Адуней апсуа-абаза конгресс йаланакIуа чкIвыныргIа рсовети апхIвысква рсовети Согъвым адзтшпыурам апны асабиква гвыргъьахъв рзадыргалтI.
АААК йарыхIазырыз агвыргъьахъв программа сентябрь а 30 Согъвым адзтшпыурам апны дугьи хвыцгьи азнаддатI: акъала абзазагIвчва рыла аквшвун а-Конгресс адамыгъа зныта араъа йгылаз ачатыр – агвыргъьахъв джвыквмылскIва ауи агьагьара ауагIа жвпIарахахьан.
Асабиква йрымагIальаматдзата йазцIгIун а-Конгресс адамыгъа йану анапIсаргвыцIи айачIвакви йгIарныцIуа, араъа йаъазлуш, даргьи ари атшын апарад апны йырбаз айсыга техника – атанккви авертолеткви – йрыквчважвун.
Асабиква рыхъазла агвыргъьахъв АААК йаланакIуа чкIвыныргIа рсовети апхIвысква рсовети йадыргалтI. Аныгьи арыгьи щарда мцIуата ажвлара адкIылара йаларцIатI, йзаларцIазгьи швхIаусыгIва амапI. А-Конгресс ауысхагIвчва чкIвыныргIа рыдынхалра гватра ду азыбачIвта йырпхьадзитI, ауи ахIатырла ареспублика акытипхьадза рпны чкIвыныргIа ршIыпIа хъвшараква гIандыршуштI. Датшагьи йгIалыркIгIауа нархарата йаъапI Апсны йджьгару ахIвссаква адкIылта акъраль йахъвуш уыс йадыргылра.
АААК ачкIвыныргIа рсовет аунашвачпагIв Торчуа Леван йшихIвауала ари ауыс зымгIва йрапхъата йыззадыргалыз ахвыцква ракIвпI: ужвы уалагата ауат руагIа рфырра рхъа аладухауата йгIадзныргылра, акъраль атурых рахIвра атахъыпI.
«Агвыргъьахъв пшдзата, ухънахуата йакIвшатI, асабиква согIа щардагьи лахIвара пшдзагьи радзатI, аниматорква ауат рыла дырпшытI. Швабыж гвлахIарата йалан ауи ауагIахъа гIахIвыщаквала анкъвакъвра. Анкъвакъвра ажюри йалан дара апшыгIвчви «хIыйачIва» хвыцчкIвынкви – Тачулия Милени Адлейба Валерии. Ауат ъарбагIвацазгьи асабиква ргвы швабыж йгIащтIнахтI. ГвынгIвырапI згIахIвыща гIазырбарныс зтахъхаз шщардагIвыз», – йхIватI Торчуа.
Йагъьу ахъацIа гIахIвыща ахъазла согIата йпшцIан зыжвла абазу анапIъаза Соснакъ МухIамад йчпаз АААК адамыгъа зну ачIвгIва. Йара ауи йчпатI ахIвссаква йырзалырхыз асогIагьи – ауагIахъа харпчарква зну амхв. Ари ауыс йацнакIтI «Согъвым» тквандугьи – ауи зчIву асасчва зымгIва закIы-закI хъагIарахьшвашва рырттI.
АААК архъйагIв секретарь Гицба Инар йшихIвауала, АААК ачатыр ахIбачвагьи гIадгылтI: ауат а-Конгресс уалал шауаш рдырра ртахъын.
«Йызтахъыз зымгIва йара араъа анкетаква нарахвта йатахъу таргIвырныс лшара раутI. ХIара а-Конгресс йазынарху ажва пха щарда хIагIатI. АуагIа гвышхвара рылата хIадкIылара йгIащтIнахуа ауысква йрыцыркIитI, АААК йакIвнаршауа анхараква йгIарылалра, апроектква закIыла йрыхъвара ртахъыпI. ХIара хIхабар шырдыруа хIырхъвыхра хIтахъыта а-Конгресс атурых йгIацIанакIуа агIаншараква йырзынархата анкъвакъвракIгьи акIвхIыршатI, йгIайззаз ауаъа джьгаррата йгIадырбазгьи джьахIщатI», – йхIватI Гицба.
Адуней апсуа-абаза конгресс атурых йазынархаз анкъвакъвра азцIгIараквала йалан. Ауи акIвзыршуз йгIайззакваз тшырзынайырхунта АААК шгIаншаз, Апсны апны ауи уыста йархъйауата йырдыруала дырцIгIун.
