«Абаза» культура-спорт фестиваль апхъанчIви цIаскви ауыжвгIанчIвири адызкIылуа, апсуа-абаза уагIахъа рацзакIыра гIазырбауа гIаншарапI. КIара гIаныцIуата йаъапI афестиваль июль а 23 – Апсны АкъральыгIва баракъ андрыбагъьа амш – йъаджвыквырцIауагьи.
Базба Селма
СквшигIадза, абар 11 сквша цIитIта, Абаза уагIа ргвыргъьахъв рыцIа-рыцIа тшауацIнахуа, йпшдзахауа, уыла аргвыргъьауа йгIамгIвайситI. Афестиваль Адуней апсуа-абаза конгресс ЙхIаракIу асовет аунашвачпагIв Эгьзакь Мусса йгIаджвыквцIарапI.
Йара ауи апшта ауи йаланакIитI Абаза уагIа рхъвмарраквагьи, ари азын ауат июль а 25 атшын Къазма апны йакIвшатI.
Афестиваль «АдзыгIвбжьа йачIва» парк апны йджвыквылтI. Араъа знархараквала йапшым, абаза уагIахъа ргвбайара гIахъызтIуа, рнапIлачпараква, рмацIауыща урыхазыргIвазауа агIарбартаква аныргIалын.
ЗымгIва ацIас бзиква йрыквыргIапсын: агIахIвраква, ашваква, анхагIвчва напIъазаква рджьармыкIьа, апсуа-абаза уагIа йрыуу щардагIвы ранйараква, уагIахъа фашала йгIвычата ауагIахъа баракъква знапIыцIу чкIвыныргIа ргIамгIвайсра – абараса акIвпI йшакIвшалауа Абаза уагIа ркультура амш Черкесск къала апны.
Агвыргъьахъв йгIалалтI сасчва щардагIв, ауат йрылан ареспублика абзазагIвчвагьи ауи асасчвагьи. Апсны йтыцIта ауаъа йцаз агвып йрылан Адуней апсуа-абаза конгресс агвып, репатриацияла АкъральыгIва комитет анхагIвчва – рунашвачпагIвгьи рапхъа дгыла, Апсны Республика АуагIа Райззара, СогIвым Акъала Айззара рщтийыгIвчва. Аконцерт дрыпшдзатI апсуа эстрада артистква. ЗымгIвагьи бзи йырбауа рашваквала апшыгIвчва дыргвыргъьатI «Апсны-67» ансамбль артистква.
Гвдауыта район Айззара адепутат Багателия Роман йбзирала йгьи АААК ацхърагIарала ауаъа йцатI Уатхара кыт авокал-ъамапсыма гвып. Асабиква рыхъазла ауи йапхъахауа гIвымакъральцаран, даргьи ауи йырзымчхIахуа йазпшуан.
Ахъвлапын гIаргванхауата афестиваль гвыргъьахъвыта йгIахъыртIытI. ЙгIайззаз сальам рархуата йгIачважватI КЧР культурала аминистр Агырба Зураб, ауагIахъа уысквала аминистр йапхъахауа йтарагылыгIв Эдиев Таулан, «ФАРН» асатин адкIылара аунашвачпагIв Хетагуров Олег, Апсны йауу датшагьи асасчва.
Черкесск апны йгIаныршу «Алашара» ауысхарта аунашвахъцIагIв Гьадыгв Мурат адкIылара апрезидент Эгьзакь Мусса йтшазынархара дгIапхьатI:
«Хвду ззызбауа сыгІвзачва, спсы йапшу сайщчви сахщчви! Ансисквшагьи хІара хІыщайдзаква тшырзынахІырхара хІтахъыта хІайззитІ. ХІара хІуагІахъа йапшым ашІыпІакви акъралькви рпны йбзазитІ. Ауаса хІара зымгІвагьи хІатгІачвакІпІ. ХІапхъанчІвиква рыбызшва нкъвыгІгитІ, хІтынхи хІцІаскви асабиква йрызгІаныгІжьитІ. Абаза – ауи абанпараква апызщылуа хацпІ, апхъала багъьата хІызщтиуа гвбайара щатапІ. Ауи уагІахъа щардала йалу Россия абайара йпшдзу йгьи йузалымхуаш йахъвыкІта йалитІ. ХІара йбайу культура ъахІыму хІхъа аладухитІ йгьи хІгвы хътІыта ауи зымгІвагьи йрыцагІвхІшитІ».
Йайщчву ауагIахъаква ращтаныкъвара рыбагъьара магIын ду шаму йацIачIвагъватI Адуней апсуа-абаза уагIахъа ащтийыгIвчвагьи. УагIа щардагIв азыздауа айззара ду алазара мурадта йаму гIайхIватI СогIвым йаъу АААК ауысхарта аунашвахъцIагIв Реквава Темур:
«ЙшцIасхаз апшта ансисквшагьи акультура-спорт фестиваль йалазларныс Апсны йтыцIитIта гвып ду цитI. ЙанакIвызлакIгьи апшта хIара йхIтахъыпI Абазашта йту хIайщчви хIахщчви рлахIвараква рыцагIвхIшарныс. ХIара хIыхъаз афестиваль зымгIва йрапхъата абабарапI, абадыррапI, ащтаныкъвара щаквыргылрапI, ащтаныкъвара рыбагъьарапI. Ари йапшу культура-спорт нархара зму айззараква хIмурад хIаззырцауа чIвырхъапI», – йгIаликIгIатI ауи.
