Адуней
апсуа-абаза
конгресс

А-КОНГРЕСС ШГIАНШАЗ

Асквш 1992 октябрь, аквырджь-апсуа айсра йанашымтаз агIан адуней шабгу йбзазауа адиаспора ргIащтийыгIвчва Лыхны кыт апны тшазыркIкIын рыжвла ъану рпсадгьыл Апсны хчара ахIатырла ауагIахъа адыркIылра рмурадта апсуа-абаза (абаза) уагIахъа Йапхъахуз р-Дуней Конгресс акIвдыршатI.

А-Конгресс йащаквыргылра хъадата йалтI Апсуа-абаза уагIахъа рдуней ассоциация (МАААН) гIаныршара. Ауи дапрезидентта далырхтI ажвлара уыснкъвгагIв ду, аюрист наукаква рдоктор Шамба Тарас.

А-КОНГРЕСС АХАЧIВКВА

А-Конгресс анхара мурад хъадата йаму апсуакви абазакви йъабзазалакIгьи йадкIылта ауагIахъа разыгIальаматра йазынарху анхара йгIаланаркIра акIвпI. Ауи лшарахитI апсуа-абаза уагIа йрыуу гIвычIвгIвысипхьадза йзычпуш йчпара ахъаз аъаща ангIануыршара. А-Конгресс агвып ркъару ауагIахъа рацзакIыра рыбагъьара, Апсны аэкономика атшауацIыхра ацхърагIара, агIвыма къральква йыртабзазауа абашталагIвчва гIайхра ахъазла аъаща бзи гIаныршара, акъральгIв жвлара рыбагъьара йгьи тшауацIнарыхра йырзынадырхитI. Абаза уагIахъа гIащаквыжьра йгьи тшауацIдрыхра йазынарху ауысква ауагIхъа йрыуу ъабзазауа акъральква зымгIва гIаланакIитI.

АААК ЙХIАРАКIУ АСОВЕТ АУНАШВАЧПАГIВ ЭГЬЗАКЬ МУССА

Асквш 2017 агIан йакIвшаз Йбыжьбахуз айззараду аорганизация анхара апны ашIчIвара шIыц йаджвыквцIагахатI. Ауи йалакваз ахьыз шIыцта йщаквдыргылтI – Адуней апсуа-абаза конгресс. А-Конгресс ЙхIаракIу асовет даунашвачпагIвта далырхтI акъральыгIва йгьи ажвлара уысхагIв, амеценат Эгьзакь Мусса. Ауи АААК анхара нархара хъадата йайттI ашта йгьи ашIыпIа уысхартаква гIаныршара йгьи кытипхьадза атшауацIыхра ауысла йазалху программа лыхра. Гватра кIьыда азалхпI хабарргарала анхара – ауи къраль щарда йырту адиаспора йрыуу ауагIа радкIылрала анхара алшара йаланархIитI.

А-КОНГРЕСС АГВЫП РМУРАД ХЪАДАКВА

– апсуа-абаза (абаза) уагIахъа рэтнокультура ацзакIыра гIащаквыргылхра;

– адиаспора йрыуу хIыгIвычIвгIвысква рыжвла ъану рпсадгьыл йгIайхра ахъазла аъаща бзи гIаныршара;

– абашталагIвчва Апсны аэкономика, асоциал йгьи акультура тшауацIыхра йгIаланаркIра;

– агвбайара тынха – апсуа-абаза (абаза) уагIахъа рылкIгIараква, рцIаскви рхабзакви – гIащаквыжьра.

А-Конгресс ахачIвкви амурадкви йгIарыквхта ауи анхара апны быжьнархара хъадакI гIалукIгIа йауаштI:

– цри бызшва гIащаквыжьра йгьи тшауацIнарыхра, – культура, – чкIвыныргIа, – апхьара, – згIвадарахчара, – спорт.

А-КОНГРЕСС АНХАРА ЙГIАЛАЛ ЙАУАШ

УахьчIвала а-Конгресс йапшым акъральква йыртабзазауа апсыуати абазати гIанызкьыгIв райхIа аднакIылитI. Ауат ашвъаква йшгIархIвауа апшта йатахъу зымгIва зчпата аорганизация йалалкваз ракIвпI. Ансимшы нхара уагIа 80-гIв райхIа йахъвдаквырщтитI.

