Адуней апсуа-абаза конгресси Colors of nations компании Гагра апны экология йазынархаз акция акIвдыршатI.
Барганджиа Саид
Адуней апсуа-абаза конгресс Гагра апны экология йазынархаз гIвакциякI акIвнаршатI. АААК агвып Гагра апсуа апхьарта апшцIа апны апхьагIвчва йрыцта цIла ларцIатI, ауи амщтахь Colors of nations компании дари абзазагIвчва экология йазынархаз лекция йырзапхьатI.
АцIлаква абзазара йадамыгъапI
Адуней апсуа-абаза конгресс анхагIвы Хагба Изольда йшгIахIалхIвызла, щыбжьандза а-Конгресс агвыпи Гагра йапхъахауа аквтанай апсуа апхьарта апхьагIвчви йацыта апхьарта апшцIа апны Стрикт-хIва йызпхьауа Китай апны йгIайуа дзхIвымц аллеята йларцIатI. Хагба йшылхIвауала, ауи ацIлажвла апхьарта аунашвачпагIвчва йгIалырхтI, а-Конгресс ацIлашIаква ахвгIан апхьарта йгIаднагалтI.
«ХIара цIла 20 лахIцIатI. Ауи чкIвыныргIа цIла лацIара, хIхъа зладухауа Апсны апсабара хчара шатахъу йазызбжьуш ацынхаран», – лхIватI Хагба Изольда.
Ауи йгIахIгвалалыршвахтI цIла лацIарала Адуней апсуа-абаза конгресс йаднагалуа ари йапхъахауа йшуысым.
АААК ахьыла лразыра гьцIалымкIытI апхьарта адиректор Гвынба Хана. Ауи йшылхIвазла, акция асабиквагьи ауат ран-рабачвагьи гвыргъьара ду гIарыланацIатI.
«АгIайыраква лацIара абзазара, алахIара йырдамыгъапI, саби дъану йанакIвызлакIгьи уачIвымш шлашаразлуш айгвгъара йагIарбагапI. Ауи акIвпIта, саргьи схъатала йахьчIва йакIвшаз ауыс насыпла йырчвызлуш хIуачIвымш йапсщылитI. АрыпхьагIвчвагьи, ан-абачвагьи, дара апхьагIвчвагьи рыхьызла адгалагIвчва хIшырзыразу схIвара стахъыпI. Анчва дырзыразхатI а-Конгресс йалата йынхауа зымгIва апхьагIвчва рквта ари йапшу кIара уазызбжьауа уыс ъакIвдыршауа», – лхIватI адиректор.
Апхьарта апхьагIвчва акция джьгарта йгIалалтI. АзджьакI амашаква ржуан, азджьакI йларцIахьаз адзхIвымцшIаква нышв рыцIарпсун, азджьакI ауат йрыцIарчвуш дзы гIаргуан.
11-хауа акласс йапхьауа Бениа Давид йцри апхьарта апны цIла ъалайцIаз дайгвыргъьитI. Ауи йгвы алалуа йхIватI уыжвласыла апхьарта дшыцIцIхуаш, ауаса йыгIвзачви йари йацларцIаз ацIлаква араъа йшгIанхуш.
«Ари йапшу ауысква магIын ду рымапI, йауа ухIварыквын апсабара, хIгIакIвзыршауа адуней урайгвыгIвра атахъыпI, хIуачIвымш ауат йырпщылапI. Са сгвыргъьитI ари акция съалаз. Ауи цIабыргыта апсабара бзи йубауа уачпитI», – йлахIвараква хIыцагIвишатI Бениа Давид.
ХIгIакIвзыршауа апсабара хIайгвыгIвуата
АцIлаква анларцIа амщтахь АААК агвып Гагра адзтшпыурамла йдырхаутI. Ауаъа аэко-акция йгIвбахауа ахъвы акIвшун. Ауи адгалра Colors of nations компаниягьи алан.
Акция йхътIу ахIауа апны йызтахъу дзачIвызлакIгьи дызздзыргIвы йауаш эко-лекцията йадыргалтI.
