АшIыцраква 01.07.2023 10:50 7945

Рхъвыхрата йджвыквыржьыз «Ахъвмарра цкьаква» проект дырхъйауата Гвымста дзыгIв атшпы апны нышвкъварата килограмм 300 айхIа гIазыркIкIытI

Апсны апны йапхъахауата «Ахъвмарра цкьаква» экология акция акIвшатI. Ауи адыргалтI Адуней апсуа-абаза конгресс анхагIвчва Симониа Херсони Бгъанба Щазини йгьи «Алшараква ъацапшу адуней» гIаджвыквцIагIвчва гвып гIанзыршаз Акаба Альйас. Апсны апны ауат ахъвмарраква радгалра ауыс Санкт-Петербург апны агIапын йакIвшаз Х Нева дуней экология конгресс апны йалачважватI.

«Нева конгресс апны аэкология йапщылу йапшым ауысква гIащтIырхтI – аклимат тшапсахра, адгьыл арпIайра, адзы йгьи абна гIалцIыртаква йрылдзгIара. Айззара ацIыхъва ауи йалаз акъральква зымгIва рпны ахъвмарраква акIвдыршарныс щаквдыргылтI. Ари ужвы йджвыквхIцIаз апроект рхъвыхрапI, хIара октябрь агIан йауацIыхта анкъвакъвра ду адыгIгалныс тшазхIрыхIазыритI», – йхIватI ашIыпIа хъвшараква рыцынхарала АААК ахъвшара аъачIвагIагIв Симония Херсон.

Йапхъахауата «Ахъвмарра цкьаква» жвсквша рапхъала Санкт-Петербург апны йакIвдыршатI. Ахъвмарра ахабзаква аспорт хъвмарраква йыршIырпшыпI: ауи йалу гвып-гвып тшыршитI, штакI апны анышвкъвара нырхитIта йгIадрыцкьитI, ауи ъадзарчпауа квест квпшыра зму ахачIвква дырхъйитI. Симониа йшихIвауала, аэко-квест мурад хъадата йаму чкIвыныргIа хъвмаррала апсабара ахчара йгIаланаркIра, экология культура рыладыркIра, рыжвлара джьгарра гIаршIыхара ракIвпI.

Аэкология акция Апсны йаъу Россотрудничество ауысхарта ацхърагIарала йадыргалтI. АнышвкъваразкIкIыга машинала йгIарцхърагIатI СогIвым къала аунашвахъцIартагьи. Ахъвмарра ъакIвдыршушыз шIыпIата Гвымста дзыгIв атшпы гIалырхтI.

Хабзата йшщаквгылула, «Ахъвмарра цкьаква» сахIаткI айхIа йгьнайуам. Ауи азаман ауацIа ауи йалакву гвып-гвыпта тшырша, анышвкъвара азыркIкIыта йалырххра атахъыпI. Балл рыцIа щардата йгIазгуа агвып айгIайитI.

Ахъвмарра йалан Дидзариа йыхьыз зхъу СогIвым алицей-интернат апхьагIвчва. Ауат дрыуапI Тарба Амра – ауи ари ауыс лахIварата йгIалыланацIаз хIыцагIвылшатI.

«Апхъапхъа хачIвыта йгIахIыздыргылыз хIчвыбаргвхушызшва йызбатI, йаргьи ауат сахIатбжакIла йхIырхъйара атахъын. Азаман гвы асымтдзакIва йагIвпссгIатI. ХIара гвып-гвыпта хIыршан, хIуыс шхIырхъйаз сымабзипI. ХIшалаз нышвкъварата машакв 43 азхIкIкIытI», – лхIватI Тарба. АпхIвыспачкIвын йшылхIвауала апхьагIвчва анкъвакъвра апсып рылархIватI. «ХIара нышвкъвара рыцIа щардата йгIахIхъвшвата анахьанат хIшрайгIайуаш хIащтан. Кьахвта, сабапгьи алата азаман гIгатI. Ари апш хъвмарра ужвыгьи салазлара стахъыпI», – йгIацылцIахтI ауи.

Акция агIарбараква гIахIайхIвтI «Алшараква ъацапшу адуней» гIаджвыквцIагIвчва гвып гIанзыршаз Акаба Альйас. «Дакъикъа 30-ла ацIайква анышвкъвара азыркIкIын йалырххтI: чIвыца, амса, антахьгьыт ахъшвалква дыркIьыдатI. ЗымгIва шалу амсата пщмашаквкI, чIвыцата жвмашаквкI, датша нышвкъварата машакв 30 азыркIкIытI», – йгIаликIгIатI Акаба.

ЙайгIайыз агвып согIата аблокнотква, акъальамква йгьи Адуней апсуа-абаза конгресс адамыгъа зну афутболкаква рырттI.

«Ахъвмарра цкьаква» акъалаква рпны йакIвдыршауа сабша нхарапI, ауи йалакву нышвкъвара гIарауитIта йазыркIкIитI, ауи ахъазла ауат балл рыздыргылитI. ЙазыркIкIыз ахъшвалква зымгIва йгIванхауата йрыдынхалырныс йыргуштI. АдгалагIвчва йшырхIвауала, йауацIыху анкъвакъвра дуква октябрь агIан йакIвшуштI.