Хутаба Алиса

Айззара йадгалагIвын «Амедиастратегияква р-Квта» АНО йгьи ГIвадахь федерал университет (ЮФУ) апны социологии штадырри ринститут (ИСиР) амарагIайырта акъральква рдыррала акафедра. Ауаъа стратегия магIны зму аштаква рпны йакIвшауа аполитика, аэкономика йгьи асоциал уыс хъадаква алдыргарныс йайззатI Россия йгьи агIвыма къральква ръачIвагIагIвчва апхъагылагIвчва. ХIара йхIыцынхауа, «Адуней апсуа-абаза конгресс» жвлара адкIылара арыпхьарали  жвлара джьгарали згIвадарахчарали ахъвшара аъачIвагIагIв Хьышба Науыр Беслан йпа афорум далата «Ажвлара, атшдырра йгьи агIвыма къральква йырзынарху аполитика: Апсны ауачIвымш йшазынхауа» темала дгIачважватI.

«Ари апш анйара уалазларныс, зуыс азыгIальаматра ду аззыму агIвычIвгIвыс джьащахъваква урабадырырныс гвлахIара дупI. СайгвыргъитI Ростов апны анаука йгьи ахабарргара йырпщылу ажвлара совет заман йхIызгIаннажьыз ашта апны ажвлараква йрыуу аэксперткви ауысхагIв джьгаркви райчважвара арыбагъьара магIны ъазырбауа, йгьи йхъасцIитI ауи ауат агIаджвыквцIараква йрылу зымгIва рыхъаз уыла йабауа ауыс бзиква шгIахъшахъыцIуаш», – йгIаликIгIатI Хьышба.

Афорум апны йызлачважваз ауыс хъадаква:

●         аидеологии ажвлари: пантюркизм афеномен йгьи ауи ажвлара-политика уысква рпны штшгIанарбауа;

●         агеополитика анкъвакъвра: ашта зылапш йыцIу акъральква рмурадкви разыгIальаматракви;

●         ашварагIварадари амакIыраква агвныргIври: сквшщарда руацIа хъйара змауа апроблемаква (Къарабагъ, Афганистан) йгьи акъральуацIа апшIагылраква амальта йрызгIау йауаш;  

●         экономики ацынхари: атранспорт йгьи акъаругIалцIыртаква мгIва рытра, асанкцияква рзарар йгьи аэкономика абадырраква рпны апсахраква;

●         ауагIа райтыпаракви агIвычIвгIвыс капитали: амиграция уысква шакIвшауа йгьи анхагIв гIалцIыртаква унашва рхъцIара;

●         агуманитар уысква: Квта Азия апны урышв бызшва ардырра нарыскIьара абагвынгIври Россия акультура-цивилизация байаракви ррыбагъьара йаъамапсымата йшалуа.

Абаза-апсуа уагIахъа ртшауацIыхра ацхърагIара знархару «Алашара» Дуней адкIылари Адуней апсуа-абаза конгресси афорум хабарргарала йацхърагIаз йрыуапI.