Декабрь а 1 Къарча-Черкес Республикала гIатгара зму азгIвадарахчара анхагIвы ЧквтIу Роза йылюбилейпI. Ауи амш йадахIвуата АААК ахабарргарта портал ауи лынхара-бзазара йгIаквчважвауа гIвыра арыхIазыртI.
Айсан Людмила
Къарча-Черкес Республикала гIатгара зму азгIвадарахчара анхагIвы, Россия Федерацияла гIатгара зму айъазагIв, Черкесск къала гигиенали эпидемиологияли аквта аунашвачпагIв. Арат ахьызква зымгIва нкъвылгитI ЧквтIу Роза. Ауи дъанхаз гIазырбауа ашвъа ажванахъакI акIвпI йану: «Черкесск къала асанитар-эпидемиология станция асанитар хъвшара даунашвачпагIвта днарахвтI».
Роза Умар йпхIа йылцрихаз ари анхарта ахьызгьи аргIапсщагьи анархарагьи йгьызным йъадзапсахыз, ауаса айъазагIв сквш 40 цIитIта араъа дшынхуз апш дынхитI.
Абадырра
Роза Умар йпхIа телефон сылзаста сгIалыквчважвара шстахъу анласхIв зныкIдза ауахьауыла закIгьи гьгIарымхIвахуазтI. АйъазагIв мачIкI дъанквынхан йанлыквчважвауа лхъа шачвхъылбгIауа гIасалхIвтI. Ауаса агIвыра АААН ахабарргарта портал ахъазла йсрыхIазыруата йанылдыр лнашх датшахан лбзазарагьи лдунейпшыщагьи апхьагIвчва йрыцагIвылшарныс дазыхIазырта лхIватI.
ХIгIвыджь хIайчважвара ауи лынхарта пещ апны йакIвшун. Ауаъа чIыдата закIгьи гьыгIвнам. УнашвачпагIв щардагIв рпны йапшта ауи абльынква йкIыдымшвалхуа асуратква, артшхъвага швъаква гьыркIыдым.
«ЦкьадзапI – айъазагIв йыквыргIапспI…» – хIва сазхъвыцтI зынла.
ХIызлайчважвуз абаза бызшван. Роза Умар йпхIа ауи бзидздзата йылдыритI, ауаса данчважвауа быжьквакI йацакIта йылхIвитI – йызхIвауа дабазамызшва. Ауи йашвхIаусыгIвугьи зынла йгIасгвынлыргIвытI: «Сара спсадгьыл асквш 1978 агIан акIвпI сангIанагх…»
Йтыргаз асабихъа
Ауи лани лаби рылахь йгьи йпшдзан йгьи йнашхыйан. Лаба – Уырчыкъва Умар Ибрагим йпа Йынджьыгьлокт (ужвы Абаза район йаланакIуа ЙынджьыгьчкIвын кыт – аредакция ррытаразга) дауан, лан – Лоу Сакьинат ХвытI йпхIа Гвымлокт (ужвы Красный Восток кыт – аредакция ррытаразга) апны дйытI. Ауат йрапшкву адгьыл йаджьыкIата, ауагIа ркърари рпхи йрынкъвгагIвыта, «агIвычIвгIвыс нардза йгIайыквчважвауа хабаргIвра» рзыгIв йауашта рзырхIвитI. УырчыкъваргIагьи ЛоургIагьи ртгIачваква Сталин йагIан йыншуз ачвгьахараква рхъысын Узбекистан архъаква рахьыла йагатI.
Асквш 1936 агIан ауат – «кулакпI» – рхIвата йашвырхIваз зымгIва йрапшта тичIвы зланкъвыргуз авагонква йыртарпсан Сырдарья область, Баяут район, Баяут-3 йыргатI. МгIва йъадзаквыз йтыргакваз йрыуата амли азгIвакви йыргаз гьмачIгIвым, йгIанхаз йшзыгIащаквхуш йайгвгъауата йрымдыруаз ашта апны рбзазара джвыквырцIатI.
