Адунеизегьтәи
аԥсуа-абаза
конгресс

Аҭыҧантәи аҟәшақәа аус рыцура иацҵауа, Адунеизегьтәи аҧсуа-абаза конгресс аусура аҳәаақәа ирҭагӡаны, Чхәарҭалтәи ашкол хықәкылатәи ацхыраара аиуит. Аҵаҩцәа ирырҭеит абаҩрҵәыреи аҧкьаҭмпыли рҽазыҟаҵаразы иаҭаху амаҭәахәқәа.

Адунеизегьтәи аҧсуа-абаза конгресс аусзуҩцәа рхы аладырхәит Аџьынџьтәылатә Еибашьра Ду афырхаҵа - Балтикатәи афлот амшыншьаҟауаа ррхәҭа 3 тәи абригада алеитенант еиҵбы, Аҧснытәи аҵеи Ҭарба Хьымца Гәыџь-иҧа ибаҟа аартра ацеремониа.

Аусмҩаҧгатә мҩаҧысит лаҵарамза 25 рзы Ленинградтәи аобласт Приозертәи араион Мичуринское аҳабла ашкол аҿы. Амонумент аартра рнапы ианырҵеит араион ахада Александр Соклакови Ҭараа рыжәла ахаҭарнак Ҭенгиз Ҭарбеи.

Ацеремониа ҳаҭыр зқәу сасцәаны иаҭааит афырхаҵа иуацәеи иҭынхацәеи, Аҧсны адәныҟатәи аусқәа рминистр Олег Барцыц, иара убас уаҟа инхо аҧсуааи, акультура рккаратә еилазаара «Аҧсны» ахаҭарнакцәеи.

Аусмҩаҧгатә аҳәаақәа ирҭагӡаны Мичуринское аҳаблатә школ аҵаҩцәа аибашьра иалахәыз ргәалашәара иазку ажәеинраалақәа ирыҧхьеит. Нас еизаз зегьы абаҟа амҵан ашәҭқәа шьҭарҵеит. Аофициалтә хәҭа анхыркәшаха ашьҭахь, ашкол адиректор асасцәа рзы аҵараиурҭа аҩныҵҟа аекскурсиа мҩаҧылгеит, амузеии аклассқәеи длырбеит.

Лаҵара 20-22 рзы Урыстәыла аҩадатәи аҳҭнықалақь аҿы имҩаҧысуан Петербургтәи Аетнофорум – УА ажәларқәа ракзаара Ашықәс аҳәаақәа ирҭагӡаны еиҿкааз аҭҵаарадырра-практикатә усмҩаҧгатә ду. Аетнофорум еиҿыркааит Урыстәыла аҭҵаарадыррақәа ракадемиа Петр Ду ихьӡ зху антропологиеи аетнографиеи рмузеии (Кунсткамера) Урыстәыла аҭҵаарадыррақәа ракадемиа Санкт-Петербургтәи аҟәшеи.

Афорум алахәылацәа ҷыдала хшыҩзышьҭра арҭеит амеценат, АААК Иреиҳаӡоу ахеилак ахантәаҩы, аидгыла «Алашара» ахада Мусса Егзакь иқәгылара, уи далацәажәеит ихароу анхарҭақәа рҿы аетнопроектқәа рынагӡаразы имоу аҧышәа.

«Ҳаҭыр дуны исыдыскылеит Абаза жәлар реиқәырхареи рыҿиареи рзы ҳгәыҧ иамоу аусуратә ҧышәа ахцәажәара. Алахәылацәа рҿырҧштәала иаадырҧшит акультура ауаҩы иеизҳара иацхраауа, ауаа еидызкыло, аҭаацәараҿы аизыҟазаашьақәа еиӷьызтәуа, ақыҭа гәакьеи, ажәлари, атәылеи рахь азнеишьақәа зыҧсахуа, зыҧсы ҭоу мчны ишыҟоу», – ҳәа азгәеиҭеит Мусса Егзакь.

Иқәгылараҿы иара еиҭеиҳәеит аетнопроектқәа аҵакырақәа рыҿиаразы ицхыраагӡаны иҟалар шалшо – ауааҧсыра рхала апрограммақәа раҧҵара ианалахәу, аидеиақәа анцәырырго, алҵшәазы аҭакҧхықәра анрыду, усҟан рнапы злаку аус иаҳа гәыла-ҧсыла иазыҟазаауеит.

Ҟарачы Черқьесиа аус зуа аидгыла «Алашара» аусура аихшьаалақәа ҟарҵеит, иалацәажәеит инагӡоу аспорттә, аҵаратә, акультуратә, аҿартә, абызшәатә проектқәа рынагӡашьа шымҩаҧысуа. Инаҵшьны иазгәаҭан ацифрақәеи аусмҩаҧгатәқәеи зегьы ҧсыс ирхоу ауаа роуп ҳәа.

«Сара агәра ганы сыҟоуп ҳметод Урыстәыла иарбан хәҭазаалак аҿы ибзианы аус шауа. Уи Санкт-Петербурггьы иааҳарҧшуеит аҿиара аҵакыра «Гранд Каньон» аҿы имҩаҧаҳго акультуратәи асоциалтәи проектқәа рыла. Кыршықәса ари аметод қәҿиарала ҳхы иаҳархәоит Адунеизегьтәи аҧсуа-абаза конгресс аусураҿгьы», – ҳәа инаҵшьны иазгәеиҭеит Мусса Егзакь.

Иқәгылара хыркәшауа, иара иҭабуп ҳәа реиҳәеит Петербургтәи Аетнофорум аиҿкааҩцәеи хаҭала академик, Урыстәыла аҭҵаарадыррақәа ракадемиа ахада ихаҭыҧуаҩ, Урыстәыла аҭҵаарадыррақәа ракадемиа Санкт-Петербургтәи аҟәша ахантәаҩы Андреи Иван-иҧа Рудскии, Кунсткамера адиректор, Урыстәыла аҭҵаарадыррақәа ракадемиа академик Андреи Головневи.

Афорум аартра иазкыз аныҳәатә усмҩаҧгатә аҳәаақәа иҭагӡаны рнапы аҵарҩит «Урыстәыла аҭҵаарадыррақәа ракадемиа Санкт-Петербургтәи аҟәшеи Аҧсны аҭҵаарадыррақәа ракадемиеи рыбжьара аусуеицуразы» аҽазкратә ҧкаанҵа.

Аетнофорум еизнагеит зымҽхак ҭбааз аудиториа – акультура аусзуҩцәа, аҵарауаа, аполитикцәа, абизнесуаа, аетникатә еилазаарақәа рхадацәеи активистцәеи, итрадициатәу анаплакқәа ирыҵаркуа асахьаҭыхыҩцәеи анапҟазацәеи. Афорум аҳәаақәа ирҭагӡаны хыҧхьаӡара рацәала еиҿыркааит Урыстәыла аҧеиҧш, иқәынхо ауаа, аҵасқәа, ақьабзқәа ирызкыз аусмҩаҧгатәқәа жәпакы.