Адуней апсуа-абаза конгресс ЙхIаракIу асовет аунашвачпагIв АГУ астудентква дрынйан разцIгIараква джьауап риттI.
Барганджиа Саид
Адуней апсуа-абаза конгресс ЙхIаракIу асовет аунашвачпагIв Эгьзакь Мусса ахваша, октябрь а 18 атшын, Апсны акъральыгIва университет астудентква дрынйан чкIвыныргIа разцIгIараква джьауап риттI.
Айчважвара гIвсахIаткI айхIа йнайтI. Ауи азаман ауацIа Эгьзакь Мусса АААК ахачIвкви амурадкви йалыргата дрыквчважватI, а-Конгресс уыста йапыру йхIватI, ауи амщтахь чкIвыныргIа разцIгIараква йырттI.
АГУ аректор Гварамиа Алеко ауниверситет ймайрамыз атурых Эгьзакь Мусса йайхIвтI, дахIврата йрымугьи дрыквгIашIастI.
«Апсны ауагIа р-Абашта айсра шалгабыргуаз [ауниверситет апны] 130-гIв рдоктор диссертацияква рхчатI. ЗапшуниверситетызлакI ахъазлагьи ауи гIарбара бзипI. ЙалкIгIата айсра зхъысыз ауниверситет ахъазла. Йбаргвыз асквшква рагIан хIара хIгIащаквхарныс йгIахIцхърагIатI [Россия йауу йхIаракIу апхьарта пхатшаква] МГУ, МГИМО, Лагъь КIавкIаз ауниверситетква датшагьи апхьартаква. ХIара гIвзачва хIщардагIвпI», – йхIватI Гварамиа Алеко йгьи йгIацицIахтI: «ХIара йгврыхву чкIвыныргIа хIымапI. УахьчIвала 47-гIвы йаргвану йгьи йхъару агIвыма къральква рпны пIатIу зкву йхIаракIу апхьартаква распирантураква рпны йапхьитI. ХIуниверситет Евразия йгьи Оксфорд адкIылараква йрылапI».
Гварамиа йгватра азынайырхатI Апсны ауагIа р-Абашта айсра апхъала АГУ апны ансисквша Къарча-Черкес йауу абазата жвагIвпхьадзара шапхьалуз. Аректор ауниверситет Адуней апсуа-абаза конгресс йрыцта йдырхъйа йауаш апроектква йшрыдынхалуашла анйара йалакваз йыргвыгъатI.
Эгьзакь Мусса йгIайззаз зымгIва пхата дрызхIвахIвтI.
«Сара насыпрата йызбитI студентипхьадза, араъа сабита йгIайта ъачIвагIагIвта йыцIцIхуа дзачIвызлакIгьи йзынарху абзибара збльынква йгIарылхIвауа ауниверситет съагIвну. Йыздыруа ари акIвпI: жвасквшапхьадзара швадгIапсалтI ари ауниверситет араса анадзара хIаракIыта йаъазлара ахъазла. Квырмыш швзысчпитI», – йхIватI АААК ЙхIаракIу асовет аунашвачпагIв.
Эгьзакь Мусса йара ауаса унашва зхъицIауа «Алашара» жвлара адкIылара джыпхата йал йауаш анхара астудентква ахайыргIвазатI. Сквшпхьадзарала йщаквгылыз «Алашара» аджыпха ужвы АААК анхара апны йгIадрысабапитI.
Цысквша рапхъала «Алашара» ангIаджвыквхIцIагIвацуз сара йгIасгвынгIвуан йынхуш гвып гIаныршара шатахъу. Сара срынйатI закIгьи йазхъазымцIуз, закIгьи згвы азыщтIамыз ачкIвынчва. Ауи агIан хIара хIангIалтI хIшзынхуш, хIылахьгьи хIара-хIара йшхIызлыхуаш. АгIвычIвгIвыс ахъаз уицхърагIузтын далапIатIитI, ауаса агIвычIвгIвыс мгIва тамам дыквуцIарквын, йапхъахауа ачIвырхъаква анатипуа тIакIвгьи йчпуш йаухIвларквын ауи хачIвыта йызуыргыллакIгьи йырхъйуштI. Ужвы, цысквша анцIых, ауыс датшахатI. АчкIвынчва рылаква саныртапшуа ауат шкIкIауа збитI, йызбитI рхъагвы шакву. Ауат рылахь дара-дара йлырхитI», – йгватраква гIайхIватI Эгьзакь Мусса.
ЧкIвыныргIа руагIахъа цри радкIылра йацхърагIа йшауаш ауыс астудентква зджьара йгIанымхауата йрымагIальаматхатI.
Ауи апшта, адуней азазаъащаквала АГУ афакультет йгIвбахауа акурс йапхьауа Аршба Валерия Апсны ашIара, йгIауахвырквын, АГУ астудентква а-Конгресс анхара йалал йшауашла Эгьзакь Мусса дицIгIатI.