Анхара хьанти анамхъари рхъвыхра мчыта сквшпхьадзарала йрыквын. ЙгIазхчуз ахIбачва ъанхагIвызи ргвква ъамдзуази акIвпI – ауат чкIвыныргIагьи ргвы шкIадымрыхIуш апш йадыркIылуан. Йъаргаз акыт апны ауагIа гьабызшвакIмызтI – гвхъауагьи, къарчагьи, датша уагIахъагьи рылан. Руысква ага йхIатлазтынгьи йацыта тшыркIуан, йацацхърагIун. Абазаква рсабиква рыбызшва рхъмаштылра ахIатырла абаза бызшвала йрачважвун. Ауи йаццауата щардагIвы узбек бызшвагьи гIаргвынгIвуа йцатI, йалачважвауагьи йалагатI. Рбзазащагьи зджьакIквата йагвындыргIвуан. АгIвычIвгIвыс йчва щарда тшитI, йкъару тазтын, йгвы мчызтын абаргвыраква йзычхIитI.
Псайспамцара йтыргакваз нхарала агIатгара дуква йырзынадзауа, ауыс рзадгалуа, ашIыцраква гIаджвыквырцIауа йалагатI. Абзазарагьи тIакIв йщаквгылхтI, гвыргъьараквакIгьи гIалашвауа йцатI. АтгIачва шIыцквагьи гIаншун. Ауи апшта йгIаншатI Роза лани лаби ртгIачвагьи. Умари Сакьинати йшабадыруаз йабагвапхатI, даргьи йацIрымхвауата унагIвара йалалырныс йаквдырпштI, ага Роза лъахIыльчва ЛоургIа рахIра рызгIашIыхахта тшдырпагьауа йалагазтынгьи. ЙчкIвын багъьаз, зчIвы здыруаз, анхара апны йапхъагылагIвыз, амлыкв анкъвгара йазычпаз, адгьылрхарджьра апны заргван заджвгьи дназымрыскIьуз, аузбекква пIатIу йыквырцIауата Умар-ака – хIва йызпхьуз Уырчыкъва Умар ймурад найырдзатI йаргьи йгIалихыз апхIвыспа дгIайгтI. Ауат пщыгIпачви пхIакIи – ужвы хIызквчважвауа ЧквтIу Роза – гIадритI.
«Ага хIъаныз апны щарда хIхътысызтынгьи ссабихъагьи счкIвынхъагьи насыпла йырчвын, угвы йгIатахауата йаъан, – йгIалгвалашвахитI Роза Умар йпхIа. – Сара бзи сызбуз, йсхъпшылуаз, йгIасайгвыгIвуаз, чвынцIы гIасыквызмырчIвуз пщгIвайщчва йсахIбата йсыман».
Баяут-3 апны йджьаущушта апхьарта бзидздзакI аъан, ауаъа зуыс здыруаз, зъачIвагIа йазцIабыргыз аурышв арыпхьагIвчва нхун. УырчыкъваргIа ргIариква бзита йшапхьушла йрыквдырхъун, ахвыгIвгьи дырра бзи рыртра ахъазла йрылшуз закIгьи гьгIанырымжьуазтI. Даргьи йхIаракIу апхьартаква йгIарылгатI: МухIамади МухIадини – акыт млыкврхIара тшадыркIылтI, МухIарби – ауыхвара. МухIабзаджвыкI ауи йынасып йгьгIанамкIытI – дчкIвыныркIвата адуней йхIваджьтI.
ЪачIвагIа гIалхра
«ХIфыр щта?» – дазцIгIушзапI апхьагIв. ЗпхIазаджвыкI айъазагIвта дызбарныс згвалаз Сакьинат лахIварала Роза Ташкент йтагылаз амедицина институт дыцIалырныс гвы лчпитI. ЙщаквкIыз, йпхащагIвыз, ауаса йпшдзаз йгьи йгвакIваз, урышв бызшвагьи бзита йыздыруаз абаза пхIвыспа зынла аинститут арыпхьагIвчвагьи апхьагIвчвагьи гвы лырттI.
