«Зны Апсны апны» сериал шхIазырхаз, афыр хъада йара дызлайапшу, патриархат ацIасквала йбзазауа адунейи глобализации рапшIахра ауысквала хIара актер, арежиссер, АААК йалу Таниа Теймураз хIйачважватI.
Ауи йачважваз Голандзиа Есма лакIвпI.
– Теймураз, щарда мцIуата комедията йчпу асериал «Зны Апсны апны» гIадырбауа йалагатI. Ауи уара йгIануыршатI, акино апны уа уавторпI, упродюсерпI, атурасы хъадалагьи угIахъвмартI. ЙазырхIвауата йугIахьайа уынхара?
– Асериал йазырхIвауа интернет уталтагьи узапхьуштI. ЙаъапI йзырджьауагьи, ауаса ауат райхIарагIв хIыгвлачва ракIвпI. Грузия акъральгIвчва асериал йгIарыцIнарышвтуа зджьакIквата йачпатI – райша йъатахъыз хIаквшвата гIацIцIуаштI. Акино йгIанарбитI къральыгIва шаъу – намхъара амазтынгьи Анчва анахьанат йгIарыликIгIата ззухIва ауаш апсуа дуней аъапI. ХIара йхIтахъын мшыркъварала ауи ахъатаквакI гIахIырбарныс, ауагIа ргватра ауат йырзынахIырхарныс. ХIара заджвгьи закIгьи дгьазыгIбжьум, заджвы йхъа закI тагIжьырныс хIгьащтам, турыхкI гIахIхъвыцын – ауи запшкъральызлакI апынгьи, адуней запшшIыпIазлакI апынгьи йынша ауашын.
– Антахьгьыт ауи хIара рыцIа хIызщцаз йгьи йхIзаргвану амшыркъваща гIаргвынгIвыма?
– Хъара сгьцарымта – йацы аэропорт апны ауагIа гIасыдгылуанта асериал ажва бзи азырхIвун. ХIымшыркъваща ргвы шазшIыгъьыз рхIвун – щардагIвы КВН хIанхъвмаруазищтара хIырдырхитI, ауи агIангьи хIара хIхатI хIымахын. Йшаъадзу гьсыздырам, ауаса йзымгвапхаз заджвгьи са дгьгIасыдымгылтI. (ДхъыччитI). АцIабырг схIвапIта, асериал ауагIа йшрылалыз сазыразпI.
– Йара сериал ахъысхпI-хIва ухъа йшпагIаташва?
– Ауыгьи хъыччахъвата йгIаншатI. КВН хIанхъвмаруаз акъральыгIваква рхъадаква лакъырды йхIчпалун, апшыгIвчва ауи йанакIвызлакIгьи йыргвапхун. Сгвы йтаз START (START – Россия апны онлайн-кинотеатр – аредакция ррытаразга) йанрасхIв йыргвапхатI, апродюсер Троцюк Алексейи сари тшадхIкIылын ауи хIадынхалуа хIалагатI. Схъа йтаз проект квпшыра ангIанауахв Бабасикгьи (ШакIайа Руслан – асценарий агIвра йалаз, афыр хъадаква рыуа заджвы йтурасыла йгIахъвмарыз – аредакция ррытаразга) ДжопIуа Тенгьызгьи (асценарий агIвра йалаз – аредакция ррытаразга) гIахIылалтI. Акино арежиссер КIвакIваскьыр Теймураз йхъихтI.
– Йанхъышвхуаз баргвырата швызшIашвайа?
– Ауат гьапшымызтI, ауаса ауи апш магIны рзубушта йгьаъамызтI. ХIара зымгIвалагьи йгIахIцхърагIун, баргвыракI ангIаншарызгьи ласдза ауыс агвынхIыргIвуан. Апсны апны са зымгIва сырзыразпI: авласть знапIыцIугьи, датша уагIа щардагIвгьи – зымгIвагьи къарукI гIаларцIун, хIаргьи ауи рыцIагьи хIаргвышхвун.
– Уара йшпаубауа, зтурасыла угIахъвмаруа афыр хъада уа дуапшума момкIва ауи зхIаль датшу дгIвычIвгIвысума?
– Ажва гьалам, ауи са дгьсапшым. Афыр хъада дгIвычIвгIвыс тамампI, драйшапI, сара ауасадза саъата гьсзыхIвушым. ЗакIылагьи хIапшызапI, ауаса зымгIвалагьи хIапшыта гьсызрыбагъьушым. (ДхъыччитI).
– АфырквакI апсуа жвлара йрыуу зджьакIы йыршIырпшызшва йаъапI. Афильм апны ауат аквшвараква хIадагIвачата йалма момкIва йыжвдыруата ауаса йшвчпама?
