«Ахъвмарра цкьаква» ъакIвдыршуш шIыпIата Гвымста дзыгIв атшпы гIалырхтI. Анкъвакъвра йалакваз напIтара ахъарцIатI, пакет нарахвын анышвкъвара азыркIкIуа, йалырхуа йалагатI. ЧIвыца, мса, швъабгъьы, айха – агвыпква ахъшвалква рквпшыракви рпхьадзари йгIарыквхта абаллква рыздыргылуан. Апхьадзараква штшырпсахуа анкъвакъвраква рсайт апны йубун. Йджьгару чкIвыныргIа йшырхIвауала, ахъвмарраква ауат ркъраль йайгвыгIвныс лшара гIарыртитI.

«ХIара хIшIапI, ауаса йанаъазара, хIуачIвымш хIа йхIнапIыцIапI. Ауи йгIалцIла хIкъаруква зымгIва хIкъраль шкъагIуш йазынхIырхара хIборчпI. Ауи акIвымкIвагьи, ахъвмарраква урылазларныс джьащахъвапI, анкъвакъвраква уацIадырсыгьитI, йуымдыруаз ауагIа урабадырдыритI», – лхIватI апроект йалу Михаленко Лаура.

«Скъраль йахъвуш закI сзычпушта йаъазтын лшарата йсыму зымгIва ауи ахъазла йгIасрысабапра стахъыпI. Ауи акIвымкIвагьи, сара араъа сыгIвзачва сыцта сгIайтI. АчIвыйа хIзаламылуаш?» – йгIацылцIатI апроект йалу ужвыгьи заджвы – Пипиа Мила.

Аэкология акция адыргалтI Адуней апсуа-абаза конгресс анхагIвчва Симониа Херсони Бгъанба Щазини йгьи «Йацапшу алшараква рдуней» агIаджвыквцIагIвчва гвып гIанзыршаз Акаба Алиас. Акврыдзраква аэкология йгьи апатриот дырраква ауагIа йрылагара знархару «Ахъвмарра цкьаква» Шта жвлара адкIылара йашватI. Апсны апны квест адгалра ауыс сынчIва агIапын Санкт-Петербург апны Х Нева дуней экология конгресс анакIвшуз йгIащтIырхтI.

«Ареспублика ари йапшу акцияква йырзыбжата йхIпхьадзитI, йауа ухIварыквын хIара хIпсабара пшдза айгвыгIври гватри атахъыпI. УахьчIвала йапхъахауа ачIвырхъаква ракIвпI йхIчпауа. Апхъахьыла ари анархарала рыцIа мчыта хIынхара хIгвыгъапI», – йгIаликIгIатI ашIыпIа хъвшараква рыцынхарала АААК ахъвшара аъачIвагIагIв Симониа Херсон.

Ахъвмарраква акIвшара апхъала арыпхьара адыргалтI. Апроект йахъпшылуа, Санкт-Петербург йауу Тихонова Стелла анкъвакъввра адгалрала швапхата йдырхIахьаз гIарылалхIватI: ауыс сабапра алата йакIвшара ахIатырла ашIыпIи азамани тамамта йгIалхра, уагIа рыцIа щардагIвыта йгIаланаркIра, ацхърагIагIвчва убжьара, асайти амобил цхърагIаги урыланхауа тшубжьара атахъыпI. Атеория хъвы ъакIвшуз апещ Апсны йаъу Россотрудничество Ауысхарта йгIарнаттI.

«СынчIва хIара СНГ йалу жвакъралькI рпны йакIвшауа Евразия ацкьара акубок адыгIгалырныс йлыхIхтI. Адзын акубок рхъвыхрата йакIвхIыршара ахъазла ужвы атшыбжьараква адыгIгалитI, ауаъа Апсны апны ахъвмарраква адызгалуаш хIрыхIазыритI. ЙъакIвызлакIгьи йучпуш аъапI, йамгIаншIыпIазлакIгьи урыцкьа ауаштI», – лхIватI Тихонова Стелла.

ЙакIвшаз ауыс йагIарбагахатI ауи йалакваз рнашх бзи йгьи ауат нышвкъварата йазыркIкIыз акилограмм 76. Ауи ахъвыкI шIыц-шIыц йъадынхалуаш йыргуштI. Ахъвмарраква аналга хъшвал рыцIа щардата йгIазхъвшваз ачкIвынчви ахIвсси асогIаква рырттI.