«Боксбергер Лида – хIва намыца пхIвыспакI дсыгIвзата ацбзазарта апещ хIтан. Ауи ауыс мшигIадза йсызнайлуз йгьи йсхъпшылуаз саща МухIарби зынла йахъвдаквищттI, – йгIалгвалашвахитI Роза Умар йпхIа. – Ауи агIамта сара стипендия гIазгуата бзита сшапхьуш, съахIыльчва чIыдала шсымрыгIапсуш акIвымкIва схъа закIгьи гьтамызтI. Йаргьи ауи гIасыдахIвуан…»
Йъатаз акыт апны абзазара рыцIа йъащаквгылыз, ргIариквагьи Ташкент апны йъапхьуз йгIалцIла Умари Сакьинати йызлатыргаз асквшква анагIвс зынла рпныла йгIамихырныс йаквыркIтI. Ауаса Уырчыкъва Умар зны сквшщарда дъанымыз йпныла дгIайтI: Абашта айсра Ду амщтахь зсабиква знапIыцIата чвзабата йгIанхаз йахща Гваща дгIайахвхырныс длыщтацатI.
Йбагъьаз, бзи йабабуз УырчыкъваргIа ртгIачва зымгIвагьи йдыртшхъвун, апшвыма дшынхагIву, хъацIара шйылу, йхIаль шбагъьу, йапхъанчIвиква рцIасква шйымрыдзуа гIалыркIгIун.
Асквш 1978 агIан Роза дахIврала Ташкент амедицина институт дгIалгитIта сквшыкIла нхара дъарщтийыз Сырдарья асанитар-эпидемиология станция дцитI. ГIвысквшала рыцIа пасата ауи лани лаби рпсадгьылла йахъхитIта Черкесск къала йадзхъу Псыжв кыт йталитI.
ГIайхра
Йара ауи асквш 1978 агIан Роза лцриква лбарныс Абазашта дгIайитI.
«Сара зынла сцри шта апсабара апшдзара, араъа абзазаща схъырхтI, йсызбзийыз ауагIа гьсзыджьамщузтI», – лпсадгьыл анылба йапхъахуз ллахIвараква гIащаквлыргылхитI Роза.
Ласыла ауи йашIамсуа йрызгIайуаз, йъаныз ахъара апны йшбзазуз йазцIгIалуз рыгвлачвагьи йщардагIвыз рзаъачвагьи ркытлагIвчвагьи дрыщцитI. Ауати лари райчважвараква рпны йызнымкIва апхъахьыла рмурадквагьи галаргалун. Акыт ачкIвынчва ракIвынта – ауат Умари Сакьинати рпхIа закIыла тшылгвадырпхара ртахъыта лцIыхъва йгьтымцIуазтI.
«СгIакIвзыршуз ауагIа са сахIа уыс рымамызшва акIвын йшызбуз», – дпшвырхъыччитI Роза Умар йпхIа.
Арыла лтшпсщара мшква алгун, Узбекистан йлызпшуаз анхарта дадгылхра атахъын. Ауаъа лаща МухIарби Роза лани лаби дшраргванызлуш апш Черкесск апны йара ауи апш нхарта далагарныс длылабжьитI.
Сквш 40 йара нхартакI апны
Абарауаса Роза Умар йпхIа лпны дгIайхдзитIта сквш 40 цIуата дызпщылу анхарта далагитI.
Ауи пхата дгIалгвалашвахитI йлунашвачпагIвыз, зуыс здыруаз ларгьи ауи дазызбжьуз асанэпидстанция айъазагIв хъада Корчемкин Александр Дмитрий йпа. Ауи аъачIвагIагIв шIа лынхара дшадгылызи ъадабта йынкъвылгузи ласыта гвы риттI, йаргьи асанитар хъвшара унашва ахъылцIарныс, ауи йацлырцауата йара дитарагылыгIвхарныс лызхъайцIатI. ЛунашвачпагIв йазхъацIара лырцIабыргуата Роза ауи закIылагьи дшгIалымрыпхащуш апш дынхун, йщаквгылаз ахабзаква нкъвылгун, лхъвдаквцIараква зымгIва йнардзата йлырхъйун. Ауи амщтахь ауат сквшщарда йагIвзачвата йабабун. ЧквтIу Роза йшылхIвахуала, Корчемкин Александр йакIвпI ауи лъачIвагIа апны мгIва дыквызжьыз.
Анхарта уыста йахъвдаквыз щардан: ашIашIкIгIара згIвакви анхара аъащаква йгIарылцIуа ачымазагIвракви къральыгIва хъпшылра рзадгалра; апсабара гIаншараква йгIарылцIла уагIа щардагIв зрычмазагIвуа аъащаква рхъвыхра; абзазагIвчва санитар-эпидемиология нархарала зарар шырмадзуш ахъпшылра; ахвгIагIвчви агIарысабапыгIвчви рхвитнагIаква хчара; хабар азкIкIра, датшагьи щарда.
