Барганджиа Саид

Адуней апсуа-абаза конгресс ауысхагIвчва Апсны акытква рапхьартаква апсуа хIарыфкви ауагIахъа дамыгъакви зну атетрадква, амшгIвыраква рыларшатI, асабиква злахъвмаруаш йапшым атопквагьи рырттI. Ари акция сентябрь а 1 йазынархапI, йаргьи йгIванхауата йакIвшитI.

ЗымгIва шалу сынчIва а-Конгресс Апсны акытква рапхьартаква тетрадь 4000, мшгIвыра 250, футбол, волейбол, баскетбол, гандбол йызласуаш топ 650 рнатуаштI. Атопква Трыквшта апны йгIаныршу ХIапIатI АхIмад дызхъаду а-Конгресс ашта хъвшари Трыквшта апны йаъу АААК ашIыпIа хъвшаракви йрылакву йгIарщтийтI.

АААК архъйагIв секретарь Гицба Инар йшихIвазла, асогIаква зымгIва йапхъахауа акласс йцаз апхьагIвчва йырзалхпI.

"[ЦIыпх йашIуырпшрыквын] сынчIва асогIаква амшгIвыраква гIарылахIатI. Апсны апны амшгIвыраква йапхъахауата апсуа бызшвала йгIацIцIтI. АмшгIвыра ахъкъьа йану асурат йбергьльу апсуа макъымршIыйагIв йгьи асуратчпагIв Квициниа Астамур йгIвытI", – йхIватI Гицба Инар.

Ауи йшгIаликIгIазла, акция Дурыпщ, Уарча, Джьырхва рпны асогIаква ршауа йджвыквырцIатI, ужвыгьи Лыхны, Квланырхва, Дранда рпны йакIвшуштI.

"Апхьартаква рпны пхата йгIахIпылтI. ЗымгIвагьи атетрадквагьи амшгIвыраквагьи апсуа бызшвала йъагIву гватрадъа йгьгIанырмыжьтI", – йхIватI АААК архъйагIв секретарь.

Дурыпщ кыт апны йгIаныршу АААК ашIыпIа совет унашва ахъызцIауа Твано-архук квтанай апхьарта арыпхьарала ахъвшара аунашвачпагIв Агвмаа Илона АААК агватра рапхьарта йаназынанархауа сынчIва йшахъазым гIалылкIгIатI.

"А-Конгресс цхърагIара ду гIахIнарадзитI. Ауи швабыж йхIгвапапI. ХIара багъьата йхъахIцIитI хIайгвара шауыразлуш", – лхIватI Агвмаа Илона.

Дурыпщ апсуа апхьарта адиректор Хагба Ханна лгватра акытква рапхьартаква уахьчIвала баргвыра щарда йшрынйауа йазыналырхатI. Апхьартаква рунашвачпагIвчва зымгIва йрапхъата йызщту апхьагIвчва акыт апхьартаква шкIадымрышвуаш акIвпI.

"ХIара хIызларбалакIгьи хвы аквхIцIитI. Ари согIа бзипI. Анчва дырзыразхатI зымгIвагьи!" – лхIватI Хагба.

Квланырхва аквтанай апхьарта анхагIвчва гвып рыхьызла Адуней апсуа-абаза конгрессгьи ауи ЙхIаракIу асовет аунашвачпагIв Эгьзакь Муссагьи йырзынарху аразыра ажваква лхIватI апхьарта аунашвачпагIв Цушба Асидагьи.

"Асабиква атетрадквагьи амшгIвыраквагьи швабыж йыргвапхуштI. Анчва дшвзыразхатI хIъашвхъмаштылыз, швабыж йхIгвапапI швгватра хIъалшвымхыз", – лхIватI адиректор.

ЙагIвсыз, 2019-хуз, асквш агIан Адуней апсуа-абаза конгресс Апсны апны йапхъахауа акласс йцаз асабиква зхъкъьа ащтахьла апсуа хIарыфкви ауагIахъа дамыгъакви зныз тетрадь 5000 рнаттI.