу акыт гIаддырдырра ахъазла 11 квпшыракIла йанкъвакъвуаштI, ауат йрылапI ауагIахъа спорт квпшыраквагьи: нахъгIахъра, хIахъваущтра, ащъа хъалра, хрихыцаущтра.

Афестиваль йалазлуштI ауагIа рхъвмарра, атурых йалу абаракъква, асуратква, анапIлачпараква ргIарбартаква. АмацIауыгIвчва ъазаква ауагIахъа фачIвква дрыхIазыруаштI, йапшым анкъвакъвраква, аларпшраква аъазлуштI.

Афестиваль йауата рахIа уыла хъызхуа алахъвгIахъасраква хIсайти асоцсеткви рпны йгIатахIцIалуштI.