А-Конгресс далал йауаштI апсуа-абаза йгьи убых уагIахъаква йрыуу дзачIвызлакIгьи. Ауи ахъазла ахIвара швъа гIвыта электрон почтала йщтира йа уъабзазауа ашта апны а-Конгресс ауысхагIвкI йутра атахъыпI. Уъабзазауагьи къральта уызкъральгIвугьи магIны гьырзырбум. А-Конгресс йалу дзачIвызлакIгьи аорганизация анхара далазара, айззараду даделегатта йа а-Конгресс аорганква дрылазларныс далырхра, ЙхIаракIу асовет алачIвараква дрылазара дахвитпI.

А-Конгресс йалалуа Абаза уагIа руагIахъара, ргвбайара, ртурых гIащаквызыжьра йгьи тшауацIдызрыхра мурадта йызкIыта тшадызкIылыз атгIачва ду дрыуазаджвхитI.

А-Конгресс анхара далалырныс, ауи апрограммаква рырхъйара дацхърагIарныс дзачIвызлакIгьи дахвитпI.

А-КОНГРЕСС АХАЧIВКВА ШАРХЪЙАУА

Къару хъадата йалуа кытипхьадза апны йгIандыршауа ахъвшараква ракIвпI. Ауат акытква рбзазагIвчва ашта ахъаз магIны зму ахачIвква рырхъйара йгIарыланаркIра гIадрыласитI.

А-Конгресс агвып йдырхъйауа апроектква гьапшым: арыпхьарала апрограммаква, агвчIагIв акцияква, спорт, культура, хъмаштылра нархара зму ауыс пхатшаква, анкъвакъвраква.

А-Конгресс йагIаджвыквцIарапI «Агвы апхара» гвчIагIв акция, аорганизация ауатыквква рпны пышвтдъа Айкьангьашырта клуб алачIвараква акIвшитI, уагIа щардагIв адызкIылуа «Абаза» культура-спорт фестиваль адыргалтI. Ауысква зымгIва амурад хъада – апсуакви абазакви хвы змата йырпхьадзауа ауагIа йрылагара, атурых тынха гIащаквхара ахъазла ауагIахъа адкIылра – йазынхитI.

АГIВАМА КЪРАЛЬКВА РПНЫ АААК АНХАРА

А-Конгресс апроектква Абаза уагIа йрыуу ъабзазауа акъральква зымгIва рпны йдырхъйитI. Ауи ауагIахъа аднакIылра йахъазымкIва ркультура, рцIасква, ргвбайара ауат акъральква рбзазагIвчвагьи йднардыритI, акультура амдара йацхърагIитI. Апсны йахъазымкIва АААК ауысхартаква Россия аштаквакI (Санкт-Петербург, Москва, Къарча-Черкес, Къабард-Балкъар, Ставропольшта), йара ауи апшта – Трыквшта, Германия, Нидерланды, Бельгия, Великобритания рпны йынхитI.

ЙцIыхъвахауа асквшква руацIагIваца а-Конгресс аунашвачпагIвчви йалаквуи йапшым анархараквала ацынхара ауысла ангIалра жвабапхьадзара мачвы рыцIарцIатI. Трыквшта апны йгIаныршу апсуа культура квтаква р-Федерация, Египет йаъу Акультури азъазари ртшауацIыхра афонд рыцынхара аргIапсща лырххьатI. АААК ЙхIаракIу асовет ахъада Эгьзакь Мусса дашIамсуа адиаспора ъану акъральква рунашвахъцIартаква руысхагIвчва дрынйалитI: агIвыма къраль уысквала Россия аминистр йтарагылыгIв Руденко Андрей, Иордания а-Сенат аунашвахъцIагIв йтарагылыгIв, Италия рпарламент адепутат Далль-Оссо Маттео датшагьи щардагIвы. Италия рпарламент апны а-Конгресс агвып йадыргалыз аконференция далан Апсны р-Президент Бжаниа Аслангьи. «АуагIахъаква йырбзазащахуш дара-дара йщаквдыргылхырныс рхвитнагIа. Апсны йгьи Европа Ду» тема йазынархаз ауи ауыс онлайн форматла йакIвшатI.

