Мсыр (абазаква Египет араса йапхьитI – аредакция ррытаразга) апны йбзазауа апсыуакви абазакви йрыуазаджву Абаза МухIамад Абаза тдзахьыз нкъвызгауата Мсыр йту аткъвыми Апсни ращтаныкъвара йыла йшгIацIайжьуа, ауат рыжвла ъану рпсадгьыл рыцIа йшаргванхуш ауысла йгвгIанаграква гIахIайхIвитI.
Барганджиа Саид
Зыщайдзаква апсыуата йа абазата Мсыр йбзазауа ауагIа Апсны йалырдыргIауа дукI гьаъам, ауи аъаща упсахра ахъазла хIыжвла ъану хIпсадгьыл рыцIа багъьата тшапхIщылра атахъыпI, йпхьадзитI Мсыр апсуа-абаза диаспора йа Абаза ткъвым (Мсыр йту апсуа-абаза диаспора йрылкIгIару ари акIвпI: ауат зымгIва Абаза ткъвым йаланакIитI, ауи атдзахьыз нкъвыргитI, ауаса апхъала йрымаз ртдзахьзыздзаква гьырдырхуам – аредакция ррытаразга) йрыуу агIвычIвгIвыс джьгар Абаза Мухамад. Ауи йгвгIанаграква АААК ахабарргарта портал йгIарайхIвтI апрель мыз агIан аконгресс ауысхагIвчва гвып Мсыр йанца.
Абаза ткъвым Апсны ахабар дукI йызрымдыруайа?
Абаза МухIамад йгвы йасуата йхIвитI Мсыр йту апсыуакви абазакви райхIарагIв рыжвла ъану рпсадгьыл рбарныс йшащтам: ауаъа зны йагаз йрыуатагьи йгIванхауата йцаз заджв-маджвпI. Ауи дшхъвыцуала Мсыр адиаспора йаланакIквауа ртурых ъарымдыруа акIвпI Апсны рыцIа багъьата тшзадрымкIылуа.
«Мсыр апны хIткъвым ага йдууызтынгьи, ага пIатIу аквырцIузтынгьи хIтурых ъахIымдыруа, Апсны ъахIхъаштылхыз йгIарылцIла хIпсадгьыл тшадхIкIылырныс, ауыла хIхъысхныс хIгьащтам. Ауи ауыс арыбаргвитI акъраль апны йщаквгылу ауацIа уысквала аполитикагьи», – ауыс зкву йхIвитI ауи.
Абаза ткъвым рыжвла ъану рпсадгьыл ахьыла йъамхъуа датшагьи йашвхIаусыгIвакIта МухIамад йбитI ауи анархарала йащтацауата нхаракIгьи ъакIвымшауа. Ауи йшихIвауала, адиаспора йрыуата зджьакIы Мсыр апны Апсны йахIвачIвгIвытагьи зны йазалхта хъвдаквцIара рыквын, ауаса «сабапкIгьи гьрымчпатI», йауа ухIварыквын «йа ргвы гьымцхIузтI, рхъвдаквцIараква шдырхъйушгьи гьрымдыруазтI, йа ауат ахъвдаквцIараква дара рфайдакI шгIарылырхуаш акIвын йынкъвырцуз». УахьчIвала, йхIвитI Абаза, Мсыр апны апсуа-абаза диаспора адызкIылуаш организация мчыкIгьи гьаъам.
АчIвырхъа хвыцква рмагIны ауысла
Ага ауаса йаъазтынгьи, йгвы йгIанагитI ауи, рпсадгьыл рыцIа йазаргванхара ахIатырла рахIа йхвыцу чIвырхъаквакIгьи магIны рымапI, ажва ахъазла – ахIаракьатчпагIвчва рахьыла йгIаджвыквылуата.
«Сара хIтгIачва (Абаза тдзахьыз нкъвызгауа – аредакция ррытаразга) йрыуата йгIасынйуз зымгIва хIыжвла ъану хIпсадгьыл йцарныс йаквгIазшIыстуан, зджьакIгьи ауаъа уыскI джвыквырцIарныс, йдучвам проектквакI гIаларгарныс йадсыргылтI – йпычIву чIвырхъата, уацIыхъван ауаъа йцадзахырныс йаквдырпшуата. Ауи акIвымкIвагьи джьгарра злу апсыуаквакI Мсыр апны дара рапш уыс зырцаквауа йшрабасырдыруаш ацIыхъва стагылан», – йхIватI Абаза МухIамад.
