Барганджиа Саид

Адуней апсуа-абаза конгресс ЙхIаракIу асовет аунашвачпагIв Эгьзакь Мусса абаза уагIа тшырзынайырхауата зымгIвагьи Асквш ШIыцли а-Кьырса агвыргъьахъвли драйхIвахIвтI. Ауи йшгIаликIгIазла, йагIвсыз асквш 2018 ауацIа апсыуа-абаза уагIа рсабапагIа алата магIны зму нхара ду акIвшатI.

«УыжвгIанчIви заман адуней шаъула, шIырпшыра змам апсыуа-абаза бызшва, абаза уагIа рапхъанчIви цIасква ргIахчара ауыс магIныта йаму рыцIа-рыцIа йхъалитI. УахьчIвала хIыззынадзаз агIатгараква рпны хIгIашIамсуата йазакIу аэтнокультура гьагьара агIаныршара хIадынхалра атахъыпI, йазалху хIгватра рзынахIырхара атахъыпI абызшва, акультура, ацIасква ртшауацIыхра, амальта, лшарата йхIыму зымгIва абгата йгIахIрысабапра атахъыпI йатгIачвакIу абаза уагIа рабабара джьгарта йымгIвайсырныс ахъазла», – араса йгIанахIвитI ахIвахIвра тшазынархара атекст.

Эгьзакь Мусса йгIаликIгIатI йацIагылата йынхауа агвып ду рбзирала здырраква йрылазырхIауа ауагIа рыцIа-рыцIа йшщардахауа, рпхьадзара рыцIа-рыцIа йшалахIауа АААК йгьи «Алашара» адкIылара йадыргалуа апроектква йгIарылалуа агIвычIвгIвысквагьи.

АААК ЙхIаракIу асовет аунашвачпагIв йазхъайцIитI абаза уагIа йгIарылцIыз дзачIв гIвычIвгIвысызлакIгьи «адуней агъьичIвырныс, бзиракI йчпарныс, апсыуа-абаза уагIа ртшауацIыхра йгвгьи йпсгьи алайцIауа дазынхарныс йтахъыта й-2019-хауа асквш шIыц дшапылуа».

«ХIацIагылырквын мурадта йхIкIуа зымгIва гIахIдахIвуаштI!» – йхIвитI багъьата Эгьзакь Мусса.

Йажва цIхъва айтуата Эгьзакь Мусса атгIачва рпхарала йырчву, аргванкви ацрикви гвапата йабазырбауа агвыргъьахъв лашарала зымгIвагьи драйхIвахIвтI, йырзитахъпI азгIвадара багъьа, анасып, абзибагIа, абзира, амамыр.