Уаанӡа иддырбахьаз, ауаа еицырдыруа акиносахьақәа «Аимҵакьачара» «Акәылӡы» инарываргыланы, афильм «Аҧхьарца» ҭырхит Егзакь ифонд ацхыраарала, «АМАЗАРА» зыхьӡу АААК апроект аҳәаақәа ирҭагӡаны.
Алиса Хәытаба
Афильм аҧхьарбара хацдыркит амузикатә рҳәага ахаҭа ацәыргарала, уи аҭоурых иазхьаҧшит. Арежиссер Сабина Харџьелиаҧҳа амузикатә рҳәага шыҟарҵо далацәажәоит, дырзааҭгылоит аамҭақәа иргәылагӡоу аҧсахрақәа, мҿыжәлас излыҵуа, уи аҟаҵаразы дыррақәас иаҭаху, абжьыцқьа ахылҵуа аҟаҵашьа. Афильм асиужет иабзоураны, ахәаҧшҩы арҳәага аҟаҵара апроцесс шаҳаҭс даиуеит, иблақәа раҧхьа ииасуеит имариам аус зегьы: излырхуа амҿыжәла аҧшаара инаркны, ахыркәшаратә аккордқәа рҟынӡа.
Аҭыҧантәи ахаҭарнакрақәа аус рыцура иазку аҟәша анапхгаҩы Дмитри Жьиба иазгәеиҭеит анаҩстәи:
«Жәлар рмузикатә рҳәага – ажәлар рҭоурыхи ркультуреи ирыхәҭакуп. Уи абзоурала иааҧшуеит урҭ рыбзазашьа, рҵас, рқьабз, еизҳауа абиҧарақәа ирыманадоит адоуҳа-цәаҩашәатә хәдурақәа. Афильм аҭыхра аидеиа рызцәырҵит АААК аҟны. Гәахәара дула ишәыдаҳгалоит ари афильм. Уи злаҭыху аформат абзоурала ахәаҧшҩы иныруеит аҟаза Васили Арухаа идунеии ибзазареи. Афильм иахәаҧшуа амузикатә рҳәага апроцесс зегьы ибоит, игәы хыҭхыҭуа дазыҧшуп уи абжьы анбаго ҳәа. Ҳара аҭыхрақәа анырра раҳҭомызт, урҭ мҩаҧысуан арежиссер қәыҧш Сабина Харџьелиа лнапхгарала. Алҵшәа даараӡа иаҳгәаҧхеит, ахәаҧшцәагьы ибзианы ирыдыркылап ҳәа ҳгәыӷуеит».
Аҧхьарбара иалахәыз, аҟаза иҧа Денис Арухаа афильм аҭыхра иалахәыз зегьы иҭабуп ҳәа реиҳәеит:
«Ари акиносахьа аҭыхра иацхрааз зегьы иҭабуп ҳәа шәасҳәоит. Амузикатә рҳәага аҟаҵара апроцесс излауала ҧсахра аламгалакәа ахәаҧшҩы ирбатәын, сгәанала ари адҵа нагӡоуп. Афильм даара ихатәроуп, аҧшӡаразы иқәыргылоу асценақәа алаӡам, аҧсҭазаара иазааигәоуп. Ари баша фильмӡам, ари ҳтәыла ӡырызго киносахьоуп, акультуратә дунеи азы крызҵазкуа хҭысуп».
АААК Аҟәатәи аофис анапхгаҩы Ҭемыр Рекәаа иажәақәа рыла, ари афильм иаҧхьанеиуеит апроект «Амазара» иаҵанакуа егьырҭ аусумҭақәагьы.
«Иреиҳау ахеилак Ахантәаҩы Муса Егзакь аҧхьа днаргыланы, АААК кыршықәса ҵуеит аҧсуа-абаза жәлар иматериалтәым ркультура ахьчара аҽазкны аус ауеижьҭеи. Гәахәара дуӡӡала ахәаҧшҩы идаҳгалоит апроект «Амазара» иаҵанакуа даҽа фильмк. Муса Хабал-иҧа Егзакь аиҧш зеиҧшу апроектқәа дрызгәдууп, еснагь ацхыраара риҭоит. Еиуеиҧшым ишьҭаҳхуа атемақәеи, иааҳаҧхьо ауааи, аҭыхра знапы ианаҳҵо аҧсуа режиссер ҿарацәеи. Дара зегьы рхатәы дунеихәаҧшышьа рымоуп. Уи абзоурала афильмқәа аки-аки еиҧшӡам, егьырҭ изларылукааша рхатәы ҟазшьа рымоуп», - иҳәеит иара.
Жәлар рмузикатә рҳәага иазку афильм ззынархоу аудиториа амҽхак дууп: амузика бзиа избо инадыркны, жәлар ркультура ҭызҵаауа рҟынӡа. Афильм ауаа ирбаратәы алшара аҧҵоуп.
шәҭалароуп, ма шәыҽҭажәыҩроуп.