Асасчва дрыуата чкIвынкI зымгIвагьи гвы йырттI: ауи азцIгIараква джьауап тамам ритуан, а-Конгресс ауысква бзита дшрыхагIвазу гIайырбун. «Ауатква зымгIва абаудыр?» – хIва
йаницIгIа щарда мцIуата АААК апортал тшаницIата ауаъа йту агIвыраква дшрыпхьаз, адкIылара атурых йгIаквчважвауа алонгрид штшахайыргIвазаз йхIватI.
«ЙазакIу йгьи йузагIвымшуш. Адуней апсуа-абаза конгресс атурых йгIалхпI»: алонгрид апшра >>
Агвыргъьахъв гIвгвчIагIв фондкI – БОО «Киараз» йгьи КБФ «Ашана» – рхъпшылра йацIу асабиква гIадрайгватI. Ауат рыхъазла йдрыхIазырыз йгьсогIагIвацамызтI.
Ауи апшта КБФ «Ашана» АхъпшылыгIвчва рсовет аунашвачпагIв Хагба Изольда айсра йалаз ауагIа рсабиква разыра сальамшвъа рытра ауысла адгалагIвчва ргIаджвыквцIара гIалылкIгIатI.
«ГвапагIарапI ари ауыс адгалагIвчва йазалху гватра БОО «Киараз» йгьи КБФ «Ашана» рхъпшылра йацIу ахвыцква, асквшква 1992-1993 рагIан йакIвшаз Апсны ауагIа р-Абашта айсра йалаз айсчва ргIариква йъарзынадырхаз. АсогIаква йырхъазымкIва сабипхьадза йаба йзынарху аразыра ажваква зну, ауи фырта дайсуамца зымгIвагьи йацыхIчIву айгIайра шгIайраргвануаз гIазхIвауа сальамшвъа йырттI. Са сшапшуала, ауи швабыж угвы зхвгIауа адгылщапI, йауа ухIварыквын, асабиква йрыларымхIварнысгьи ауаштI айгIайра апны дзачIвызлакIгьи – дара рабачвагьи рылата – йалацIара магIныта йаму. Арат асальамшвъаква ауат рабачва рыхъазла рхъа ду йддырбахуаштI, ауи хвы аквуымцIушта йгьаъам», – лхIватI Хагба.
БОО «Киараз» архъйагIв директор Гопия Кама йгIалылкIгIатI ауат рорганизация йызцынхауа «Аквафон» компаниягьи рыцта асквшква 1992-1993 рагIан йакIвшаз Апсны ауагIа р-Абашта айсра йалаз айсчва ргIариква цхърагIара кIьыда шддрайдзауа.
«АйгIайри Ахъахвитри рымш уагIахъала артлапIара йапхъахауата хIалалитI. АААК ари ауыс йагIаджвыквцIагIвхатI йгьи айсчва рсабиква йырзалху программи асогIакви арыхIазыртI. Ауи абзирала хIара лшара хIауитI айсчвагьи ауат рсабиквагьи «Анчва дшвзыразхатI» – хIва рахIхIвырныс. ХIара хIызхъпшылквауа, йалкIгIата ажвлара рпны згыларта хIагIам, йгIаргвынгIвра атахъыпI даргьи акъральыгIва ауыхвагIвчва рпхьадзара йшалу, йхIпхыцIахуш даргьи йшыруысу, хIпсадгьыл ахъазгьи даргьи джьауап шыркIуа. Ауат рабачва йырзынарху аразыра швъаква анрыхIтуа асабиква рпахь йгIазрийыз рыхв щтIыхIхитI, йауа ухIварыквын, ауат рабачва хIара айгIайра, амамыр, ахвитра хIызгIаргтI, дара асабиквагьи ауат рымгIва надырдзара атахъыпI!» – йылпхьадзитI Гопия.
АйгIайри Ахъахвитри рымш йанакIвызлакIгьи Апсны акъала хъада апны ареспублика агIвынаква зымгIва йгIартыцIуа ауагIи Согъвым асасчви азнакIкIитI. Дугьи хвыцгьи агвыргъьахъв уысква йрылазлитI, азаджв азаджв йайхIвахIвитI, АйгIайра рызгIазгыз афырква йрызхIвахIвитI. Асквш 2018 агIан Апсны асквшква 1992-1993 рагIан йакIвшаз Абашта айсра апны йгIатыргаз асквш 25 артлапIитI, ауи зынгьи йапшымкIва йауацIыхта йгьи гвыргъьахъв дута йакIвшитI.
Дети в восторге, а это главное. Спасибо всем участникам.
Было очень эмоцианально. Спасибо всем кто был рядом.
швталра йа тшаншвцIара атахъыпI.