Ауи йгIацицIахтI йынхара датшагьи нархарата йаму, йпсадгьылгьи дызлацхърагIауа Апсны йауу агвыпква Мсыр ргIайра адгалра шакIву. МухIамад АААК ауысхагIвчва йыргвыгъатI аконгресс анхара дшацхърагIуш.
«КIарала сзацхърагIушта йаъазтын сгвыргъьачIвауа йсчпуштI», – йрыбагъьатI ауи, йара йапшта Апсны йацхърагIауа, апхъахьылагьи закIыла йасабапхуш датша зджьакIгьи рыхьызква гIайхIватI.
«Ажва ахъазла, Абаза Моаз йара-йара далаган асоциал сетьква рпны Апсны Республика ахабар йыргитI – туризм ахъазла йшбзийу, культура, турых байа шаму даквчважвитI. Абаза Гехад наука нархарала уыста йыншауа йалыргата ауагIа йрылайгитI», – йгIашIипхьадзатI Абаза МухIамад.
«Адгьыл апны джьанат»
Йара йхъатала МухIамад Мсыр апны йатдымрыпауа амлыкв даланхитI. Асквш 2014 йгIашIарышвта хын Апсны дцахьатI, ауи апхъалагьи, 1990-хуз асквшква рагIан, йгвы йтан йыжвла ъану йпсадгьыл йбарныс, ауаса «ауаъа уца йшауаш закIгьи гьалйымдыргIузтI». Апсны апны йбаз ауи ужвы йъагIадзазгьи йгвы йгьтыцIуам.
«Йапхъахауата, сара акъвым йыквчIву акъраль сгIатадритI, Апсны апсабара апшдзара сыла ахвытI. Ауи адгьыл апны джьанаткI йапшпI. ЙгIвбахауата, сара сыла йгIацIазжьуан сапхъанчIвиква араъа йшаъаз. Тамамта йабазазуз ауат? ЙачIвыйа йджьанату ари адгьыл зныржьыз? Мсыр йшпага? Йырхътыс ачIвыйа ауат ари ашIыпIа хъара йтыцIта аполитика амакIыракви азальмагIари ъащарду адуней аквта йанташва?» – йгвы йтшуз хIахайыргIвазатI Абаза МухIамад.
ЧкIвыныргIа азаджв азаджв йпны йгIанхауата йбзаза йауашын
Ауи Апсни Мсыри йбзазауа ауагIа, йгIауахвырквын – чкIвыныргIа, рыцIа йазраргвануашшва йбауа проектквакI дрыквчважватI. Абар закIы: ауат азаджв азаджв йпны йгIанхауата йбзаза йауашын, ауи агIан дасу йырбзазащу, атгIачва ансимшы йызлу ауысква, йара акъраль шабгу апны абзазара шщаквгылу рыцIа бзита йырдыруашын.
«Мсыр йауу чкIвыныргIа апсуа тгIачваква рпны мызкIы аъара йбзаза йауашын, Апсны йауу чкIвыныргIагьи йара ауаса араъа йгIайрынта хIтгIачваква йрылазларын», – йхIвитI ауи.
Абаза МухIамад йшипхьадзауала чкIвыныргIа рылшараква дупI. Ауат «алауыршварыквын» йгвышхвауа ауыс тшытмытква йрылалитI уацIыхъван рыцIа йпхатшу уыскI йшадгылхуаш апшта. Ауи апшта МухIамад йпхIа уахьчIва США дбзазитI, Апсны йазынарху доктор диссертация дадынхалитI. Датшагьи йзаъачваквакI швапхата йгIайгитI Абаза.
«Саща Апсны апны тдзы йхвгIатI, ауаъа рахIа йанмачIу сквшыкI апны зны дцалуштI, уацIыхъван, тшпсщара данчIвахра, бзазара ауаъа дцадзахуаштI. Саща йпа Испания апны магистратура дгIалгарыквын Апсны дцахта йхъатачIв инженер бизнескI щаквйыргылра ймурадпI», – йхIватI ауи йгьи йгIацицIахтI: «Арахь, тIакIв рыцIа щарда хIабабалара атахъыпI».
СынчIва апрель мыз агIан Адуней апсуа-абаза конгресс ауысхагIвчва ргвып Мсыр нхара уысла йаъан. Ауаъа йъадзаныз магIын ду зму анйараквакI рыман, Мсыр йбзазауа Абаза ткъвым йрыуу щардагIвгьи аргваныта йрабадырныс, йшацынхушла йрангIалырнысгьи рылшатI.
швталра йа тшаншвцIара атахъыпI.