ЗкьыгIвпхьадзара йнадзауата Согъвым, Черкесск, Эскещехир, Амман рбзазагIвчва онлайн амальла рыла йабатI Апсны абаракъ Амши Абаза культура Амши знархараз агвыргъьахъв айззараква шакIвшуз.
Барганджиа Саид
Черкесск апны йаныргIалу «Алашара» адкIылара ахъвшара аунашвачпагIв йтарагылагIв Чква Расул йшихIвазла, ауагIа ргвщтIыхра тшауацIнахтI Йхвбахауа акультура-спорт фестиваль «Абаза» апны. Ауи йалан швкIыгIвпхьадзара йнадзауата апсуа-абаза уагIа ргIащтийыгIвчва.
Чква Расул йгIаликIгIатI апсуа-абаза уагIа рыхъазла ахъвмарраква шгвыргъьахъв дуу.
«ХIара джьауапкIра дула хIадгылитI акультура-спорт фестиваль адгалра, йшпакIву ухIварыквын йыгIдыритI ауагIа ауи йырзымчхIахуата йшазпшуа. Ари йапшу агвыргъьарамшква магIны рымапI хIкультури, хIцIаскви, хIхабзакви рбзира ауагIа хънахуата йрыларкIныс ахъазла», – йгIацицIахтI Расул.
Акультура-спорт фестиваль ъадзакIвшуз дзачIвызлакIгьи йылшун Адуней апсыуа-абаза конгресс далалырныс. Ауи ахъазла, АААК ЙхIаракIу асовет аунашвачпагIв йцхърагIагIв Тания Кан йшихIвазла, йазалху анкета агIарбараква тагIвра атахъын. Ауи йгIацицIахтI аконгресс йалалуа ауагIа тгIачва дукIта штшадыркIылуа, нархарта хъадата йрымугьи шIырпшыра змам абаза уагIа культура агIахчара шакIву.
Афестиваль асасчви йалаквази рыхъазла «телебара цхIа» адгалхатI. ЗкьыгIвпхьадзара йнадзауата Согъвым, Черкесск, Эскещехир, Амман рбзазагIвчва онлайн амальла рыла йабатI агвыргъьахъв айззараква шакIвшуз.
«Ателебара цхIа» анакIвшуз агIан Согъвым ахьыла хIвахIвра ажвала ауагIа тшырзынайырхатI Апсны Республика апрезидент Хаджимба Рауль.
«Апсны ачIвыла геополитика магIны ъаму йгIалцIла къраль щарда йыркIырныс рмурадта йгIагвыквсуан, ауаса апсыуа уагIа рапхъанчIвиква, ауат рапхъагылагIвчва йырдыруан рыжвлара шадыркIылуашызгьи йшгIащаквырыжьуашызгьи, акIыгIвчва йырквнагу аджьауап ткIьий шрыртуашызгьи», – йхIватI Апсны Республика ахъада.
Ауи йгIацицIахтI Апсны атурых анцIралагьи йшалазлуш зполитика уасаражврала Апсны амчи ахвитри гIазхчаз афырква рыхьызква. Амальынтшата йангIанхарыз ауат йзачIв гIвымакъраль рызлакIгьи йырпшIагылырныс зылшуз рырхъвква гIащтIырхуан.
Апсны Республика ауыжвгIанчIви къральыгIва баракъ рыбагъьахатI Акъва (Согъвым) апны Апсны Республика ЙхIаракIу а-Совет асессия ащаквыргылрала асквш 1992 июль а 23 атшын. Ауи асхъан асквш 1978 йнахвхаз Апсны АССР а-Конституция анхара ашIарысхатI, асквш 1925 агIан йлыххаз Апсны ССР а-Конституция гIащаквыргылхатI. Асквш 2005 йгIашIарышвта Апсны Республика АкъральыгIва баракъ Амш июль а 23 атшын хабза щата амата йдыртлапIитI.
швталра йа тшаншвцIара атахъыпI.