А-Конгресс агIвыма къральква джьгарта йызрыцынхауа, ауат рпны ауысхартаква згIаннаршауа апсуакви абазакви йъабзазалакIгьи акъральыгIва арыбагъьара ауыс щъата йшазалуа тшазырдыритIта акIвпI.

АХЪМАШТЫЛРА УЫСКВА

Асквш 2021 агIан СогIвым апны асквшква 1992-1993 рагIан йакIвшаз Апсны ауагIа р-Абашта айсра йаладзкваз рыхьызла Хъмаштылра цIласатыр ларцIатI. Ансисквша КIавкIаз айсра йаладзыз ауагIа анырджьабауа амш агIан амшын атшпы апсуа чвамза Ащамакъи Нарт мгъымци адыркIлитI. Апсны абаракъи адамыгъи рымш, Асабиква рхчара амш, Асквш шIыц йырзынархата а-Конгресс йацызкIуа агIвзачвагьи ацта акультура уысква, алитература анйараква аднагаллитI.

АГВЫ АПХАРА: ГВЧIАГIВ АКЦИЯ

Апсны апны ари акция йызшIуырпшра аъамкIва дута тшауацIнахтI. МызквакI руацIа «Алашара» Фонди Трыквшта апсуа культура квтаква р-Федерации рцхърагIарала чгIвыча пха, щапIхъацIа датшагьи гъын хIапчып саби 1000-гIвы райхIа йырнапIыцIашватI. Апроект Апсны арайонква зымгIва гIацIанакIтI, кIара йазыбжаз знырцIуз ашвъаква дара абзазагIвчва йдрыхIазыруан. Ауи ашIыпIа хъвшараква рбзирала акытква рбзазагIвчва анхара йгIаланаркIра а-Конгресс нархарата йъананауахвыз штамаму йаквшахIатхитI.

АПОЛИТИКА БЗАЗАРА АЛАЛРА

Асквш 2022 агIан а-Конгресс йалакву йрыуата пщгIвы Апсны АуагIа Райззара апны алхраква йрылалырнвс йаквыркIтI. Ауи кандидатипхьадза йара йхъатачIв мурадын. А-Конгресс йалакву Апсны акытипхьадза йнадзатI. Ауи амщтахь социал нархара зму апрограмма гIаншатI. Ауи рыцIа сабап алата йуырхъйа йауаштI акъраль шабгу йазынарху ащаквыргылраква рлыхра уалазлузтын. Ауи апш лшара, ажва аламкIва, йгIаунатитI Апсны Республика а-Парламент. Алхраква ргIарбараквала а-Конгресс архъйагIв секретарь Гьыцба Инар Апсны АуагIа Райззара дадепутатхатI. Адепутат йборчпI Апсны акъральгIвчва разыгIальаматраква йхчарныс, а-Конгресс агвыпгьи ауи ацIыхъва йтагылапI.

А-КОНГРЕСС АХАЧIВ АПХЪАКВА

Йаргвану азаман а-Конгресс хачIвыта йаргылитI Апсны акытква зымгIва рпны ашIыпIа хъвшараква гIаныршарала анхара ацIыхъва йнардзара.

А-Конгресс йамурадпI аргIапсра йара-йара йынхауата ауыс аднагалырныс. ДзачIвызлакIгьи тшазидырра атахъыпI апхъахьыла хIдахIвраква, хIбзазара аныргIалра йрыщатазлуш хIцIасква, хIгвбайара, хIыбызшва гIахчара шакIву.

Цри бызшва гIащаквыжьра йгьи шIасдъа йазырхIара. Ауи ахIатырла йалакIу анаука йгьи арыпхьара проектква лыхра. ЧкIвыныргIа анаука тшадыркIылра, йалкIгIата хIтурых, хIкультура, хIцIасква гIахъызтIуа история, абызшва, этнография нархараквала анхара йхънарыхра, ауи ахъазла аргвышхвагаква гIаныршара.

