«Алашара» адкIылара ацхърагIарала Согъвым апны ауагIахъа фаша адзахра азыбжьарала акурсква нхауа йалагатI.
Барганджиа Саид
Абаза-апсуа уагIа ртшауацIыхра ацхърагIара знархару адуней адкIылара «Алашара», ауи апрезидент Эгьзакь Мусса йрыбагъьаз асквш 2019 апрограмма йаквыргIапста, апсуа-абаза этнос рпны цIаста йщаквгылаз анапIлачпара ъазара агIахчара йазынархата, Согъвым йтагылу адзахра апхьарта «Мода-Текс» йрангIалын ахъачваква рыхъазла уагIахъа фаша адзахра ауысла проект адыргалтI йгьи ауи абзазара йаларыжьуа йалагатI.
Апсны апны «Алашара» адкIылара ауысхагIв Айба Альас йшихIвазла, апхьараква пщымызкI руацIа йакIвшуштI. Адзахра ауыс йазычпу хвгIвы йнадзауата уахьчIвала ауагIахъа фаша адзахрагьи тшазырбжьитI. АпщымызкI руацIа агвып ахъачва йырзалху хвуагIахъа фаша комплекткI дрыхIазыруаштI.
«Ари апроект мурад хъадата йамапI – ауагIахъа фаша ауагIа йрылагара, ауагIахъа фаша адзахра алкIгIараква бзита йыздыруа адзахыгIвчва ъазаква рпхьадзара йалархIара, ауи йащтагIайуата, апсуа йгьи абаза уагIахъа фаша ацIасква ргIахчара ацхърагIара», - йхIватI Апсны апны «Алашара» адкIылара ауысхагIв.
Ауыс магIны ъаму, афаша адзахрала адыррква ргIахчара знархару ахачIвы йахъазымкIва акурсква ргIахътIра ауагIагьи ахIвун, йгIаликIгIатI Айба. Ауи йрытамамтI апсуаква ркультура алкIгIараква гIальаматрата йазрыму рыцIа-рыцIа йшалахIауа, ауагIа апсуа культура йшанкъвгагIву гIазырбауа афаша ршвыта йныкъварныс рыцIа-рыцIа йшхънахуа.
Акурсква рпны арыпхьагIвчва дрыуазаджвыпI ауагIахъа фаша амодельер, Согъвым йтагылу адзахра апхьарта «Мода-Текс» анхагIвы Арджениа Диана. Ауи йшылхIвазла, апроект йылгвапата далалтI: ауыс джьащахъвапI, ауагIахъа фашагьи шIыц-шIыц ймодахитI.
«АуагIа щардала тшгIахIзынадырхитI, йалкIгIата афашаква ззырдзахуа асабиква ракIвпI. Адуквагьи йхIдрыдзахлитI, ащардагIв сквшы 40 райхIа зныбжьу ахъачваква. Уыжв азаман атацанадылраква рпны фаша зшву ауагIа ймачIгIвымкIва урынйитI», – лхIватI Арджениа.
Араъа афаша адзахра уахьчIвала квтанайта йаквшвитI сом зыкь 20-25, йгIацылцIахтI ауи.
Акурсква рапхьагIвчва анхара тшазырбжьауа йахъазымкIва йгIадрысабапуа апкъыгIваква йгIарыквчважвауа алекцияквагьи йрыздзыргIвитI, ауат асуратгIвгIвы-астилист Гамисониа Амина йакIвлыршитI.
«Анхара апны йгIадрысабапуа апкъыгIваква йырзынарху адырраква хъата щардала йалапI. Апсуа фашаква рдзахыща тшъазыгIыбжьауа йгIалцIла цIаста ауат злардзахуаз апкъыгIваквагьи хIхIырдыритI. Апхъала ауат апсабара пкъыгIваква йгIарылырхуаз асхъаквала йырдзахуан: гьатан, бамби, шарбал, уабчва, къадаба, чыльа, ласа. Уыжв хIзаман рыцIа йхънахуата йгIадрысабапитI агабадин», – лхIватI Гамисониа.
Апроект адгалагIвчва йшгIалыркIгIазла, ауи дахIврала йакIвшузтын йащтагIайуа асквш апны ахIвсса рфаша знархару акурсквагьи гIахъыртIырныс ауаштI. Ауи асхъан акурс шIыцква рпны йапхьарныс зтахъкву шадыркIылуала ахабар рыцIа паса йдыргуштI.
швталра йа тшаншвцIара атахъыпI.