АААКи «Алашара» жвлара адкIылари апсуа-абаза уагIахъа ргвбайара йазынарху апроект шIыц "Амазара" джвыкврыжьтI.
Адуней апсуа-абаза конгресси "Алашара" дуней адкIылари апсуа-абаза уагIахъа ргвбайара йазынарху апроект шIыц "Амазара" (апсуа бызшвала "йазкIкIу байара, абайара ахчарта" гIаныцIитI – аредакция ррытаразга) джвыкврыжьтI. Ауи гIазхъвыцыз АААК ЙхIаракIу асовет аунашвачпагIв Эгьзакь Мусса йакIвпI.
Ауи йшихIвазла, апроект шIыц хIахIбачва сквшышвпхьадзара йгIанкъвыргата йхIызгIаныржьыз агвбайара апшдзари ацIолари абаза уагIагьи анахьанат ауагIахъаквагьи йрыуу дзачIвызлакIгьи йнарбарныс йаквгIазшIытпI. Эгьзакь Мусса йшипхьадзауала, ауи апсуа-абаза уагIахъа йгIарыцIанакIуа зымгIва – йъабзазалакIгьи – йаднакIылуаштI.
"Апроект апсуа-абаза уагIахъа ргвбайара тынха уыжвгIанчIви интернет амальквала ауагIа йшрыланагуш йазынархапI. АуагIахъа зымгIва йрапхъата йызлардыруа рыбызшва, рцIаскви рхабзакви, ргIахIвыща, рмакъымква, апхъазаман йгIашIарышвта йызлаз анхараква, анапIылачпараква ракIвпI. ХIара хIпахь хачIвыта йхIыргылитI ауатква зымгIва тшауацIдхIрыхта йхIыщтагIайуаш абанпараква йрызгIаныгIжьырныс", – ауыс зкву гIахIгвынйыргIвытI АААК аунашвачпагIв.
Апроект ахьыз даквгIашIастI АААК ахабарргарта портал аунашвачпагIв Лазба Амина.
"Ауи апш проект хIырхъйарныс ауатыкв йангIатал ауи амагIны гIанарбауата, йгIаныцIуа цIолата, зынла йугвнукIылуата, анахьанат абызшваквалагьи майрата йузыгIвуата хьзыкI азгIахъвыцра атахъхатI. ХIара хIшгвыпу хIалалын ауи апш ажвата йхIыму хIазхъвыцуа хIалагатI, йаргьи апсуа ажва пшдза "амазара" хIаквгIашIастI – ари ажва апроект хIуагIахъа рахIа байара дута йрыму хIкультура тынха йахчартата йачпитI", – йгIалылкIгIатI Лазба.
"Амазара" проект йаланакIуата йапхъахауата уыздынхалра атахъу тынхата агIахIвра гIалырхтI. АААК ауысхагIвчва ауыс бзита йыздыруа аъачIвагIагIвчва рыцта апсуа уагIахъа гIахIвыщакI уыжвгIанчIви чпаща артын видеота йхъырхтI. Аролик АААК ахабарргарта порталгьи адунейла йбергьльу аинтернет тыпквагьи йгIартарцIуштI. Ауи акIвпIта, хIгIахIвыща дзачIвызлакIгьи дзапшуаштI.
АВИДЕО ПЫЧIВТА ОКТЯБРЬ А 21 ЙГIАДЫРБУШТI. АСАЙТ ШТШГIАНАРШIЫЦУА ШВАПШЛА.
Ари агIаджвыквцIара надырдзара ахъазла Апсны апны йбергьльу арежиссерква, авидеографква, агIахIвчва, амакъымршIыйагIвчва тшадыркIылтI.
Йапхъахуз агIахIвра анхъырхуаз дрежиссерын йбергьльу апсуа кинематографист КIвакIваскьыр Тимур. Ауи йшихIвауала, йаргьи ауи апш видео ахъихырныс щарда цIуата йгвы йтан, ауаса "йнапIы гьазынамдзузтI". Арежиссер йыхъазла йалкIгIу магIны аман апсуа гIахIвыща уыжвгIанчIви фгIвы ахърыхIара.
"Аролик аинтернет тыпква, асоциал сетьква рпны акIвпI йъатарцIуш. Интернет айхIарала йту чкIвыныргIа ракIвпI. Ауаса йанаъазара, хIуагIахъа фольклор ашIаква рыбызшвала "узапхьауата", апхъа заман йгIатгата уахьчIва хIымш йазгIагра атахъхатI. ЙхIазырхаз аролик уапшрыквын апсуа уагIахъа фольклор ужвы хIзаман йшазгIайуа узыбитI", – йхIватI КIвакIваскьыр.
Аролик ахъызхыз йгьи йабызтхуа ЦIырцIымиа ДжаникIо унашва зхъицIауа «Media 3» продакшн компания анхагIвчва гвып ракIвпI.