ХIуагIахъа шабгу, агвхъауаква, хIабашталагIвчва зымгIва йъанызлакIгьи йадызкIылуаш, йъазабадыруаш, абызшви атурыхи ддырдырырныс ъарылшуш, ауагIахъа культура апсып ъарзытагуш хабарпшгIарта штата йалуаш, джьгарта йынхуш хабарргага ргIапсра гIаныршара.

АПСНЫ АТШАУАЦIЫХРА АПРОГРАММА

УахьчIва йбзазауа абанпара рпахь атурых ахъазла магIын ду зму хачIвы гылапI – арыпхьара, культура, спорт рпны йпсахра атахъу лыхта ауат апсахраква акIвыршара, уызквгвыгъуш къральгIв жвлара гIаныршата тшауацIнарыхра, ауи ахIатырла агIвычIвгIвыс йзынарху алацIараква йрылархIара. Апсны ахъахвитра рыбагъьара, акъральыгIва тшауацIнарыхра рпны арат анархараква хъадапI.

Ауи гIаргвынгIвуата а-Конгресс агвып спортгьи, наукагьи, демографиягьи, культурагьи, згIвдарахчарагьи, шварагIварадарагьи, агIвыма къральква йырзыгарху политикагьи гIазцIазкIуа атшауацIыхра апрограмма лырхтI. Ауат зымгIва шалу Апсны акъральгIвчва рбзазаща анадзара щаквдыргылитI.

А-Конгресс агвып ауагIа рпахь ансимшы йгIагылуа ауысква агвныргIврала анхара абзазагIвчва гIаланаркIрала пышва бзи дырхIахьатI. ХIара акъраль шабгу хIгIахъыкIвшан йапшым акытква рпны рыцIа йыззыбжу тамамта йыгIдыритI.

ХIара борчта йхIыквпI кытипхьадза ахъазла кIьыда-кIьыдата ахачIвква лыхIхта йазакIу акъраль атшауацIыхра йапрограммата йадхIкIылхырныс.

ХIара гвылагьи псылагьи йхIтахъыпI швари хIари хIацыта ауи абзазара йалагIжьырныс.

АААК АУЫСХАРТАКВА

АшIыпIа хъвшараква Апсны акъала йгьи акыт 43 рпны дахIврала рынхара джвыквырцIахьатI. А-Конгресс хачIвыта йаргылитI ауи анхара акъраль шабгу, зпхьадзара 150 йнадзауа акъалакви акыткви зымгIва гIаланаркIра. Апсны утыцIта ауысхартаква къральти штати 10 рпны йынхитI: Санкт-Петербург, Москва, Къарча-Черкес, Къабард-Балкъар, Ставропольшта, Трыквшта, Германия, Нидерланды, Бельгия, Великобритания.

АуагIахъа йрыуу йъабзазалакIгьи ауи анхара йгIаланаркIра ахIатырла абзазартаква рпны а-Конгресс ауысхартаква гIандыршитI, ауат щъата йырзалитI рахIа йджьгару, згьагьара зпсахра йазыхIазыру, абзазара рыпшдзара йалазара зтахъу агIвычIвгIвысква. Ауат йырхIвауала акIвпI шIыпIипхьадза апны рыцIа магIны зму, АААК анхара зладжвыквнацIуш ауысква шщаквдыргылуа. Ауат акыт йа акъала йту атгIачваква райхIара зынйауа абаргвыраква йгIарыквхта йгIалырхитI.

Ауи апш дгылща абзазагIвчва ахачIвква рлыхрагьи а-Конгресс ацхърагIарала рырхъйарагьи йрылазларныс лщарата йачпитI.

ЙалкIгIу гватра азалнахитI а-Конгресс гIвычIвгIвысипхьадза йылшараква гIардырра. Кытипхьадза атшауацIыхрала ахачIвква анлырхуа ауатгьи тшрыквдыргIапситI. ЙайхIатагьи йхIхIвапIта, зцри кыт йа акъала йтыцIхта датша зджьара йбзазауа ауагIа – апхьахьаква, айъазагIвчва, арыпхьагIвчва, ахIаракьатчпагIвчва – рпышвагьи рдырраквагьи гIадрысабапитI.