– АуагIа рынхартаква хIальквакI гIарыларцIитI, ауи йгIалцIла, йгIауымдырхуашта йгьаъам. ЙаъапI Россия абзазагIвчва дара ракIвымкIва йрымуа аперсонажквагьи. Ауи рыцIа йызпщылу агIвычIвгIвыс дъабзазауа ашIыпIа гьакIвымзапI – йхIаль акIвта гIацIцIуаштI. ХIара датшагьи йхIтахъын патриархат ацIасквала йбзазауа адунейи глобализации рапшIахра апсабара ахабзаква шапсахуа гIалхIкIгIарныс. Ауи ззысхIвауа арадиоактив хъшвалква йырзынархата асюжет йалсуа атема акIвпI (афильм асюжетла аправительства арадиоактив хъшвалква арачвагIацIхырта апны йыцIаржныс ртахъыпI, ауи ареспублика шабгу аэкология йшазарархуш йампшуа – аредакция ррытаразга). ЗынзаманкI Амазонка агьагьара абна жвпIаква анпыркъы рыцхIагIа ду гIалцIтI. ХIаргьи ауи апш закIы хIазыхIазырзара атахъыпI. ХIара зпсабара цкьу, хIцIаскви хIхабзакви ъабзу хIапсуа дунейчкIвын гIащаквыгIжьра атахъыпI. Ари аъара цIла Апсны ащхъаква рпны акIвымкIва датша зджьарагьи йгьгIайуам. Ауи акIвпI хIара дзыгIвгьи гвалгьи зхIыму – ацIлаква хIпсабара гIархчитI.
– Асериал ужвыгьи кIара ащтагIайуашма?
– ХIгвы йтапI, асценарийгьи гIгIвуа хIалагахьатI, йгIвбахауа асезон хIадынхалитI. ЙшалакIу хсезонкI тшыртахIыршвара хIгвыгъапI.
– ЙалакIыта апсуа кинематограф уаквчважварквын, уахьчIва ауи зтагылу аъаща шпаубауа?
– ХIара талант зму арежиссерква хIщардапI, адраматургквагьи хIымапI – ачкIвынчва, ахIвсса шIаква. Ауат апхъахьыла щардала урайгвгъушта йаъапI. Са сшхъвыцуала, зныкI згIвыраквала хIгIадзынгылыз агIвгIвчва, апрозагIвгIвчви ауысагIвчви рабанпара шаъаз апшта хIапхъахьыла арежиссерква рабанпара гIаншуштI. ЧкIвыныргIа акино ахьыла йахъитI. ЙайхIатагьи йсхIвапIта – хIара йхIмурадпI аъачIвагIагIвчва Апсны йгIагIгта акино йапщылу йапшым аъачIвагIаквала – гример, суратчпагIв, актер-агьиквала – амастер-классква адыгIгалырныс.
– Талант анхIымазара, йшпаубауа: йхIзымхъауа ачIвыйа? Ахчума?
– Сара ахчагIваца сазхъвыцуазарквын акино гьсызхъымхуашызтI. ЗымгIва йрапхъу тахъыри зъачIвагIа йнардзата йыздыруа йа йыздырырныс зтахъу ауагIи ракIвпI. Ахча – ауи йгIвбахауа уыспI. Апхъапхъа йгIайуа аидеи атахъыри ракIвпI. Анчва йбзирала, йгIахIыцIагылуа абанпара бзипI.
– Уара комедиягIвацума ухъа ъаубауа, момкIва датша жанргьи тшадукIылра угвыгъума?
– Агагьи стахъын, ауаса ари ажанр рыцIа сазычпапI, пышва бзи сымапI. ЦIабыргыта, комедия цкьата зынгьи йгьхъысымхтI, айхIарала узырхъыччауа жанрпI – драмеди, трагикомедия, ауаса адрама сазынадзара ахъазла ужвыгьи тшызбжьара, пышвагьи сырхIара атахъыпI. Ауи акIвпIта, зныкIдза ари ажанрла хIынхапI. Ауи акIвмызтынгьи, йбдырума ауи зсымуа? Адуней апны ауи аъара кIара ншитIта – дакъикъа 50-ла акIвызтынгьи ауагIа рнашх гIащтIызхуаш, йырчвымхIатлахуш закI аласцIара стахъыпI. Са ари акино йшабгу сапшхьатIи.
– ЙгIахIауымхIвума щта – ажанр ахабзаква шаъу апшта зымгIва бзита йалгушма?
– ЗакI схIвата швзампшхуата йгьсчпарым. (ДхъыччитI). Бзила швапшытI!
швталра йа тшаншвцIара атахъыпI.