15771

Россия Апсны ахъахвитра йацнакIищтара йцIыз ажвасквша йазынархата Согъвым апны агвыргъьахъв уысква адыргалтI. Ауат шакIвшаз Адуней апсуа-абаза конгресс ахабарргарта портал асуратква йгIадырбитI.

Согъвым апны Апсны ахъахвитра йацыркIищтара йцIуа ажвасквша дыртлапIатI: жвасквша цIытI ауи агIан Россия Федерация йырпрезидентыз Медведев Дмитрий Апсни ГIвадахь Осетии зхъа йахвиту къральыгIва кIьыдата йшаъу ахабар адуней йандйырдырызищтара.

Щымта акъраль акъала хъада абзазагIвчви асасчви Апсны йапхъахуз апрезидентква Ардзынба Владислави Багапш Сергейи рнышвынтараква йгьи Артшхъвара апарк рпны хIврапшдза щтIарцIатI.

Ауи амщтахь ареспублика арайонква зымгIва ргIащтийыгIвчва злаз акытмлыкврхIара пкъыгIваква ргIарбарта анхара джвыквнацIатI. Ауи апны асасчва апсыуа рызкъква ршIадыршварныс лшара рыман. Йара ауи асахIат агьагьара апны ауагIа уарад рхIвун, йгIахIвуан. Агвыргъьахъв йалан концерт дугьи – ауи Чанба Самсон йыхьыз зхъу Апсны акъральыгIва драма театр апны йакIвшатI. Датшагьи концерткI амшын йатшпну Согъвым аурам апны йадыргалтI – ауи йызтахъыз зымгIва запштI.

Агвыргъьахъв алдыргауата зхъа йахвиту Апсны ахъахь ажвгIванд гIатызрыкIкIаз салюталарыжьтI.

Ауи ауысла йауацIыхта >>