Гвдауыта район йаланакIуа Лыхны кыт апны АААК ашIыпIа хъвшара агIаджвыквцIарала йхътIу спорт тшыбжьарта – воркаут – дыргылтI.
АмичIба Амра
АуыжвгIанчIви спорт ъамапсымаква дыргылтI Шакърыл Платон йыхьыз зхъу Гвдауыта район йаланакIуа Лыхны кыт апхьарта апшцIа апны АААК ашIыпIа хъвшара йалакву ргIаджвыквцIарала.
ЙхътIу спорт тшыбжьарта – воркаут (ангьльыз бызшвала workout – «тшыбжьара» – аредакция ррытаразга) адгалрала АААК агIаджвыквцIара акыт абзазагIвчва йацыркIтI. АшIыпIа хъвшара ауанашвачпагIв ЛакIойа Вадим йшихIвауала, аъамапсымаква злархвгIаз ахча ахъвыкI а-Конгресс йазалнахтI, ауахьауат Лыхны абзазагIвчва дара-дара йазыркIкIытI.
Йдыргылыз атурникква зымгIва акыт ажьира апны йырчпатI. Ауи зчIву Хагба Зураб атурникква аъазара шатахъу асуратква гIайыртта ауыс зквугьи ангIайгвындыргIвы анхара дадгылтI.
«Йсыцынхауа спа Алиаси сари хIара-хIара зымгIва абыхIттI. Айхата (айха йгIалху трубата – аредакция ррытаразга) метр 100 аъара агатI», – йхIватI ауи.
Гвдауыта апны йгIаныршу АААК ахъвшара аунашвачпагIв ЛакIойа Амра ажьи йуыс йнардзата йшйырхъйаз гIалылкIгIатI йгьи йгIахIгвалалыршвахтI а-Конгресс ауи апхъалагьи Зураб йшйыдгылхьаз. Ажва ахъазла, ауи йчпата АААК Гвдауыта апны йдыргылыз анышвкъваратапсартаква «ужвы йъагIадзазгьи йахьчIва йырчпагIвацазшва йгыларкIвапI».
«Воркаут аъамапсымаква хIазырта йхIхвгIазарквын агIагхрагьи шалу агалагьи рыцIа ахча щарда агушын. ЙгIазлыху йамгIанайхугьи Анчва йакIвын йыздыруашыз. ЙухвгIауа ласы йптшитI, араъа ажьира апны йшынхауа хIыла йыцIапI», – йгIахIгвынлыргIвытI ауи.
ЛакIойа Амра лакIвпI ауи апхъала Гвдауыта абзазагIвчва йаларпсаз ахчала уагIа щардагIв ъабзазауа акъала ахкIьадыгвкI рпны ахIбачва рыхъазла воркаут адгалра ауыс гIалазгаз. Лыхны йауу ажвлара уысхагIвчва ауи апроект бзира алата йырбан даргьи алагатI.
Лыхны апхьарта апхьагIвчва пычIв айсра дырра рызтуа Хагба Нодар аспорт тшыбжьарта йара йырцауа апредмет апынгьи йшгIарыхъвауа гIаликIгIатI.
«Къарула ахIвынчIараква, айсра уысла йалакIу анкъвакъвраква, апрагылаква рхъыпара агьиква – йшалу аъамапсымаква жвыгIвын хIрыдгылитI, – йгIашIипхьадзатI арыпхьагIв йгьи йгIаликIгIатI асабиква амаль амамкIва ркъару йаздырхIара шатахъу. – Спорт тшадукIылуазтын угвы урыбагъьитI. БзипI ари йапшу ауысква рпны йуыцызкIуа, АААК йапшу адкIылараква шаъу».
Воркаут аргылра Лыхны кыт апны АААК ашIыпIа хъвшара йархъйаз йхпахауа проектпI. Ауи апхъала араъа дара ркъарула Абашта айсра Ду йаладзыз ркытлагIвчва рчвахъабага агьагьара алдыргатI, ашварахъва драшватI, асин дрыцкьан йыршвыхтI, йчвадахата йалуымбгIахуаз ахьызква гIадыршIыцхтI. Йара ауи апшта уахъынла мза ъамкIкауа акыт амгIва апны агIарбагаква анцIара ауыс «Абхазавтодор» аунашвачпагIвчва рпахь йгIащтIырхын йддрычпатI.
Апсны апны йгIаныршу Адуней апсуа-абаза конгресс ашIыпIа хъвшара 42 рынхара йалкIгIара хъаду акытква рбзазагIвчва рбзазара агъьхара ахъазла дара йрылшауа шырчпуш йаквыргвышхвара акIвпI, йгIахIгвынлыргIвытI АААК апхIвыс советква рунашвачпагIв Ардзынба Гета. Ауи йшылхIвауала, хъвшарипхьадза анхара йара алкIгIараква амапI, азджьакI а-Конгресс ацхърагIара рыцIа щардата йазыбжапI, азджьакI – рыцIа мачIта. Лыхны кыт ашIыпIа хъвшара йалакву рахIа йджьгаркву йрыуапI, рынхара бзита йадгалапI, руыс рдыритI йгьи дара-дара йырзырхъйитI.
«Лыхны ашIыпIа хъвшара злагIалукIгIуш анхара бзита йъадгалу акIвпI! ХIацыта проекткI гIалагIгата йгIацIанакIуаш аналхIыргара ачкIвынчва зынла ауыс йацIагылитI. ХачIвы лырхитI, агвып йырхъаршитI, ахчата йатахъхуш, зъара аларпсуш гIарпхьадзитI. Ауи йапшу адгылща йащату ауат рцри шта – зыхьыз атурых йалу ркыт – йазрыму абзибара акIвпI. А-Конгресс ашIыпIа хъвшарипхьадза анхара апны йыгIбара хIтахъу уазцIгIузтын – абарауи апш адгылщапI. Угвы йалахIитI ашIыпIа хъвшара йалу агIвычIвгIвыс йгвы шцхIауа, ауыс йкъаругьи йахчагьи алайцIарныс дшазыхIазыру, ауи ажвлара рыхъаз магIны шаму шгIайгвынгIвуа анубауа», – лажва налырдзатI Ардзынба Гета.
Ауи «агвып йрылубгIауа агвы амч» ахъазла ахъвшара аунашвачпагIв ЛакIойа Вадимгьи ауи йыцынхауа ЛакIба Никитагьи Вартагава Айнаргьи дшырзыразу ралхIвтI. Йара ауи апшта дырзыразпI ауи воркаут аргылра йацхърагIаз Лыхны апхьарта акласс ахIбаква рапхьагIвчва Гвыблиа Ануар, Герзмава Инал, ЛакIоба Леван.
Воркаут – апахь апны спорт тшазыбжьарала США рпны асквш 2008 агIан йгIаджвыквылта адуней шабгу апны тшауацIыхра зауыз субкультурапI. ТшауацIнахитI ауи Апсны апынгьи. Аворкаутква зджьара йгIанымхауата йкъвльейпI: ауат афитнес-клубква йа агимнастика пещква рапш сахIатла йгьынхум – амчыбыжь абыжьмшкIгьи уахъгьи тшынгьи узадгылитI, ахчагьи гьазутиуам. УахьчIвала Апсны апны АААК алата пщворкауткI гIахъыртIхьатI.
швталра йа тшаншвцIара атахъыпI.