Айззара йгIвбахуз ахъвы амфитеатр ауацIа йакIвшатI. «Абаза тынха» зхьзыз аконцерт апны йгIахъвмартI апсуа йгьи абаза артистква. ЧIыдахъвыла йтлапIу сасчвата йалтI «Апсны-67» йгьи «Абазинка» ансамбльква рашвахIвагIвчва.
Агвыргъьахъв анашх бзиквали йащтагIайуа асквш агIан атабабахра ауысла абаргвыгъараквали йалгатI.
Зхъа щтIазцIаз айсчва рчвахъабага син хIврапшдза азыщтIацIара
ЙащтагIайуаз атшын, июль а 24, апсуа делегация йалакваз Къарча-Черкес йтыцIта зтахъырала Апсны апны йакIвшуз айсра йалалта зхъа щтIазцIаз айсчва гIаргвалашватI, ауат рчвахъабага син хIврапшдза азыщтIарцIатI.
Аспорти ацIаскви рацзакIыра: Къазма апны XI Абаза уагIа рхъвмарраква шакIвшаз
Июль а 25 Къарча-Черкес йаланакIуа Адыгьа-ХIабльа район йауу ашта Къазма апны ХI Абаза хъвмарраква йауацIыхта йакIвшатI. Ансисквшагьи арат ахъвмарраква КЧР йауу абаза кытква йгьи Апсны Республика йыртыцIта ауаъа йцауа аспорт гвыпква адыркIылитI. Спорт академия йгьи «Алашара» Дуней адкIылара йадыргалыз ари ауыс уагIа зкьпхьадзара азнакIкIытI.
Анкъвакъвра тшазадгалра абзирала Къазма апны аспорт инфраструктура швабыжта тшауацIнахтI: акытква рбзазагIвчва ркъарула ахъвмарраква ъакIвшушыз ашта апны волейболасырта рчпатI, уыжвгIанчIви воркаут тшыбжьарта дыргылтI. РахIа йхвыцыз асасчва рыхъазла йадыргалыз атшпсщарта-хъвмарыртаква рпны ауат йтхаджьуа абатутква рпны йхъапалуан, датшагьи ларпшыга щарда рауан. Йаъан араъа йуфуш ъауауашгьи, амара тшъачвыкъаучIвахуашгьи.
Анкъвакъвраква рпрограмма 12 спорт квпшыракIла йалан. Ауат йрыуан футбол, волейбол, атлетика ласы, хIахъваущтра, пара, хрихыцаущтра, щъахъалра датшагьи. СынчIва йапхъахауата ахъвмарраква йрыларцIатI хвитта абакIрала анкъвакъвраква.
Апсны йауу аспортсменква ргвып драхIбан ашIыпIа хъвшараква рыцынхарала АААК ахъвшара аъачIвагIагIв Симониа Херсон.
«Апсны йтыцIта йцаз аспортсменква йрылан Лыхны кыт йауу афутболасчва, Цандрыпщ кыт йауу аволейболасчва йгьи абакIыгIвчва шIаква ргвыпква. ЙгIалкIгIара атахъыпI хвитта абакIрала анкъвакъвраква ахъвмарраква йапхъахауата йшрыларцIаз. Ажва гьалам, зымгIвагьи айгIайырныс рзыхIтахъпI, ауаса араъа йхъаду ауи гьакIвым. Ансисквшагьи хIара Апсны хIгIатыцIта араъа хIызгIайуа хIазазаъащаква йрызхIырхIарныс, апсуаква абазаква йрабахIырдырныс, хIуагIахъа адхIкIылырныс акIвпI», – дацIачIвагъватI Симониа.
СквшигIадзагьи ахъвмарраква зыгIвзачва йрыцызкIныс, зайщчваква йрабадырныс зтахъу пшыгIвчва швкIыгIвпхьадзара азырддалитI.
Щыбжьан аннадза анкъвакъвырта гвыргъьахъв фгIвы гIахъыхIатI – ХI Абаза уагIа рхъвмарраква гвыргъьахъвыта агIахътIра джвыквырцIатI.
ЙшцIасхаз апшта, ауи ахъвмарраква рсогIа хъада амдарала йгIалагатI. АпшыгIвчва рхъа ду йшырбахуа гIазткIкIгIуз рылаквала йырбауата йамдахауа аджьаз кубок цIыпх йтызгаз йгIаргхын сынчIва ахъвмарраква радгалагIвчва гвып йырнапIыцIарцIатI.
Аспортсменкви аспорт гвыргъьахъв асасчви тшырзынадырхатI пIатIу зкву асасчва: Аминистрква ркабинет агIащтийыгIвчва, КЧР АуагIа Райззара адепутатква. Ауат анкъвакъвыгIвчва абакIра пшдза рзыртахъта йрызхIвахIвтI.
Йаквыргъвгъваз йгьи йпшдзаз анкъвакъвраква апхъагылагIвчва гIадрыбергьыльтI – йалакIу агIарбараквала айгIайра тыргатI ЙынджьыгьчкIвын кыт йауу агвып.
Ачемпионква акубок рхъахьла йщтIырхтI, ари йпхатшу аэтноспорт айззара хIапхъа йакIвыршарала акьазу Къарапагва кыт йрыквдыршватI.
Агвыргъьахъв йалыргага пшдзата йалтI йауацIыхыз акультура программа. Ауи асасчва зымгIва ашIыпIа агIахIвчва йгьи ашвахIвагIвчва гвыпква ргIахъвмарра пшдзала йаргвыргъьатI.