Голандзиа Эсма

Амандарин фестиваль 7 тыпкI рпны тшауацIнахтI, рахIа йхъадаз «Апсны» этнопарк акIвын. ЗнапIква ъазу нхагIвчва 50-гIвы райхIа рынхараква аджьармыкIьа йгIадыргалтI, асасчва рыхъазла атшыбжьаракви хрихыцаущтрала анкъваквъракви адыргалтI.

РахIа йдуу амзагIви амшын йахъыпссгIауа ачырпIи дукви: «Мандарин» фестиваль анхара алнаргатI

© АААК

ЙауацIыхыз агъын алалра апрограмма тгIачвала тшпсщарагьи чкIвыныргIа рыхъазла йсабапу замангарагьи аланакIуан.

«Агвыргъьахъв зтшын йхъхIтIыз аэтнопарк уагIата хынызкьыгIв раъара гIайтI. Апрограмма джьащахъван, анархараквалагьи йгьапшымызтI: аконцертква, атшыбжьараква, агIарбартаква, ачырпIи дуквала пссгIара – аратква йгIайыз дзачIвызлакIгьи йгвы йаздырхIатI. ЙащтагIайуаз атшын ацIайква йырзалхыз апрограмми чкIвыныргIа щардагIв азызддаз агварани адыргалтI. Йшабгу йгIауахвырквын – хIара хIразыпI йгьи хIайгвыргъьитI афестиваль ауи аъарагIвы ъазнакIкIыз, разыра ажва щарда ъагIгIаз. ЙалкIгIата ауагIа йыргвапхатI амандарин йгIалхыз амзагIв цIла – ауи йхънамкъьалыз заджвы дгьгIанымхатI», – лхIватI афестиваль адиректор Габуниа Светлана.

Аэтнопарк, АмхIаджьырква рдзытшпурам, Marnero маратшашIарпхарта, «Гвма» культура-уысхарта платформа, Каманы кыт – асасчва рыхъаз йапшым атыпква рпны интерактив 30 райхIа адыргалтI. Афестиваль йгIадгылыз щардагIвы «София» совхоз ацитрусуатраквагьи йцатI, атшыгIвра ацIагахра йалалтI, кIарт ахъырхтI, апсуа мандарингьи рызхъара рфатI.

«Асасчва хIыззпшуаз ацкIыс йщардагIвхатI. Апрограмма зныбыжьла йапшым ауагIа йрыквыргIапсын, йаргьи хвыцгьи дугьи гIадгылуан – араъа йауаквугьи атуристквагьи. Ажва гьалам, антахьгьыт аорганизацияква йхIыцыркIуазтын ауагIа ари апш гвыргъьахъв ансисквшагьи йырзадыгIгалра хIтахъын, хIара-хIара ауи аъара уыс гьхIзадкIылуашым. СынчIва йгIахIцхърагIаз зымгIва Анчва дырзыразхатI», – лхIватI афестиваль адгалагIв Аргвын Сария.

Афестиваль аднагалтI хъахIара гIалкIгIара знархарам автоном организация «АЦЛА» жвлара-культура проектква р-Квта. Хабарргарала ауи йацхърагIатI Адуней апсуа-абаза конгресс.