Апроект ари пщынхауата академ ашвахIвагIвчва, гIатгара зму артистква, амузыка апхьартаква рсолистква, аколледжкви йхIаракIу апхьартакви рстудентква аднакIылтI.
Бгъанба Щазина
«Макъым – хъарари мажи зымдыруа айчважвара» анкъвакъвра-рхъвыхырта сынчIва йгIалалырныс 200-гIв райхIа швъа гIарщтитI. Октябрь а 12 йгIашIарышвта а 22-дза Москви СогIвыми адуней агIкъралькI йгIартыцIта йгIайыз анкъвакъвыгIвчва драйгвун. Ауат йрылапшта йанрыздзыргIвы амщтахь афинал турква йкIылсыз 143-гIвы йнадзатI.
Анкъвакъвра амакъымршIыйагIвчва рыхъазла апхьартатагьи йалтI, ауи апкъ йтата аршIыйара анйараквагьи алекцияквагьи акIвшатI. Атышбжьараква йапшым нархара рыман: ашвахIвара ащатаква рпны угIалагата Апсны акультура йазынархаз алекцияквала йыцIшвтхуата.
«Ари йгьахъазанкъвакъврам, уъачIвагIара йалауырхIарныс лшарапI. СквшигIадза ауи йгIалалквауа ъагIатыцIуа акъральква рпхьадзара йалахIитI. ЙанджвыквхIцIазищтара хIызхъымсуа хабзатагьи йщаквгылапI – культури амакъым адунейи йырпщылу йбергьльу агIвычIвгIвысква сцри Апсны апны йазкIкIра. СынчIва йапхъахауата йгIахIылалтI Никарагуа йауу аршIыйагIвчва. Ауи сара швабыж саргвыргъьитI. Кьангьаш гьгIазгуам ауат хIпроект апны ргIахъвмарра лахIвара пшдза шхIызгIаннажьуаш», – йгIалылкIгIатI апроект зчIву Апсны ауагIа рартистка, Россия апны гIатгара зму артистка Гыцба Алиса.
АздзыргIвраква ргIарбараквала апроект йалауреатта 18-гIв гIалырхтI. Анкъвакъвра асогIа хъада – Гран-при тигатI Москва йауу апианист Широков Александр. «Опера ашвахIвара» номинация апны йапхъахауа ахча согIа Мишина Екатерини Попов Артеми йрырттI. ЙгIвбахауа – Фельдшеров Юрийи Веласкес Катерини, йхпахауа – Попова Анастасии Ливнечева Натальи. «Камера ашвахIвара» номинация апны йапхъахауа асогIа Герасимова Юлии Сорокина Надежди йырквнадыргатI. ЙгIвбахауа Свирская Натальи Лубкова Светлани йыргатI, йхпахауа – Сулейманов Эрнести Тихонова Полини. «Аккомпанемент азъазара» номинация апны дапхъагылагIвхатI Широков Александр. ЙгIвбахауа агыларта ркIытI Егорова Александри Котенева Анни, йхпахауа – Мазуров Георгийи Мантай Эмилии.
АхноминациякI рпынгьи йайгIайкваз Апсны АкъральыгIва филармония апны йакIвшаз агала-концерт йалан. Ауат Апсны Республика ауагIа рартист Терзян Давид унашва зхъицIауа Апсны АкъральыгIва камера оркестри Краснодар йауу, Башкортостан апны гIатгара зму артист Якупов Раушан унашва зхъицIауа йалакIу асимфония оркестри рыцта ауатыкв йгIаталтI.
Ахча согIаква йырхъазымкIва алауреатква зымгIва апхъахьыла цхърагIара рауаштI – ауат аъачIвагIагIвчва гIарайбжьалуштI йгьи йапшым аконцертква йрылазлуштI. Ноябрь йгIашIарышвта аконцертква Москва, Нижний Новгород, Казань, Красноярск, Новосибирск, датшагьи Россия акъалаква рпны йакIвшуштI.
Гыцба Алиса лпроект культура нархара зму агIаджвыквцIараква р-Президент фонди Апсны Республика а-Правительстви рцхърагIарала йхъйитI. Ахчала дацхърагIатI ауи АААК ЙхIаракIу асовет аунашвачпагIв Эгьзакь Мусса.
«ХIара йгIахIыцIагылыз дзачIвызлакIгьи швабыж хIырзыразпI, ауат дрыуазаджвыпI Эгьзакь Мусса. СынчIва йгьахъазым Мусса ХIабальа йпа анкъвакъври аконцерткви радгалра данацхърагIауа. Ауыгьи ауи хIгвбайара ауагIа йрылагара ауыс апны гвалымста дшгIанымхауа йаквшахIатпI», – лхIватI Гыцба Алиса.
Гыцба Алиса ланкъвакъвра ъадзакIвшауа апщысквша руацIа ауи макъымршIыйагIв щардагIв разъазара гIадырбарныс, йаздырхIарныс лшара рнаттI, йаргьи акультура амдараква йыргIарбартахатI, ауагIа академ азъазарра йазрыму азыгIальаматра йалазырхIауа уысхатI.
швталра йа тшаншвцIара атахъыпI.