Адуней апсуа-абаза конгресс анхагIвчва декабрь а 25 Баслахв кыт апны Апсны ауысагIвчва бергьыльква йгьи ауысагIвчва шIаква рыхьызкви ражвакви зну гъвычкIвын 71 дыргылтI.
Кирвал Камила
Адуней апсуа-абаза конгресс агвып асабша декабрь а 25 атшын Баслахв кыт йаъу Апсуа гIвгIвчва рпарк апны агIвгIвчва рыхьызква зну агъвычкIвынква дыргылтI.
Ари апроект ахабар гIахIалхIвтI АААК апхIвыс советква рунашвачпагIв Ардзынба Гета. Ауи йгIалылкIгIатI агIаджвыквцIара зчIву а-Конгресс ЙхIаракIу асовет аунашвачпагIв Эгьзакь Мусса шйакIву.
«СынчIва агIапын Мусса ХIабальа йпа Баслахв даъан. Ауаъа апхьарта апны швабыж пхата хIдрайгватI, айчважвара джьащахъвагьи акIвшатI. Ауи агIан ацIлаква йыркIыду агъвычкIвынква гIаршIыцхра шатахъугьи ауатыкв йгIатаргатI», – ауыс шгIаджвыквлыз гIахIгвынлыргIвытI Ардзынба.
Ауи йылхIватI Апсны шабгугьи агIвгIвчва рнапIквала йларцIаз цIла ъагIайуа парк ъану кытзаджвыкI апны шакIву, ауаса АААК ауи апш проект зымагIальамату акытква зымгIва йырцхърагIарныс йхIазырпI.
«ХIгвыгъитI акытква рпны йгIаныршу ашIыпIа хъвшараква рунашвачпагIвчва хIпроект рбата йгIалалырныс. АгIвгIвчва ражваква гIалызхуаш чкIвыныргIа ъану акыт хIцуштIта йара ари апш нхара адыгIгалуаштI», – йгIацылцIахтI ауи.
Баслахв апарк сквшышвбжакI ахъыцIитI. СквшигIадзагьи араъа хьзы зхъхIвалгIу ацIлаква рпхьадзара йалахIитI. АААК агвып йажвыз агъвычкIвынква псахрала йгIашIамсуата ауат агIвгIвчва ргIвыраква йгIарылху ажваквакIгьи рнырцIарныс йаквыркIтI.
«ХIара апхьарта апхьагIвчва тшырзынахIырхан агъвква йрынхIцIа йауаш ажваква хIызгIалырхырныс хIрыхIватI. МызкIи бжакIи чкIвыныргIа ауи йадынхалуан, апхьагIвчва Очамчыра абиблиотека йцалун, агIвыраква йрыпхьун, йыргвапхуз ашIчIвараква гIалырхуан, ауат йрылачважвун – анхара швабыж йджьащахъван. Ажва гьалам, аллея ужвыгьи тшауацIнахуаштI, ацIла шIыцква гIалахIуштI, ауаса йанаъазара, апроект арыла йгьашIасуашым», – лхIватI Ардзынба Гета.
АшIыпIа хъвшараква рынхари чкIвыныргIа рджьгарри анзыргIалуа Берзениа Валерий йширыбагъьауала, агъвычкIвынква гIазлыху апкъыгIва композит щарда йнайуаштI. Агъвква сквшбжакI айхIа йырчпун.
«ХIара агъвква ласыта йшымхъвашуш апш йхIчпатI, ауат заман ауыра апхьарта анхара йшахъвуш апш. Ауи аъара ауырата, хIгвы азыщтIата хIзацрахIваз ауи зымгIвагьи йырзынхауа уыспIта акIвпI. ХIырзыразпI йхIыцызкIта апроект хIыцназырдзаз апхьагIвчвагьи арыпхьагIвчвагьи ан-абачвагьи», – йхIватI Берзениа.
