Адуней апсуа-абаза конгресс апроект «АпхьагIвчва рдиспансеризация» апкъ йтата асквш 2024 агIан йгIванхауата йъацаз апны зджьара йапшымкIва нхара ду акIвдыршатI.
Хвтаба Алиса
А-Конгресс анхагIвчви апсуа айъазагIвчва ргвыпи Басариа С. йыхьыз зхъу Очамчыра апхьарта-интернат апхьагIвчва рзгIвадара абгата йдырхъвыхра ахъазла къарута йрымаз адыргалтI. ЙшцIасхаз апшта, гIвхъвыкIта йалу адиспансеризация аща аннарахвуа амши дара ацIайква йанырпшуа амшила йалапI. Ари азын архъвыхраква хымшкI йакIвшатI, йауа ухIварыквын, анахьанатква рпны апхьагIвчва рпхьадзара 100-150 акIвызтын йнадзуз, араъа ауат рыцIа йщардагIвыпI. АпхьагIвчва 450-гIвы зуыс бзита йыздыруа аъачIвагIагIвчва гIарпшырныс, рзгIвадари рпсихологии рыхъазла йызмыртынчуа азцIгIараква рыртта джьауап рауныс лшара рауын даргьи ауи гьагIврымщттI.
Ари ауыс апны ркъаруква адыркIылтI згIвадарахчара а-Министерства йапшым аъачIвагIагIвчва – аофтальмологква, акардиологква, алор-айъазагIвчва, аэндокринологква, асаби врачква, аневрологква, аурологква, ультрабжьыла азгIва щаквзыргылуа аъачIвагIагIв, ареабилитологква.
Апроект адгалагIвчва йрыуазаджву арыпхьарали жвлара джьгаррали згIвадарахчарали АААК ахъвшара (ОСАЗ) аъачIвагIагIв Хьышба Науыр адиспансеризация шакIвшаз гIахIайхIвтI:
«ХымшкI руацIа апхьарта ъачIвагIагIвчва щардагIв гIайтI. ЗымгIва шалу адиспансеризация айъазагIвти медахщчвати 35-гIв раъара, сабита 350-гIвы райхIа, арыпхьагIвчвата 100-гIвы раъара алан. АйъазагIвчва рзаман къытпI, хымшкIла рынхара йгIакъвударныс баргвыпI. Ага ауаса йаъазтынгьи, зымгIвагьи апроект йацыркIтI – Анчва дырзыразхатI. Ауат азаджв азаджв дипсахуан, йаъапI ахымшкIгьи тшзымпсахуа йынхаз. Ажва аламкIва, ауи аъара нхара гьхIзакIвмыршушызтI йхIыцызкIыз айъазагIвчва ракIвымзара, уагIа пщышвыгIв райхIа рща зырхъвыхра атахъхаз алаборатория амчыбыжь шабгаз шIас амамкIва йнымхазарквын, згIвадарахчара а-Министерства – кIьыда-кIьыда йгIалскIгIапIта: Бытба Саида, Гуниа Есма, йара аминистр Бытба Эдуард Валерьян йпагьи дрыцта – йгIахIцымхърагIазарквныз. Йара ауи апшта хIырзыразпI Очамчыра апны хIанзыргIалыз, айтыпараква хIзадызгалыз арайон ахъада Бигвава Беслан Владимир йпи Перцхелиа Беслан Дмитрий йпи», – йгIаликIгIатI Хьышба.
Апхьарта-интернат апны саби 450-гIвы райхIа апхьитI. Ауат йрыуата 130-гIв ашвахьа йгIашIарышвта ахвашадза апхьарта йгIанхалитI. ЙаъапI араъа атгIачва къвльайсызква йгIарылцIыз цIайгьи. Апхьарта-интернат адиректор Ашуба Белла йшылхIвауала, асабиква йаназаману рзгIвадара аъаща дырхъвыхырныс лшара гьраулум.
«Апхьарта апны медпункт нхитI, хмедахщакIи айъазагIвкIи хIымапI. Аинтернат йыцIу ацIайква рщардагIв айъазагIвчва гIарпшра ахъазла зджьара йгьзыцум, йчмазагIвхарыквын йатахъу хьпшра гьрауам. ЙаъапI баргвыта йбзазауа, 3-4-5-8-гIвы сабичва зму атгIачваква. Ауат зымгIва йгьырзыхьпшуам. ЙаъапI асабиква андучви абадучви йъархьырпшыру атгIачваква, йа аны дызмамкIва аба йхъазы йыгIзауа. Ан даъазтын – ауи асаби дыззыбжу, дчмазагIвзапытызтын йылбара атахъыпI. Андучва ауи рыцIа йырчвыбаргвпI. Анчва дырзыразхатI Апсуа-абаза конгресс аунашвачпагIвчвагьи ауысхагIвчвагьи. Ажвала йгьузыхIвушым ауат псапата йгIаргыз. ЙахьчIва сабита йхIыму зымгIва йгIарпшытI ухIва ауаштI. Йджьасщун ахвыцква йгвыргъьачIвауа айъазагIвчва йшрызцуз. Ща анрылырхуазгьи йгьымшвузтI. АйъазагIвчва ацIайква швабыж йрызгвапан. АпхьагIвчвала йгIанымхауата арыпхьагIвчвагьи йырпшытI. Анчва дырзыразхатI зымгIвагьи. Анчва згIвадара швиттI, хIпсы йапшу айъазагIвчва! Сара заджвыла апхьарта апны йцIыхъвахауата диспансеризация анаъаз гьсыздырхуам», – лхIватI адиректор.