Асквш 2005 агIан ЧквтIу Роза Умар йпхIа Черкесск къала гигиенали эпидемиологияли аквта даунашвачпагIвта ддыргылтI.
Лынхара уысква дахIврала йлырхъйауа йахъазымкIва Роза Умар йпхIа ажвлара уысквагьи джьгарта дрылазлитI. Ауи гIван Черкесск амуниципалитет дадепутатта далырхтI. Адепутатква рсовет апны ауи асоциал уысквала акомиссия дасекретарын, азгIвадарахчара агъьчIврала, къвльейсызта йбзазауа ауагIа, аныкъвадыкъваква цхърагIара драдзарала уыс щарда дыргIаджвыквцIагIвхатI. Роза Умар йпхIа лцхърагIарала алхыгIвчва рахIвара 200 айхIа дырхъйатI.
«Сара сыхъазла йанакIвызлакIгьи магIын ду аман съачIвагIа: зымгIва йрапхъата сара сайъазагIвпI. Ауи йгIаквхта ауагIа рпахь сборч тшазыздырра атахъыпI, йаргьи ауи сшаквыргIапсызлуш сащтан йанакIвызлакIгьи. Сара анхара сшаргвыргъьуш апшта суыс збитI, ауи сабапкI шгIанагуаш ацIыхъва стагылапI, нхарадъагьи сбзазара сыла йгьсызгIацIажьуам», – лхIвитI Роза Умар йпхIа.
Йлыцынхауа зымгIвагьи рунашвачпагIв пхата йлыквчважвитI. Ауат Роза Умар йпхIа хвы лзырбитI, нбжьагIв бзита, гIвза кьахвта дырпхьадзитI.
Узайгвыгъа йауаш ахъадкIылырта
Ауаса адоктор ЧквтIу Роза лгIатгараквагьи лчIахIра хьызквагьи лбзазара йшылтахъу апш йгьырзымырчвуашызтI лтгIачва ракIвымзарквын – ауи Роза лыхъаз узайгвыгъуш, йбагъьу, йтынчу хъадкIылыртапI.
Дансабийызищтара йлыдзхъагылакваз йрыуата лаща МухIарбизаджвыкI йакIвпI йгIанхахыз. Ауи йынхара апны йгIайдахIвыз гьмачIым. Уырчыкъва МухIарби Къарча-Черкес апны йахъазымкIва щардазджьара дырдыритI. Йапшымыз асквшква рагIан ауи ауыхвара нхартаква друнашвачпагIвта, атыдзуыхварта комбинат дадиректорта, Къарча-Черкес Республика а-Правительства аунашвачпагIв дитарагылыгIвта дынхатI. Ужвы Москва дтапI, йара ауаъа дынхитI. Йахщи йари апхъала апшта йазаргванпI.
Ажва гьалам, Роза лыдзхъа йгылапI ауи лцриква. ЗымгIва драпхъата – зныкI айъазагIв шIа лгвы зхвгIата анцIрала цIагыла багъьата йлыцу лхъапщыла ЧквтIу Рамазан. Рамазан уыс щарда йырзычпу, здырраква ауацIыху дгIвычIвгIвыспI, швабыж дынхагIвыпI, йанизаманыз ареспублика апны рахIа йдууыз амлыкврхIартаква йрыуа закIыз «Юбилейна» совхоз апны дагроном хъадан. УахьчIвагьи ауи йыпшцIа апны унагIва псауышвхIа йырхIитI, ауи абзирала ЧквтIургIа рунагIва абаракьат гьагхум.
Роза Умар йпхIа дангIадрийыз амш йлызгIайуаштI лпазаджвыкI йтгIачва: йара Ренат, ртаца Нарсана, Роза лаба йыхьыз Умар зхьырцIаз ауат рпачкIвын.
Ауат хIрыцта хIаргьи ари агIвыра афыр адахIвраква, анасып, абзира лымазларныс хIлайхIвахIвпI!
швталра йа тшаншвцIара атахъыпI.