Апроект йахъпшылуаз биологияла арыпхьагIв Аблотиа Инга йгIалылкIгIатI ари ауыс экология хъаталагьи сакъта уадгылра шатахъыз.
«АцIлаква, псы зхъу зымгIва рапшта, йгIайитI, йрылахIитI, ауат чIвымыгъ рылауца йгьауам», – лхIватI ауи агъвычкIвынква ацIлаква йшрыквдыркIыз гIахIгвынлыргIвуа – ауат ацIлаква йрымзарархуш йазалху рахъва багъьала йкIыдшIархIвалтI.
Баслахв апхьарта йгIалгата ужвы акыт аунашвахъцIарта йахъаду Пагава Дауыр апроект архъйара йалаз зымгIва, Эгьзакь Мусса рапхъа дгылата, дрызхIвахIвтI.
«Ари апш проект гIалазгаз Адуней апсуа-абаза конгресс хIазыразпI. Асквш шIыц ангIаргванхауа хIа хIыхъазгьи, апхьарта ахъазгьи ауи согIа бзипI», – йгIаликIгIатI Пагава.
Акласс ахIбаква рапхьагIвчва йгIаргвалашвахуан агIапын хачIвы ангIарырт йазгIашыкъта ауыс йшажвылыз. АшIчIвараква ангIалырхуаз агIвгIвчва йайшысу ражваква йгIайуаш абанпараквагьи йшраргванызлуш йазхъвыцуан.
7 акласс апхьагIв Воуба Мрамза ажваква ргIалхра шмайрамыз гIалылкIгIатI.
«ХIара апсуа бызшви литератури рарыпхьара йазалху апещ апны хIынхун. АгIвыраква хIрыпхьун, хIрыквчважвун, хIамакIуан, уацIыхъван закIы хIазгIайхуан. РшIыйара злаз ауи анхара швабыж йхIгвапхатI. Анчва дырзыразхатI ауи адызгалыз», – лразыра гьцIалымкIытI Воуба.
Апхьарта адиректор Пачулиа Асида запш аъам ари апарк апны йапшым асквшква рагIан цIла лазцIаз агIвгIвчва рыхьызква гIашIылпхьадзатI: Чаниа Терент, Бебиа Платон, Тарба Нели, ТаркIьыл Сарион, Аджьынджьал Анатолий датшагьи щардагIвы. АцIлаква анларцIарыз амзтахь агIвгIвчви апхьагIвчви ращтаныкъвара гьшIымчIвузтI, сальамшвъала йабадыруан.
«АгIвгIвчва рсальамшвъаква анхIызгIайрыз алитература кружок апны хIгIарыпхьалун, ауи асабиква ауысара тшадыркIылырныс йаквнаргвышхвун. УахьчIвагьи ауи ацIас гьшIымчIвастI», – лхIватI Пачулиа.
АгъвычкIвынква ацIлаква йаныркIыдырцIуз апхьагIвчва ахIбачва бзи йырбауа агIвгIвчва ргIвыраква ршIчIвараква йгIарыпхьун.
Асквш 2021 мартI агIан Апсны нхара уысла данаъаз Адуней апсуа-абаза конгресс ЙхIаракIу асовет аунашвачпагIв Эгьзакь Мусса Баслахв кыьгьи дыдсылтI. Анйара Хьыба Чичико йыхьыз зхъу Баслахв аквтанай апхьарта апны йакIвшатI. Ауи агIан Апсуа гIвгIвчва рпарк апны йажвыз агъвычкIвынква рпсахырныс щаквдыргылтI. Апарк апны йгIайуа ацIлаква райхIара агIвгIвчви апхьарта йасасыз агIвычIвгIвыс бергьылькви дара рнапIквала йларцIатI. Эгьзакь Муссагьи йхъатала апхьарта апарк апны хIацIлакIи мзагIвчкIвынкIи лайцIатI.
швталра йа тшаншвцIара атахъыпI.