"ХIара хIгвбайара тынха гIащаквыгIыжьта ашIара йрызгIаныгIыжьхра йахъазымкIва адунейгьи йдхIырбара атахъыпI. Ауи хIара йхIборчта йспхьадзитIта акIвпI ари ауагIа рыхъаз магIын ду зму ауыс хIзалу", – йхIвитI ЦIырцIымиа ДжаникIо.
АгIахIвра аргылра хгIахIвчвагвыпкI гIаланакIтI: уагIахъа гIахIврали ашвахIварали гIатгара зму Апсны Республика АкъральыгIва ансамбль, Тарба Къандид йыхьыз зхъу уагIахъа гIахIврала "КIавкIаз" къральыгIва ансамбль, Бебиа Эдуард йыхьыз зхъу уагIахъа гIахIврала "Шаратын" къральыгIва ансамбль.
АгIахIвра ъадзахъырхуаз амшква зымгIва ахъыхырта даъан "КIавкIаз" ансамбль ршIыйарала аунашвачпагIв Тарба Арвелод. Ауи а-Конгресс "Апсны ахъаз ари апш магIын ду зму ауыс" ъагIаланагаз дшазыразу йхIватI.
"ХIара кьангьашракIгьи гIахIыламшвауата хIуысква зымгIва гIвынакIла йнахIрыскIьатI. Ари апроект хIреспублика адуней шабгу йднарбуштI. Ауи апш магIны зму апроект йацхIымкIкIва йшпаурыз", – йхIватI "КIавкIаз" аунашвачпагIв йгвып ари ауыс йызгIалалыз азцIгIара джьауап айтуата.
ЙызлагIахIвуаз амакъым йадынхалтI Апсны апынгьи ауи утыцIтагьи зыхьызква рдыруа амакъымршIыйагIвчва Гвымба Анрии Агрба Тимури.
"ХIара хачIвыта йхIыздыргылтI апсуа, адыгьа быжьква гIахIрысабапырныс, трыкв быжьквакIгьи алахIцIарныс. ХIара йшхIылшуз апшта ауат зымгIва аццауата, уыжвгIанчIвитагьи йгауата йхIчпатI. ХIара йхIтахъын акомпозиция ауыжвгIанчIви ашваква йрыцахъырныс, ауаса афольклор щата амрыдзырныс", – йхIватI Гвымба Анри.
ЙгIвыджьхауа амакъымршIыйагIв Агрба Тимур ари ауыс дадгылра апхъала ауырата дхъвыцтI: ауи ауагIахъа макъымква руыжвгIанчIви асща сакъта дадгылитI. Ауаса апроект йалакву дзачIву анидыр ауат йрызхъайцIан йаргьи агвып дрылалтI.
"Мцы залайа – сара ауи йапшу аэкспериментква бзи йгьызбум, ауи акIвызтIхIва ауи апшгьи адуней йыквызларныс йахвитдзамкIвагьи йгьаъамта – садгылтI", – йхIватI Агрба.
Аролик Апсны акъральыгIва театр апны йхъырхуан. Атеатр адиректор ажвлара рыцынхарала йтарагылыгIв Тыжба Щарида йшгIалылкIгIазла, а-Конгресс апроект алалра ауысла тшангIарзынанарха атеатр аунашвачпагIвчва йнамкIгIамкIуата зынла ауи йацыркIтI.
"ХIара хIыхъазла швабыж магIын ду амапI хIкультура йъауаш апны йшгIарбазлуш – интернетгьи алата. Са сгвыгъитI АААК апроект аунашва адуней шабгу йырдыруашта, апсуа гIахIвыщагьи рбушта, уызгIвымсхыз театр шхIымугьи рдыруашта. Апроект хIтехника нхагIвчва зымгIва алан ухIва йауаштI. Йара акIвпIта, ачкIвынчва райхIарагIв тшпсщара йаъан, ауаса заджвгьи "мо" гьйымхIватI. ХIаргьи ауатгьи, АААКгьи, ари апроект йапщылу зымгIвагьи хIырзыразпI", – лхIватI Тыжба.
Апроект далапI ауагIахъа фашала асуратчпагIв Чанба Мадинагьи.
"ХIкъраль шабгу ахъазла магIны зму ари апш апроект ду салалырныс тшангIасзынадырха саргьи ари ауыс схъвыкI аласцIарныс стахъхатI – акъральква зымгIва хIкультура рбара ахъазла", – лхIватI асуратчпагIв.
А-Конгресс анхагIвчва гвып апроект йацызкIыз зымгIва йырзыразпI, апхъахьылагьи кIара анхъырхуа йапшым аъачIвагIагIвчва гIадрыйгвалуштI.
Апсуа-абаза уагIа ргвбайара йазынарху Адуней апсуа-абаза конгресс "Алашара" дуней адкIылари рпроект "Амазара" апкъ йтата ауагIа рашваква, ауагIахъа литература, цри бызшва, анапIылачпаракви апхъанчIви цIаскви гIазырбауа ароликква ащтагIайуаштI. Авидеороликква Апсни Къарча-Черкеси рпны йхъырхуаштI.
швталра йа тшаншвцIара атахъыпI.