Адыгейшта ауагIа гIахIвра акъральыгIва академия ансамбль «Нальмэс» гастроль рымата Апсны йгIайтI, йцIыхъвахауа рконцерт йауацIыхта апрель а 12 атшын Гвдаута апны йгIадырбуштI.
Апсны апшыгIвчва бзи йырбауа йбергьльу Адыгейшта ауагIа гIахIвра академия ансамбль «Нальмэс» Апсны апны йакIвдыршауа агастрольква йрыланакIуата Согъвым апынгьи Ткъварчал апынгьи йгIахъвмартI. Артистква Очамчыри Гвдаути рпны йарауаса концерт артуаштI – апрель а 11 йгьи апрель а 12 рагIан.
Аконцерт программа 16 гIахIвракIла йалапI, агIахIвыгIвчва уагIа 80-гIвы йнадзитI.
«АгIахIвра йаквыргIапста асцена апны зынла йацгIаквлитI гIахIвыгIвчва 50-гIв йа 30-гIв. АгIахIвраква анхIыргылуаз хIрыдгIапсалтI, ауаса апшыгIвчва йшыргвапхуш апшта йадгалапI. УахьчIвала хIпрограмма хIпсахтI, Апсны апны йрымбас агIахIвра шIыцква хIыцгIагIгтI. Апрограмма йалапI сквшы 25 раъара «Нальмэс» йгIадмырбахуаз агIахIвраквагьи, ауат шIыц-шIыц йгIащаквхIыргылхтI», – йхIватI агвып рыршIыйара унашвачпагIв Хаджаев Аслан.
Адыгейшта ауагIа гIахIвра акъральыгIва академия ансамбль «Нальмэс» асквш 1936 агIан йгIаншатI. Асквшква 1941-1945 рагIан Абашта айсра Ду анакIвшуз ауи анхара ашIадрыстI, айсра алгата жвасквша анцIы анхара атаджвыквырцIахтI. Асквш 1996 агIан ансамбль йырквнадыргатI Адыгей Республика артшхъвага «Адыгейшта а-ЧIахIра». «Нальмэс» – адыгьа культура знархарата Къабард-Балкъар акъала хъада Нальчик апны йакIвшуз I Адуней фестиваль йалауреатпI. Йапшым асквшква рагIан ансамбль йарауаса Трыквшта, ЙадкIылу АгIарып Эмиратква, Сирия, Бельгия рпны йакIвшуз фольклор гIахIврала адуней анкъвакъвраква йырлауреатхатI.
швталра йа тшаншвцIара атахъыпI.