Адуней апсуа-абаза конгресс, «Асабихъа адуней» гвчIагIвчпара фонд йгьи «Турист» компания Гагра район апны гIари щардагIв зму атгIачваква рсабиква Апсны акъала хъада апны Асквш шIыц дыртлапIарныс йдрайгватI.
Кирвал Камила
Асквш 2022 агIан йапхъахуз агвчIагIв уыс Адуней апсуа-абаза конгресс асабикви саби щардагIв зму атгIачвакви йырзынанархатI. Саби 36-гIв йнадзуз агвып ран-рабачвагьи рыцта январь а 11 амш шабгаз СогIвым апны йыргатI, ауаъа йанцузгьи «Апсны» этнопарк йдырцан шIыцра щарда ддыргIатI.
Ажвлара рабадыррала АААК аъачIвагIагIв Хагба Изольда йгIахIгвалалыршвахтI а-Конгресс гвчIагIвчпара нархара зму апроектква щардата йшаднагалуа йгьи йшрыцIагылуа, ауат асабиква йырзынархазтын – «рахIагьи йшрайгвыргъьауа».
«Акъала хъада амзагIв цIла агьагьара апны агвыргъьахъв Асквш шIыц гIатамылскIва йадыгIгалуашын, ауаса акция йалазара атахъкваз рызджьакI ъачмазыгIвхаз йгIалцIла йатхIрыпара атахъхатI. Йара йахьчIвагьи асабиква зымгIва гьызгIамитI, ауаса йаъамыз рыхъазгьи асогIа хъагIаква хIрыхIазырын йырнапIыцIахIыршвахуаштI. Сшхъвыцуала, ацIайквагьи ан-абачвагьи амш ргвы йгIатахушта йыргатI, ргвы пшыхь тадрыстI. Ауат джьащахъварта щарда йаъан, согIа рыквшватI, адзытшпурам апны ачарта йыгIвначIватI. Араса рыла дырпшырныс лшара ауат ансимшы йгьрымам. ХIара хIыхъазла насыпра дупI гIари щардагIв зму, зтахъы намхъауа атгIачваква йрыуу асабиква ъахIзыргвыргъьаз», – лхIватI Хагба.
Амш апрограмма уыс щардала йырчвын, кIара узырдыруа, закIы уазызбжьауа анйаракви айчважваракви алан. Акъала хъада амзагIвцIла адзхъа йгIадырбаз Асквш шIыц йазынархаз аргылчIв йапшра йахъазымкIва ацIайква СогIвым Акафедра кьльиса ду йцатI, ауаъа Апсны Православ Кьльиса ахъада – аиерей Аплиа Виссарион йынйатI, согIа гIарырттI, бжьагажва, хIвахIвра щардагьи ргIатI. Ауи акIвымкIвагьи асабикви ан-абачви Артшхъвара апарк апны йгылу ачвахъабага син хIврапшдза азыщтIарцIатI, ауат Айсра Ртшхъвара амузей апны йгIамдатI, ауаъа айсра йапщылаз апкъыгIваква йырпшытI, айсчва рхъацIара ахабарква йрыздзыргIвытI, Апсны йапхъахуз р-Президент Ардзынба Владислав йгIайыквчважватI, ауи апхьарта даныцIаз йыздыргылыз агIарбагаквагьи ддырбатI. АпхьагIвчва рыуа азджьакI ауи йаргвышхван даргьи «хвбагIвацала» йапхьарныс ныха рхIватI.
Ари ауыс адызгалыз йрыуазаджву «Асабихъа адуней» гвчIагIвчпара фонд аунашвачпагIв Ашуба-Хагба Людмила амш шцаз даквчважвауата ауи «йшахъазгIваца ларпшрамыз – кIара узырдыруа йшгIамдаразгьи» гIалылкIгIатI.
«ЙахьчIва хIара СогIвым хIгIайтI, ауаса йхIылшазарквын асабиква Апсны шабгу дхIырбушын – ауи аъарала йыргвапхан. ХIара ари акция йацызкIыз зымгIва хIырзыразпI – а-Конгрессгьи, атурист компаниягьи. Асабиква зквчIваз автобус АкъральыгIва автоинспекция анхагIвчва ацын», – лхIватI Хагба Людмила.
Агвып мгIва йъадзаквыз ауат йапшым атурыхкви ахабаркви райхIвуан «Турист» уагIахъа турист компания анхагIвы Карнецян Арменак. Ауи йшихIвауала, агвып йрыуата шIыцраквакI здырра зтахъыз щардагIвын.
«Апхъапхъа зымгIвагьи такIв тштарщахIауа йаъан, уацIыхъван йрымагIальаматхауа, даргьи рыцIа-рыцIа йкьахвхауа йалагатI. ХIара ари йапшу апроектква йанакIвызлакIгьи хIгвыргъьауа йрыцхIкIитI», – йхIватI Карнецян.
Хециа Апсуана лтгIачва ажвгIвысабичва рпны дахIбапI. СквшквакI цIуата ауат ран дырхъышвттI, айцIбачва рыгIзарагьи апхIвыспачкIвын лыхъвда йгIаквылтI. Ужвы ауи луыс рыцIа ймайрахатI: ларгьи швапха лырхIахьатI, ахвыцквагьи тIакIв йрылахIан ауат рыуа рыцIа йахIбаквугьи гIалцхърагIауа йцатI.
Аныдъа йангIанха Апсуана лгвы гьлымрыдзтI, Гагра апны техникум дыцIалын айъазара тшазылбжьитI. АпхIвыспа атехникум дгIалгата лъачIвагIала нхарта гIалауырныс лгвалапI.
«Анчва дырзыразхатI зымгIвагьи, Адуней апсуа-абаза конгрессгьи рылата, йанакIвызлакIгьи йъахIыцу, йахьчIвагьи ари апш гвыргъьахъв пшдза ъахIзадыргалыз ахъаз», – лхIватI ауи.
Микаэль – СтепанянргIва ртгIачва апны дквтанайпI, хвбагIвацала дапхьитI. АчкIвынхвыц агвыргъьахъвгьи агIамдараквагьи швабыж йгвапхата йхIватI.
«Ари ауыс хIзадызгалта СогIвым адуней джьащахъва хIзырбаз зымгIвагьи Анчва дырзыразхатI», – йлахIвараква хIыцагIвишатI апхьагIв.
Адуней апсуа-абаза конгресс анхара апны асабиква, саби щардагIв зму атгIачваква, акъвльейсызква йырзынарху агвчIагIвчпара проектква йанакIвызлакIгьи гватра ду рзалхпI. Асквш 2021 атыцIымта АААК анхагIвчва Гагра арайони СогIвыми рпны Асквш шIыц ахьызла фачIвы ршатI. Йара ауи агIан акъала хъада акIьадыгвкI апны АААК асаби хъвмарырта ауыхвара алнаргатI.
Молодцы!
швталра йа тшаншвцIара атахъыпI.