Араъа йгIачважватI йбергьльу апсуа эколог Кириа Михаил, «Чистый город» («Акъала цкьа») зхьзу Гагра амуниципал нхарта аунашвачпагIв Джениа Даррел, «Молодая гвардия» жвлара адкIылара йалу Сичинава Динара.
Кириа Михаил Апсны апны йаъу азарарчкви ареспублика апны ауат йшрабакIуи гIайхIватI. Ауи аздзыргIвчва рпынква йларцIуш гIайыра датша къралькI йгIатыргата йангIаргуа згIвакI шацгIатарымгуш йазсакъхара шатахъугьи даквгIашIастI. Джениа Даррел Гагра абзазагIвчва гIайыраквакI чмазагIвхата йыдзуазшва йанырбара ауи зархIвуашта тшыззынадырха йауаш гIаргвынйыргIвытI. Сичинава Динара лхъатала аэкология дазсакъуа штшылбжьаз, ауи асакъра хIальта йшуылазлуш, ауи ахIаль убзазара йузалымхуаш йахъвыкIта йалуата йчпа йшауаш ауысла лхъвыцщаква гIалхIватI.
«АуагIа йрымагIальаматдзата йыргIуз йаздзыргIвуан, ажва гьалам щардагIвы шIыцраквакI шрыларкIыз. ХIара хIгвыгъитI ауаъа йызквчважваз шIакI йтыцIуа шIакI йталуамцара тшауацIнахуашта, акъала абзазагIвчва закIыла йрыхъвушта», – лгватраква гIахIалхIвтI Хагба Изольда.
Алекция анакIвшуз ауагIа йгIарылархIватI акъала аквта кофыжвырта «Бриош» апны йамуыхуа абатарейкIаква ъазыркIкIуаш тапсарта шдыргылуаш.
«ДзачIвызлакIгьи йнымхахуа йбатарейкIаква гIайгта ауаъа йтайрышв йауаштI. АбатарейкIаква апсабара йамзарархауата ушрыдынхалуаш дукI йгьаквчважвалум. ЙшгIацIцIызла, асасчва йрыуата щардагIвы ахъаз йкIадрышвхуа абатарейкIаква апсабара зарар ду шазгIаргуа гьрымдыруазтI. ХIара ауи атапсарта хIахъпшылуаштI, йазнахапхьадза йтыхIхлуштIта СогIвым йтагылу экология аинститут йыгIгалуштI, ауаъа ауат азыркIкIлитIта шIыц-шIыц йрыдынхалхитI», – йгIахIгвынлыргIвытI Хагба Изольда.
Алекция адгалра йалаз Colors of nations Апсны апны щардагIвы зхабар ргIахьаз компанияпI. Ауи идеология хъадата йынкъвнагауа абзазара апны йаъу анамхъараква уыжвгIанчIви азъазара амальквала йгIарбара акIвпI.
Акомпания гIанзыршакваз йрыуазаджву Савилова Анна йгIалылкIгIатI ргвып экология ауысгьи щарда цIуата штшазынадырхауа.
«ХIара ауат ауысква азъазара амальквала йгIащтIыхIхитI. Азъазара йамгIануысызлакIгьи уаквчважварныс лшара гIаунатитI. Арат алекцияквагьи ауи йаквшахIатхитI», – лхIватI Савилова.
Адуней апсуа-абаза конгресси ауати рацынхара ауыс акомпания гIанзыршаквази Хагба Изольди ахъаз нбжьагIв-нбжьагIв йшайчважвузымца йгIаларгатI.
«ХIара апсабара ахчара йапщылу ауысква шгIащтIыхIхуаш хIалачважвун. Ауат ауагIа рлымхIа йтарыслара атахъыпI. ЙшгIацIцIылза, а-Конгрессгьи ауат ауысква магIны рызнамбауата йгьаъам», – лхIватI Савилова Анна.
