13361

Адунейла апсыуа-абаза уагIа ъатабзазауа акъральква йгIартыцIыз спортсмен 300-гIв райхIа Къарча-Черкес апны йакIвшауа «Абаза» фестиваль йгIадгылтI.

Апсыуа-абаза хъвмарраквала йгIахъыртIытI Йхвбахауа акультура-спорт фестиваль «Абаза». Афестиваль сынчIва йацадыргалтI Абаза-апсыуа уагIахъа ртшауацIыхра ацхърагIара знархару Адуней адкIылара «Алашара» йгьи Адуней апсыуа-абаза конгресс (АААК).

Аспорт гвыпква анкъвакъвуан махъырыхъварала, амшI щъа ахъалрала, парала, хIатлащтIыхрала, хIахъваущтрала, гIврала апхъанысрала, анашанаква райхсрала, аркъанахърала, ауи акIвымкIва футболгьи волейболгьи йрыстI.

Абаза уагIа хъвмарраква сынчIва йхвынхауата йакIвшатI Къарча-Черкес республика апны. Ансисквша Россия йгьи агIвымакъраль шIыпIа шIыцква гIарыцIаркIуамцара анкъвакъвраква йгIарылалуа аспортсменква ъауу ахакв гIвынаква рыцIа-рыцIа тшауацIырхитI.