АААК апроект «Аимадара» абзирала асквш 2022 агIан Апсны йапшым акытква йрыуу саби 400-гIв райхIа акъраль ауацIа йамдатI.
Базба Селма
Асабиква дырра рауата ртшпсщара адгалра нархарата йызму АААК апроект «Аимадара» йгIвбахуз ахъвы алгатI. Асквш 2022 ауацIа ауи йгIаланакIтI хвкыткI – ЧIлоу, Бамбора, Меркула, Аацы, Гвып – йрыуу йгьи Очамчыра апхьарта-интернат йыцIу апхьагIвчва 400-гIв райхIа.
Апроект дырхъйауата СогIвым йаъу а-Конгресс ауысхарта анхагIвчва гвып ашIыпIа хъвшараква руысхагIвчва рыцта Апсны асабиква ареспублика ашIыпIа джьащахъваквала амдараква рзадыргалуан.
Дырра гIазлырхуаз амдараква июнь йгIашIарышвта ноябрь гIаланакIуата цымызкI руацIа йакIвшатI. АААК анхагIвчва асабиква асльанква рпарк «Прайд», «Апсны» этнопарк, Афон ШIыци Отапи рпны йаъу ахIатшпква, Апсны ауагIахъа дельфинарий, Моква акьльиса рпны йыргатI.
«Аимадара» (ауи апхъала «Ащтра») проект йапхъахуз ахъвы асквш 2019 агIан «АМЧ» жвлара адкIылара алата йакIвшатI. Ауи Уарча, Тамыщ, Лыхны, Джгерда кыткви Дранда поселкIи йрыуата апхьагIвчва 80-гIв райхIа алан.
Нхарата йакIвдыршаз дгIаквчважватI АААК ашIыпIа хъвшараква рыцынхарала ахъвшара аунашвахъцIагIв, «Аимадара» проект йахъпшылуа Жьыба Дмитрий.
«Аимадара» проект асабиква ртшпсщара адгалра йазынархапI. ЙанпхагIвыз амызква рагIан ацIайква хIкъраль ауацIала экскурсия йыгIгун. Асабиква ауи агIаджвыквцIара ргвы гIащтIнахын амдараква йрызпшуан. СквшбжакI ауацIа ауат Апсны йаъу атурыхи архитектури рчвахъабагаква ддырдыруан. Ари апроект ацIайква аднакIылитI, хIкъраль алшараквагьи рзыгIахънатIитI. Апроект гIахIыдахIвта йхIпхьадзитIта йащтагIайуа асквш агIангьи ауыла хIынхара хIгвыгъапI», – йхIватI Жьыба.
СынчIва «Аимадара» проект алдыргауата АААК агвып Сарсаниа Дауыр йыхьыз зхъу Гвып кыт аквтанай апхьарта апхьагIвчва «Апсны» этнопарки асльанква рпарк «Прайди» йыргатI. Аэтнопарк апны апхьагIвчва шIыцра щарда рдыртI: ажьира йнашылтI, апсуа культура гIазырбауа йапшым аэкспонатква йырпшытI, уыжвгIанчIви апсуа суратгIвгIвчва рынхараква ргIарбарта йаъан, хрихыцла йхыстI. Амш ацIыхъва апхьагIвчва асльанква рпарк «Прайд» йцатI, ауаъа ауат асльанква ракIвымкIва къапльангьи махтшагьи рбатI.
Апроект йгIаланакIыз ащардагIв арат аларпшыртаква йапхъахауата йырбатI, даргьи йрымагIальаматдзата ауат рхабарква ддырдыруан. Гвып аквтанай апхьарта йжвабахауа акласс апхьагIв Багателиа Ариана ллахIвараква хIыцагIвылшатI, амш джьащахъвата йъалгаз ахъазлагьи ари ауыс адгалагIвчва дшырзыразу лхIватI.
«Адуней апсуа-абаза конгресс апроект абзирала хIара йапхъахауата ауи апш экскурсия хIаъан. ХIара джьащахъвара щарда гIбатI. Ари амдара лахIвара пшдза щарда гIасыланацIатI. Сара ауи апхъала зынгьи хрихыцла сгьымхыссызтI, йахьчIва ауыгьи сапшырныс лшара саутI. ХIапхьарта апхьагIвчва зымгIва ужвыгьи зны абараса зджьара йаныргуш йазпшитI», - лхIватI ауи.
Апроект шакIвшаз йанаквчважвуз АААК агвып чкIвыныргIа Апсны ашIыпIа джьащхъваква дырдыррала анхара шгIарыдахIвыз гIалыркIгIатI, апроект апхъахьыла штшауацIнадрыхуашла ахачIвквагьи лырхтI.
швталра йа тшаншвцIара атахъыпI.