АуагIа йырдырхьаз анахьанат афильмква «Аимцакьачара», «КIвалдзы» йрапшта «Апхьарца» фильмгьи АААК апроект «АМАЗАРА» апкъ йтата Экьзакь й-Фонд ацхърагIарала йхъырхтI.
Хвтаба Алиса
Апрезентация джвыквырцIауата апхъапхъа йара аъамапсыма йгIайззаз йддырбатI, атурыхгьи рархIвтI. Арежиссер Харджелиа Сабина лфильм ауи амакъым ъамапсыма шырчпауа гIахънатIитI, йагIвсыз агIамта ауацIа ауи штшапсахыз, йгIазлыху, абжьы цкьата йгIатыцIуата йучпара ахъазла йудырра, уыззычпазара атахъу гIанахIвитI. Асюжет ауаса йлырхын – апшгIвы апкъыгIвас ангIалырхуа угIалагата амакъым гIатыцIуа йцандзыкIьа аъамапсыма ачпара йапщылу анхара шабгу йбитI.
АшIыпIа хъвшараква рыцынхарала АААК ахъвшара аунашвахъцIагIв Жьыба Дмитрий йгIаликIгIатI:
«АуагIа рмакъым ъамапсыма – ауи ауагIахъа ртурыхи ргвбайари йахъвыкIпI. Ауи хIапхъанчIвиква шбзазуз, рцIасква шаъаз гIанарбитI, йащтагIайуа абанпараква апхъала йщаквгылаз аъадаби анамыси днардыритI. Ари апш фильм ахъыхра ауыс гIалазгаз АААК акIвпI. ХIара хIайгвыргъьитI афильм ангIахIырбауа апшгIвы апхьарцачпагIв Арухаа Василий йдуней йдунейта, аъамапсыма йыцичпауазшва йбауа, абжьы ангуш дазпшуа дъачIву. Афильм анхъырхуаз хIара ауаъа хIгьаламщщуазтI – ауи Анчва закI гIазлайцIаз арежиссер шIа Харджелиа Сабина лара лыла йшгIацIалжьуаз апшта йхъылхтI. ХIара ауи гIалыдахIвта йыгIбитIта – хIайгвыргъьитI, апшыгIвчвагьи йара ауи апш лахIвара гIарыланацIушта хIазпшитI».
Апрезентация йалаз Арухаа Василий йпа Денис афильм йадгIапсалыз зымгIва дшырзыразу йхIватI.
«Анчва дырзыразхатI ари афильм ахъыхра йацхърагIаз зымгIва. ХIара хIпахь хачIвыта йгылан аъамапсыма шгIаншауа тамамта йгIахIырбарныс, йаргьи ауи гIахIыдахIвтI. Афильм ащтацауата, йнапIылачпару ргылчIвкIгьи аламкIва ауыс йшаъадзу апш йгIанарбитI. Са йшспхьадзауала, ари йгьахъазфильмгIвацам – ауи хIкъраль ахьыз зыргауа, адуней акультура ахъаз магIны зму гIаншарапI».
СогIвым апны АААК ауысхарта аунашвахъцIагIв Реквава Темур ари «Амазара» проект апкъ йтата пычIвта йхъырхыз йшфильмым йхIватI.
«ЙхIаракIу асовет аунашвачпагIв Эгьзакь Мусса апхъа дгылата АААК сквшбзидздза цIуата апсуа-абаза уагIахъа ргвбайара тынха гIащаквыжьрала нхара ду акIвнаршитI. ХIара йхIгвапапI «Амазара» проект апкъ йтата ужвыгьи фильмкI ауагIа йдхIырбарныс. Ауи магIын ду зму уыспI, ауи хIара йхIтынхапI. Эгьзакь Мусса ХIабальа йпа гвышхвара ду йылата ари йапшу апроектква йрыцикIлитI. ХIара йапшым анархараква гIащтIыхIхитI, йапшым ауагIа ауыс йгIаланахIыркIитI, йапшым апсуа режиссер шIаква гIахIрайгвитI. Ауат дзачIвызлакIгьи йара йпшыща, ауыс адгылща йымапIта – афильмквагьи азакI азакI йапшымкIва йджьащахъвата йгIаншитI», – йгIаликгIатI ауи.
АуагIа ръамапсыма йгIаквчважвауа афильм амакъымбзибагIвчва рпны йгIашIарышвта ауагIахъа культура архъвыхыгIвчва рпны йыцIшвтхуата апшыгIвчва щардагIв йрымагIальаматхуштI. Афильм ауагIа апшырныс лшара гIаншахьатI.
швталра йа тшаншвцIара атахъыпI.