Аэко-лекция анакIвшуз даъан Гагра район аунашвахъцIарта ахъада йтарагылыгIв Барцыц Алхас. Ауи арат йрапшу апроектква рыцIа щардата йырхъйара шатахъу дацIачIвагъватI. Барцыц Адуней апсуа-абаза конгрессгьи Colors of nations компаниягьи дшырзыразу йхIватI.
«Ауат (АААКи Colors of nations компании – аредакция ррытаразга) йырцIабыргта хIкъраль апны аэкология аъаща йахъгвыргIвитI. ХIара бзита йгIахIгвынгIвитI атуристква хIпны рекреация йазыбжата (рзгIвадара йахъвауата тшпсырщара ртахъыта – аредакция ррытаразга) йшгIайуа. Ауи ахъазла хIара зымгIва хIымапI – турист щардагIв гIахIрайгварныс лшара гIахIызтуа апсабарагьи ауаъа йаланакIуата. Ауаса ауыгьи йара айгвыгIвра йазыбжапI», – йгIаликIгIатI Барцыц Алхас.
АунашвахъцIарта ахъада йтарагылыгIв акция йгIалалыз ащардагIв чкIвыныргIа шракIву хIгватра азынайырхатI йгьи йгIаликIгIатI «аэко-акцияква рпны чкIвыныргIа щардагIвыта йанубауа угвы йшалахIауа».
«Ари алшара гIасрысабапуата Гагра районгьи акъраль шабгугьи рбзазагIвчва тшырзынасырхара стахъыпI: хIара хIпсабара ахчара джьгарта хIазынхара атахъыпI», – зымгIвадзугьи аквгIазшIиттI Барцыц.
Ахъвлапын асогIа хъада
Эко-лекция аналга АААКи Colors of nations компании йайззаз зымгIва йыззымпшдзуз согIакI рзадыргалтI. Аджинсква зквпсаз ауатыкв (акция джвыкврымцIаскIва мчыбыжьквакIла апхъала АААК ауысхагIвчви Colors of nations анхагIвчви ауагIа йыртахъыхым аджинсыжвква азыркIкIуан – аредакция ррытаразга) абалерина шIа Апсава Диана дгIаталын агIвычIвгIвыси апсабари разазаъаща гIалырбауата дгIахIвытI.
Абалерина дпIатIаупхьадзагьи ауи лъахвтан шкIвокIвасышгьи лгьагьара шабгугьи лчгIвыча йацрахIваз ачырпIихвыцква йгIартыцIуаз йазалху ашвыга йцIанакIуан.
«АгIахIвра апсабара шхIырпIайуа уазнархъвыцуан. Ауи йгIанарбун хIара – хIпшдзата, хIгвыбзыгъата тшызбахуа – ансимшы апсабара зарарта йахIрадзауа хIшазымхъвыцуа», – агIахIвыща амагIны хIзыгIахъылтIтI Хагба Изольда.
Савилова Анна йгIацылцIахтI аджинсквагьи ауатыкв ахъазгIваца йшыкврымпсаз.
«Аджинсква ргIацIщтра апсабара зарар ду анарадзитI (апкъыгIвас адынхалща, асхъа ашвыща рылкIгIараква йгIарылцIла – аредакция ррытаразга). Момо, хIара ауи щардагIвы йынкъвыргауа ачгIвыча кIадрышвхныс йгьаквгIазшIыхIтуам. ХIара аджинсква йгIванхауата йгIарысабап йшауаш акIвпI хIызквчважвауа, уахьчIвагьи ауи шучпуш гIахIырбуштI. Арат аджинсква азхIкIкIыхта йапшым апкъыгIва пшдзаква гIарылхIхуаштI, ауат хIтйыхта йгIартныхIхуа ахча апальмаква рхчара йалахIцIуштI», – лхIватI ауи.
Акция аналга ауи рыцIа джьгарта йалакваз «Апсабара» экология жвлара адкIылара йалу Джениа Асанди Лейба Рамазани жвлала йгIадырйыз афиник пальма шIаква рыларшатI.
швталра йа тшаншвцIара атахъыпI.