АпхьагIвчва ртшпсщара заман дырра чIыда шрауаш апшта йадгалра йазынарху АААК апроект «Аимадара» апкъ йтата асквш 2023 агIан амдараква май мыз йалаган йакIвдыршатI. Ауи агIамта ауацIа ауи ареспублика абыжькыткI – Аацы, КвтIол, Тхьына, Бедиа, Баслахв, Жвандрыпщ, Хыпста, Гал къала йгьи Афон ШIыц йаъу арыпхьара квта «Апеипш» гIаланакIтI. Ауи акIвымкIвагьи «АшIара йапхъахауа ринклюзив адкIылара» рыцта зызгIвадара аъаща йгIалцIла зылшараква ахъарысу чкIвыныргIа рыхъазла Афон ШIыц апны амдара мшы адыргалтI.

Апроект мурадти хычIвыти йаму гIайхIватI ашIыпIа хъвшараква рыцынхарала АААК ахъвшара аунашвахъцIагIв Жьыба Дмитрий.

«Аимадара» проект асквш 2019 йгIашIарышвта йынхитI. Ауи мурад хъадата йаму ацIайква Апсны йаъу, акультури атурыхи йырпщылу ашIыпIаква йырцара, ртшпсщара сабап алата йадгалра акIвпI. Асабиква райхIарагIв ауат ашIыпIаква йапхъахауата йырбитI, даргьи абадыритI, рконтактква амырдитI. Сквшипхьадзагьи апроект йгIалалра зтахъыта тшгIахIзыназырхауа ашIыпIа хъвшараква рпхьадзара рыцIа-рыцIа йщардахитI. ХIара, ажва аламкIва, йшхIылшауа апшта ауат агIаджвыквцIараква йрыцхIкIитI», – дацIачIвагъватI ауи.

ХIызту асквш ауацIа 7 амдаракI адгалан. Аэкскурсияква анлырхуа Апсны амарагIайыртала йбзазауа амараташвартала йшыргуш, амараташвартала йбзазауагьи амарагIайыртала йшыргуш апшта йагвындыргIвитI. ЙхIвара атахъыпI сквшигIадзагьи йгIамырдауа ашIыпIаква рыцIа-рыцIа йшрылахIауа.

«Аразыра ажваква рзынасырхара стахъыпI хIыгIвзачва, йхIыцынхаквауа, хIгIаджвыквцIараква йрыцызкIуа, пшырта хIзызчпауа зымгIва. Ауи ари апроект йшахъаз амдарам, швари хIари хIадызкIылуа йшуысу йаквшахIатхитI», – йгIацицIахтI Жьыба.

ЙцIыхъвахуз амдара Гвдауыта район йаланакIуа гIвкыткI – Жвандрыпщи Хыпсти – рапхьагIвчва йырзадыргалтI. МшкIы ауацIа апхьагIвчва 50-гIв Уатап кыт апны Абраскьыл йхIатшпы, Мыкви Бедии рпны акьльисаква йыргатI. АмгIва йарыгIапсазтынгьи ацIайква рнашхква бзийын.

Ауат Очамчыра район йъацаз лахIварата йгIарыланацIаз рхIвахтI.

«Сара зынгьи Очамчыра район сгьаъамызтI. ЙджьаущитI араъа ауи апхъала йхIымбасыз шIыпIа пшдзата йаъадзу. ЙалкIгIата Бедиа акьльиса джьасщатI. Ари йахьчIва хIамдара анцIрала сгвы йгIатахушызшва йызбитI», – лхIватI аэкскурсия йалаз Джьарсалиа Камилла.

«Аимадара» проект асквш 2024 агIангьи йакIвшуштI. АшIыпIа хъвшараква рыцынхарала АААК ахъвшара аъачIвагIагIв Симония Херсон йшихIвазла, «хIапхъа апроект йгIалалра зтахъкву аъахьапI».

«Амдараква рагIан хIкъраль йапшым ашIыпIаква рхабарква рхIвалитI. Апроект магIныта йаму рыцIа бзита йгIаузырбауа асабиква рлахIвараква ракIвпI. Ауат апроект азыгIальаматрата йазрыму анубара, ага йбаргвызтынгьи, амаршрут адгалра уаквнаргвышхвитI. ХIара арыпхьагIвчвагьи ан-абачвагьи асквш 2024 агIангьи аэкскурсияква адыгIгалырныс йахIвауата тшгIахIзынадырхитI», – йхIватI Симониа.

 «Аимадара» (ауи апхъала – «Ащтра») проект «Амч» жвлара адкIыларагьи алата асквш 2019 агIан йджвыкврыжьтI. Ауаса пандемия ангIалага йашIадрыстI. Асквш 2022 агIан а-Конгресс ауи йаквгIацапахтI. Ауи агIамта ауацIа апроект апхьагIвчва 900-гIвы раъара гIаланакIтI.