Барганджиа Саид

Апсны апрезидент Бжаниа Аслан асквш 2020 июнь а 12 агIан Апсны Республика абзазагIвчва рзгIвадара акоронавирус шIкIгIара COVID-19 йачвхъыхчара йазынарху амаль кIьыдаква рнахвра ауысла Щаквыргылра шIыц мачвы ацIайцIатI.

Июнь а 15 йгIашIарышвта акъраль ауацIа ашIакIра амальква рщарда нырххитI, уагIа щарда злу айззараква ракIвыршара йазынархугьи рылата. АсабигIзартагIвацаква ракIвпI йнымхуш.

Июль а 1 агIандза Россия йгьи Апсны ркъральгIвына хъысыртала Апсны Республика аталра ауысла ашIакIра амальква рзынархапI агIвымакъраль къральгIвчви къральгIвра змам агIвычIвгIвыскви. Ащаквыргылра йшгIанахIвауала, уахьчIвала Апсны йталырныс йахвитпI Апсны Республика апны аккредитация зму адипломат нхартаква рынхагIвчва, Апсны Республика апны йаныргIалу акъральгIвына хчарала Россия а-ФСБ аунашвахъцIарта акъвырльыкъвхагIвчва, ЙадкIылу Россия архъв акъвырльыкъвхагIвчва, акъральква йырбжьаныкъвауа ахIатланкъвгага транспорт анкъвцагIвчва, айха мгIвала йныкъвауа ахIатланкъвгага гъбаква рмашинистква.

Йара ауаса асквш 2020 июль а 1 атшындза йхъгIвазлуштI акъральгIвына хъысырта апны пошлинадъа ахвгIахвтра йазалху аткванква (дьюти-фри). Йара ауи агIандза Апсны Республика асасыртаква, атшпсщартаква, атшпсщара тыдзква рпны пасата йрыбагъьахауа атыпква ркIра ауысла хвитнагIа гьаъам.

COVID-19 згIва ъаныкъвауа акъральква йгIартыцIта йгIайхуа Апсны акъральгIвчва гIашIаркIыта 14 мшкIла йдыркIьыдарныс йрыхъвдаквпI ари ауыс знархару акъральыгIва нхартаква.

УахьчIвала йгIахвта Апсны апны коронавирус шIкIгIара шгIарахвызла йгIадрыбергьыльтI 37-гIв, ауат йрыуата 27-гIв бзихахтI, азаджв дпсытI. Гвдауыта къала аквта чымазагIвтара апны айъазагIвчва 9-гIвы йрайъазитI. УагIа 481-джв Согъвым йтагылу «Айтар» сасырта апны гIвымчбжьа руацIа йырхъпшылуата йаъан. УахьчIвала ауаъа 16-гIв гIанхатI.

КIавкIаз апны COVID-19 тшшауацIнахуа гIазырбауа астатистика тшахаргIваза йауаштI абари азцагала>>