Ауи лазцIгIара джьауап айтуата АААК ЙхIаракIу асовет ахъада анйара йалаз зымгIва хIакъта йхъадйырцIатI АААК анхара «рахIа йыззынарху» чкIвыныргIа шракIву.
«Швари хIари хIацыта йапшым апрограммаква гIгIвуаштI, ауат апрограммаква ззынархазлуш ауысла шваргьи швгвгIанаграква гIахIашвхIв йауаштI. Ажва аламкIва швгIаланахIыркIуаштI. [ХIацыта] чкIвыныргIа, аспорт, акультура, арыпхьара йырзынарху йапшым апроектква хIырхъйуштI. ХIара йхIымапI хIгвгIанаграква абахIхIвырныс йъауаш хабарргарта портал. ХIпрограммаква зымгIва хIара аргамта йхIчпитI – швара ауат жвдырырныс, ауат швшрызхъвыцуа гIахIашвхIвырныс ахъаз», – йхIватI Эгьзакь Мусса.
Айкьангьашра-амакIраква руыс даквгIашIасуата ауи йхIватI Апсны анаукаква р-Академия апны «Алашара» адкIылара ауысхарта шаъу, ауаъа айкьангьашырта-амакIырта клуб шынхауа. Ауи унашва ахъылцIитI АГУ апны политологии социологии ркафедра арыпхьагIв ахIба Турава Ирина. Эгьзакь Мусса астудентква аклуб анхара джьгарта йалалырныс йаквгIазшIиттI, йауа ухIварыквын, «ауи угвы йту ухIварныс, ажва гIаугырныс лшара гIауызтуа айчважвартапI».
АрыпхьагIв Турава Иринагьи анйара далан. Лстудентква зымгIва рыхьызла ауи Эгьзакь Мусса дйыхIватI уахьчIва йара жвицсквша дыртазарквын йхъа дызлалабжьахуашыз гIарайхIвырныс.
«Сара акыт апны сгIадзынгылтI, йагIбахуз аклассдза сдада «хIаба»-хIва сйыпхьун. Ауи хIара хIынхара шатахъу хIазибжьун. Ага хIуыс баргвызтынгьи хIара йанакIвызлакIгьи йыгIдыруан [хIгвы йтахIкIыз] шхIзычпуш. Ухъа йазхъауцIара атахъыпI. Сара [йанакIвызлакIгьи] йсцIабыргта йыздыруан йгIастахъхарыквын ауапчахвгьи сшзыпссгIуш. Йуылшуш йазхъауцIара атахъыпI, ауаса ауи ахIатырла мгIвакI гIамудара шатахъхушгьи гIаугвнымгIвыкIва амаль гьамам», – йхIвтI Эгьзакь Мусса йгьи йгIацицIахтI: «Узаман бзи йубара хвгьи азубара атахъыпI. Ауи азаман апхьара, айгвара, азаджв азаджв бзибара шизышвкIуаш йрыкврыдзра атахъыпI».
ЙхIватI ауи йдахIвраква йрыщатакIу ахабзакви ацIаскви рынкъвгара шакIвугьи, йауа ухIварыквын «ауатла уанбзазауа анахьанат угIарылхIвитI, уара йуыгIвзахарныс, йуыцызларныс ртахъхитI».
Анйара апны дгIачважватI а-Конгресс ЙхIаракIу асовет аппарат аунашвачпагIв Таниа Кангьи. Ауи АААК йархъйахьаз апроектква дрыквгIашIастI: Анып амш йазынарху агвыргъьахъв дуква радгалра, «Агвы апхара» акция акIвыршара датшагьи. ЙхIватI Таниа уыжвласыла АГУ апны АААК йаланакIуа чкIвыныргIа рхъвшара шгIандыршушгьи.
Астудентква мгIва йыквицIауата драйхIвахIвтI анаукаква рдоктор, академик Егьдза Йанварбигьи. Ауи чкIвыныргIа джьгарта Адуней апсуа-абаза конгресс анхара йалалырныс йаквгIазшIиттI.
«Швалал, шважва алашвцIа, швымшван. Амаль амамкIва швадзхъагылра атахъыпI: швгIващадзарыгьи ахIбачва йанакIвызлакIгьи йгIашвцхърагIуштI», – йхIватI Егьдза Йанварби.
Анйара ацIыхъва Эгьзакь Мусса Апсны ателебара ажурналистка Кирвал Камилла АААК асогIа литтI – АГУ астудент-журналистква КъЧР апны йакIвшаз «Абаза» кульура-спорт фестиваль йшалаз йазынархаз йагъьу агIвыра ъалгIвыз ахъаз.
Адуней апсуа-абаза конгресс ЙхIаракIу асовет аунашвачпагIв Эгьзакь Мусси Апсны акъральыгIва университет астуденткви йапхъахуз ранйара швабыж пхата йакIвшатI.
Астудентква Эгьзакь Мусса амаль амамкIва ауниверситет ужвыгьи датагIайхырныс йыхIватI.
швталра йа тшаншвцIара атахъыпI.