КъЧР 03.11.2019 18:50 29902

Октябрь а 27 йгIашIарышвта ноябрь а 1-дза КъЧР апны абаза бызшви литератури йпщбахуз рфестиваль акIвшун, ауи «Тобыль апхьараква» зхьзу йцIасхаз аконференцияла йалгатI.

Барганджиа Саид

«Тобыль апхьараква» зхьзу наука-практика конференцияла йалгатI октябрь а 27 йгIашIарышвта ноябрь а 1-дза Къарча-Черкес апны йпщынхауата йакIвшаз абаза бызшви литератури рфестиваль.

Апрофессор, абызшвадырыгIв, Къарча-Черкес къральыгIва университет наука нхарала апроректор ПIаз Сергей апхьараква рпрограмма йшIу йгьи швапха зырхIахьаз апхьахьаква, арыпхьагIвчва, Арыпхьарали наукали КъЧР а-Министерстви ареспублика амуниципал районква культурали арыпхьарали рхъвшаракви ръачIвагIагIвчва, КЧГУ амагистранткви аспиранткви, Апсны, Ставропольшта йауу архъвыхыгIвчви астуденткви ргIачважвараква шалаз гIайхIватI.

Апхьараква йалакIыз алачIварала йалагатI, уацIыхъван ауи йалакваз тшыршан асекцияква рпны йынхатI. Асекцияква абаза йгьи апсуа бызшваква руыжвгIанчIви аъащи ауатла арыпхьара апны баргвырата йгIаншауи, абаза йгьи апсуа литератури афольклори, арыпхьара амалькви атеории йапшым адисциплинаква йырзацалу архъвыхракви руысква, цри бызшви литератури рырдырра атеории апрактики йырзынархан.

ЙалакIыз алачIвара урышв бызшвала йакIвшатI, асекцияква рпны йапхъахауата адокладквагьи ахабарквагьи абаза, апсуа йгьи агвхъауа бызшваквала йгIархIватI – ауыгьи ацри бызшваква ргIащаквыжьри ртшауацIыхри йырзынхауа ужвыгьи чIвырхъакIта йалтI.

Аконференция апны ари анархарала уыста йырхауагьи гIатгарата йыззынадзазгьи йрыквчважватI.

«Къарча-Черкес апны ауысагIвчва, агIвгIвчва, антахьгьыт аршIыйагIвчва ргIвыраква ъагIанырцIуш алитература-гвацчпа журналква гIацIщтра щарда цIуата йагIапI. Ари ауыс йызнымкIва йгIащтIырххьатI КъЧР агIвгIвчва радкIылараква. СынчIва Алиев У.Д. йыхьыз зхъу Къарча-Черкес къральыгIва университет аунашвачпагIвчва КъЧР ауагIахъаква рыбызшваквала литература-гвацчпа йгьи наука-дырранкъвгара нархара зму пщжурналкI гIандыршарныс щаквыргылра нарахвтI», – хIгватра азынайырхатI ПIаз Сергей йгьи йхIватI асквш 2019 а-«Тобыль апхьараква» рпны КЧГУ аректор Уаздан ТаусолтIан ауагIахъа бызшваквала йгIацIцIыз ажурналква йапхъахуз рномерква аконференция йалакваз йшдйырбаз йгьи согIата йшритыз. Ауат «Абазашта адзыхьква» (абаза бызшвала – аредакция ррытаразга) йгьи «Хакв» (агвхъауа бызшвала – аредакция ррытаразга) ракIвпI. Ажурналква сквшыкI апны гIван йгIацIырщтларныс йаквдырпшитI, йгIацицIахтI абызшвадырыгIв.

Ауи йгIахIгвалайыршвахтI асквш 2019 аконференция ауи апхъала йакIвшакваз йызларапшымызгьи. ХIызту асквш ауи акъральгIв жвлара тшауацIнарыхрала апрезидент грантква р-Фонд грантла йгIацхърагIатI. Ауи акIвымкIвагьи сынчIва аконференция Апсны акъральыгIва университети Апсны анаукаква ракадемии гвып дута йгIарщтийыз апхьахьакви астуденткви джьгарта йалан.

«Ансисквша йакIвхIыршауа «Тобыль апхьараква» йшгIадырбауала ари аконференция арыпхьагIвчва рыжвлара йалархIвитI, абаза бызшва, литература, культура хчари тшауацIдрыхри апны ауи магIын ду зму уыста йырпхьадзитI», – йажва алйыргатI ПIаз Сергей.

Абаза бызшви литератури рфестиваль КъЧР апны ансисквша Къарча-Черкес къральыгIва университет, Арыпхьарали наукали КъЧР а-Министерства, Абаза муниципал район аунашвахъцIарта ацта «Алашара» Дуней адкIылара йакIвнаршитI. ЙангIаджвыквыл асквш 2014 йгIашIарышвта ауи йалазлитI Къарча-Черкес аквтанай апхьартакви аколледжкви рапхьагIвчва уыса гIапхьарали алацIара гIврали ранкъвакъвраква, абаза бызшвали литературали олимпиада. ЦIаста йщаквгылын ауи «Тобыль апхьараквала» йалгалитI, ауаъа анкъвакъвраква ргIарбараква гIархIвахлитIта йайгIайквазгьи ауат зрыхIазырыз арыпхьагIвчвагьи асогIаква рыртлитI.