Очамчыра район апедиатр хъада Голандзиа Алиса АААК апроектла йакIвшауа адиспансеризация ужвы гьакIвым дангIалал. Ауи ауыс зквугьи атгIачваква раъащагьи бзита йылдыритIта ари йапшу ауысква магIныта йрыму гIалгвынгIвитI.
«ХIанырпшра амщтахь закI зцрыхъуата йыгIбауа йазалху аъачIвагIагIвчва гIархьпшныс йырзыхIщтийитI. Апхьарта-интернат апны диспансеризация щарда цIитIта йгьрымчпасызтI, рсабиква знархарала йапшым айъазагIвчва йгIархъыкIвырдашарныс зымгIвагьи лшара гьрымам, араъа дара аъачIвагIагIвчва хIызгIайтI, ауат щардагIвыпIта – лшара гIальамат хIаутI», – йгIалылкIгIатI ауи.
АпхьагIвипхьадза аъачIвагIагIвчва дшгIаркIылсыз зну медицина кIарт йырттI, айъазара йазыбжаз рпны айъазагIв йзыгIайгIвыз айъазащагьи анырцIатI.
ХымшкI руацIа адиспансеризация шакIвшаз даквчважвауата апроект адгалагIв, ОСАЗ аунашвахъцIагIв Хагба Изольда йгIалылкIгIатI:
«ХIгвы йасуата араъа чмазагIвыта йгIацIцIыз рыцIа йайхIапI, ауаса ауи гIаугвынгIвуаштагьи йаъапI – араъа ацIайквагьи щардагIвыпI. Эндокринологияла кIара зхьуа гьмачIгIвым – ахIвссаква йшхвыцугьи гвал рымапI; аурологква зчIачIаква хIахъвы таначпаз зджьакI гIараутI, йаъапI чIачIакI ахIа змам, датшагьи згIваквакI зхьуа; офтальмологиялагьи угватра ззынаумырхакIва йамуаш зджьакI аъаквапI, йрылапI асабиква згвы анхаща тамамымкIва йгIадрийызгьи. Ауат райхIарагIв уыжвгIандзара кIара рльажьатагьи йгьрымдыруазтI, хIгвыгъитI ужвы йрыхьуа тшазырдырта айъазагIвчва гIархьдырпшуашта. ТгIачваквакI рбзазаща шбаргву гIдыруанта – йара араъа йатахъыз ахъвшвква рызгIахIаутI».
Хагба Изольда ари апроект ду архъйара йапщылу зымгIва дшырзыразугьи лхIватI, дзачIвызлакIгьи йуыс айгвыгIвра ду йылата дшадгылуа гIалылкIгIатI:
«КIьыдата ажва пха рзысхIвара стахъыпI айъазагIвипхьадзагьи ауат йырцхърагIуз медахщапхьадзагьи. Арат ахымшкI руацIа асабиква гватра ду рзалызхыз, згвы апхара асабиква йрызтуамцара диспансеризация акIвзыршаз зымгIвагьи. Асабиква рзгIвадара – ауагIахъа йырзгIвадарапI. Аразыра ажваква рзынасырхара стахъыпI ари ауыс апны рахIа мчыта йхIыцызкIуа, йагъьу аъачIвагIагIвчва хIзыгIазщтиуа ареспублика азгIвадарахчара а-Министерства. КIьыдата хIшырзыразу расхIвитI апхьарта-интернат аунашвачпагIвчвагьи анхагIвчвагьи – чхIарата, гвапарата, сакърата йгIадырбаз ахъазла. Ажва гьалам, сырзыразпI зкъару абгата ари ауыс йадызгалыз АААК анхагIвчвагьи».
Адуней апсуа-абаза конгресс ари апроект асквш 2023 мартI агIан йджвыквнажьтI. Адиспансеризация Апсны акытква рапхьартаква рапхьагIвчви рарыпхьагIвчви йнардзу медицина цхърагIара шрадзуш йазынархапI.
швталра йа тшаншвцIара атахъыпI.