Адуней апсуа-абаза конгресс ахабарргарта портал апрезентация сентябрь а 18 атшын Согъвым апны йакIвшатI.

АгIваша сентябрь а 18 атшын зпрезентация акIвшаз Адуней апсуа-абаза конгресс йазалху апортал адуней абзазагIвчва йднардыруаштI апсыуа-абаза уагIахъа рхабарква. Асайт апрезентация анакIвшуз араса ауи даквчважватI апортал аунашвачпагIв, ашеф-редактор Лазба Амина. Апортал анхара шджвыквылуа гIархIватI Апсны къральыгIва телебара астудия апресс-конференция апны.

Лазба Амина йшгIалылкIгIазла, апортал йгIаквшвалуштI а-Конгресс анхара йгьи апсыуа-абаза уагIа рбзазара йгIарыквчважвауа агIвыраква. Апортал агIвыраква зымгIвагьи нархарата йрымазлуштI Апсны абзазара злалу абзиракви атшауацIыхри адуней жвлара рахаргIвазара. «Апортал йгIаквшвауа агIвыраква, асуратква, анахьанат ашвъаква зымгIва йалкIгIата гуманитар нархартапI йынкъвыргуш. ХIара адуней йдхIырдырырныс хIтахъыпI хIтурых, хIкультура, хIэтнография, хIуагIахъа йгIарылцIыз агIвычIвгIвыс дуква. Адуней рпныла хIара хIхъа хIгIаквчважвуштI. ЙхIымапI хIызлачважвушгьи хIхъа злахIырдууашгьи», – лхIватI Лазба.

Ауи ауысла йауацIыхта >>

Ауи йгIалылкIгIатI апортал агIвыраква цбызшвакIла йшгIаквшвалуш: абазала, апсыуала, урышвла, трыквла, ангьльызла йгьи гIарыпла. УахьчIвала асайт хвбызшвакIла йынхитI: агIарып бызшва нархара ужвыгьи йадынхалыркIвитI йгьи ласыла анхара джвыквцIахуштI.

АААК архъйагIв секретарь Гицба Инар йшгIаликIгIазла, апортал магIны ду зму лшарапI а-Конгресс амурад хъада – апсыуа-абаза уагIахъа шабгу радкIылра – архъйара апны.

«УахьчIва, йапшым ахабарргага амальква ргIаныршара йанашымту атлахан, ауагIахъа радкIылра ауыс хъвдаквыщт ду амазлуштI уыжвгIанчIви абадыргаква гIарысабапхарквын, зымгIва йрапхъата интернет агIалцIыртаква. Ауи ауысла ахабарргарта портал апахь хачIвыта йгылапI адуней шабгула апсыуа-абаза диаспора йгIарыцIаркIуа ауагIа раргванчIвра йацхърагIарныс», – йхIватI а-Конгресс архъйагIв секретарь.

АААК ахабарргарта портал аджвыквцIара йъадзаздрыхIазыруаз асквшбжа ауацIа ауи анхагIвчва йрылшатI гIвырата, дыррата щарда адыркIылырныс: агIвыраква напа 700 райхIа, асуратква, авидеогIвыраква рпхьадзара1000 райхIа йнадзитI, гигабайтла йгIауахвырквын – 50 райхIа.