Анйара гIахъылтIуата Адуней апсуа-абаза конгресс йаланакIуа Апсны апхIвысква р-Координация совет аунашвахъцIагIв Бебиа Екатерина лысасчва – айгIайра апны залацIара «гвы арымтуата, йаквнагауа хвгьи акврымцIауата» йгIанхалауа апхIвысква – йгIайззакваз йрабалырдыртI.

АйгIайра гIараргванра апны апхIвыс лалацIара: АААК уатыкв айчважвара аднагалтI

© АААК

«ХIысасчва рыуа дзачIвызлакIгьи лара лтурых, айгIайра апны лара лалацIара лымапI. ЙгIалскIгIара стахъыпI араъа йаъакву кIара ззырымхIвас агIвычIвгIвыс дуква шрылу. Сара йстахъыпI ауат рхабар ауагIа йыргIарныс йгьи йырдырныс», – лхIватI ауи.

Ларгьи зымгIва кIьыда-кIьыда дгIарыквчважватI.

«Араъа дхIылапI афыр йан, зпа айсра даладзыз АмкIваб-Амычба Ирина. Ауи лылахь ауаса йцан – йгIвыджьхуз лпагьи дылнапIыцIцIтI. Ауи йынцIра айсра амщтахь йгIанхаз амина йшIначIватI. АпхIвыс дпхащитIта лылдзгIараква йхътIыта зынгьи дгьрыквымчважватI. ЙанакIвызлакIгьи лхьыгIа лхъазы йылгауа аламбарта дгIанхун. Араъа йаъапI Шармат Льуни Ашуба Аиди. Ауат хIтурых ахъазла хвы зквцIауачву материал азызкIкIыз хIвсысапI. Ауат хIрыцта хIара айсра йаладзыз хIайсчва рхабарква азхIкIкIуан, ртгIачваква хIрызцун, ашвъаква, акIартква, асальамшвъаква гIахIауан. Ауи йхьантаз агIамта заджвгьи ауи хIчпарныс дгьгIахIымхIвузтI, хачIвытагьи йгьхIыздмыргылуазтI, ауаса хIара ауи агIангьи йгIахIгвынгIвуан ауатква зымгIва йгIайуаш абанпараква рыхъазла йгIащаквыжьра шатахъу. УахьчIвала ауат аматериалква ймачIу рхъвыкI скнига шIыц йащатахатI. ЙхIылапI араъа ахIвсса фырква – зайщчва йрыцта ахьыгIа, ашвара, абаргвыраква йгIарылста ари айгIайра хIызгIазгыз Ашуба Нанульи Бгъанба Марини», – лхIватI ауи.

СогIвым йаъу АААК ауысхарта аунашвахъцIагIв Реквава Темур асасчва сальам пха райхтI. Ауи ари анйара магIын ду шаму, ари йапшу айззараква рыцIа щардата йакIвыршалара шатахъу гIаликIгIатI.

«Йбзу афырква уанрынйауа ауат убарныс, урачважвата атурых зларгIвуа ахабарква урыздзыргIвныс лшара уауитI. МагIын ду рымата йызбитI агIаншараква зыла йыцIсыз ауагIа рынйараква. Ауат ракIвпI ацIабырг здыруа, йырхътыцIыз ашIаква йразхIвуа, ауи ухъураштыл йшамуаш гIаргвынзыргIвуа! АААК ЙхIаракIу асовет аунашвачпагIв Эгьзакь Муссагьи хIгвып шабгугьи рыхьызла пIатIу шшвыквхIцIауа, швгIапсари швфырри рыхъазла хIшшвзыразу швасхIвра стахъыпI», – йгIаликIгIатI ауи.

Айчважвара йалакваз райсра йгьи рмамыр бзазара йауу агIаншараква гIархIвахтI. Рпачва-фырква йырзынарху угвы йалалуа, уызрынашхыйауа агIагвалашвахраква, рахIа йхьантаз агIамта агIан хвы зквцIауачву аматериалква «йшблыблыркIвуз» йшазыркIкIуаз аквчважвара, ахъачва рапшта абджьар зкIыз апхIвысква ргIахIвахраква злымсыз, зыладз гIацIрымцаз заджвгьи дгьгIанымхатI.

Анйара йаъаз журналистика факультет астудентква агIахIвахракви атурыхкви йалкIгIата йрыздзышуата йрыздзыргIвуан. Ахъмаштылра, Апсны акультура абайаракви ауачIвымши руысла айчважвараква йрылалуан.

Анйара ацIыхъва ауатыкв айчважвара йалази асасчви АААК аунашвачпагIвчва, а-Конгресс йаланакIуа Апсны апхIвысква р-Координация совет аунашвахъцIагIв Бебиа Екатерина лхъатала анйара ъадыргалыз, пхата йъадрайгваз ахъазла рразыра ажваква рзынадырхатI.

Апсны апхIвысква р-Координация совет  Адуней апсуа-абаза конгресс йаланакIуа, зынхара Апсны ахIвссаква руагIахъа стратегия йацкIра йазынарху гIаныршарапI.