АпхъанчIви гIамта

Абазаква зыщайдза Россия йаъу, апсуа-адыгьа бызшва гвып йрыланакIуа уагIахъа мачIпI. Россия апны абазата зыкь 40-гIв райхIа бзазитI. Апсуакви абазакви йалата йазакIу Абаза уагIахъа гIандыршитI. Россия апны абазаква йалакIыта Къарча-Черкес йаъу 13 кыткI рпны йбзазитI, ауат акытква рыуа азджьакI Абаза район йаланакIитI. АгIвыма къральква йырту абазаква зъарагIвы йнадзауа йапшымкIва йырпхьадзитI, зкьы 100-гIв йгIашIарышвта зыкь 250-гIвдза йнадзауата рхIвитI. Ауат къраль 20 райхIа рпны йбзазитI, ауаса райхIарагIв КIавкIаз айсра амщтахь йъатанагаз Трыквшта, Сирия, Иордания рпны йтапI.

Абазаква КIавкIаз Ду апны йавтохтонпI (рыщайдзаква ауаъа йаъапI). Ауат уагIахъата КIавказ ащхъаква агIвадахьылагьи алагъьлагьи йгIарыднакIылуа ашIыпIаква рпны йщаквгылтI. ХIэра апхъала IV–III асквшызкьква рагIан абазаква рапхъанчIвиква КIавкIаз щхъаква рыгIвхъатакIлагьи йбзазун, ауи йаквшахIатхитI археологква йгIарауыз, абазакви апсуакви рпсчва шыцIарцIуз апшта йаныргIалу апхъанчIви нышвынтараква. Дара ауат йрапшта Къвбина дзыгIв йалачIвауа Теберди Гьашвари ртшпква рпны йгIарауыз анышвынтараква абазаква рапхъанчIвиква хIэра апхъала III–II асквшызкьква рагIан ауаъа йшбзазуз гIадырбитI.

Атурых

Абазаква VIII асквшышв ацIыхъваква рагIан йаргвану ауагIа гвыпква адызкIылта Абазгь паштыхIыгIва гIанзыршаз абазгьква райшата йгIархъшаз уагIахъапI. Ауи апаштыхIыгIва КIавкIаз апынгьи ауи ухъыстагьи йбзазуз ауагIахъаква ркультура йгьи рполитика бзазара щардала йапсахтI. Кьристан дин нкъвызгуз абазгьква архитектура чвахъабага щарда гIартынхатI, ауат ужвы йъагIадзазгьи Апсны апынгьи Лагъь КIавкIаз апынгьи йаъаркIвапI. Аурышвква «обез»-хIва йызпхьуз абазгьква ХI асквшышв ацIыхъваква рагIан Киев апны Киев-Печера лавра а-Успен кьльиса сурат анызцIуз йрылан: афрескаква ргIвуан, алтарь хIахъв зигIвала йдрыпшдзун. РыцIа кIьасата Киев рахI Изяслав Мстислав йпа абазгь ахIпхIа пхIвыста дгIайахвын Киев дигатI.

XVIII асквшышв аквтаква рагIан абазаква рылахь алазгIватIыз КIавкIаз айсра гIалагатI. Абазаква рыуа щардагIвы айбащраква йрыладзтI, щардагIвгьи Осман империяла йхъырщттI. ЙгIанхаз рыщхъаква йгIартырцан агъвгъвара йгIатарцатI. Сквшы 100 айхIа йнайыз айсра ауацIа Квта КIавкIази Амшын КвайчIви рпны шта ду зкIуаз абазаква радгьыл щарда рыквырхтI, руагIа райхIарагьи рчвыдзтI.

Абаза бызшва адуней апны рыцIа йбаргву абызшваква йрыуапI. Ауи бжьыта 73 алапIта ауат йрыуата абыжьхътIква гIвбазаджвыкI ракIвпI йнадзауа, цIабыргыта, ауат датша быжьквакI йанрыцгIайуа быжьхътI шIыцгьи гIандыршитI. Абаза бызшва гIвдиалекткIта йшапI (тIапIанта йгьи щхъарауа), ачважващаква пщба йнадзитI. Алитература бызшва йащатахатI тIапIанта диалект акъвбина-албыргIан чважваща. Абаза бызшва рахIа йаргвану апсуа бызшва акIвпI.

УагIахъа дамыгъата абаза нып рымапI. Ауи пщырцата йчпапI, аквта агъьма напIсаргвыцIа аныпI. АнапIы ахъахьла гьагьата быжьйачIвакI ахъадзгылапI. АнапIсаргвыцIа Абазгь паштыхIыгIва агIанищтара апсуа-абаза къральыгIвара йадамыгъата йгIамгIвайситI. АбыжьйачIвакI уыжвгIанчIви абазакви апсуакви рапхъанчIвиква ъабзазуз абыжьштакI йыргIарбагапI: Садзшта (Джигетия), Бзып-Гвмаа, Абжьыуаа, Самырзакъан, Дал-ЦIабал, ПсхIвы-Айыбгъа, Абазашта.