АшIыпIа хъвшараква рыцынхарала Адуней апсуа-абаза конгресс ахъвшара «Аимадара» проект апкъ йтата Апсны ашIыпIаквала амдараква атаджвыквнацIахтI. Апсны акъральыгIва музей, Гулиа ДырмытI йтдзы-музей, СогIвым амимункIырта, АмхIаджьырква рдзытшпурам – арат зымгIва йгIархъыкIвшатI КапIба С.Е. йыхьыз зхъу Арасадзыхь 2-хауа апхьарта апхьагIвчва.

«Асквш 2024 агIан «Аимадара» проект аджвыквыжьхра Гулиа ДырмытI йысквш 150 йаквхIыршварныс йаквхIкIтI. АгIвгIвы йтдзы-музей йахъазымкIва ацIайква датшагьи аджьащахъвараква шдхIырбушыз хIазхъвыцтI», – йхIватI ашIыпIа хъвшараква рыцынхарала АААК ахъвшара анхагIвы Симониа Херсон.

Аэкскурсия Апсны акъральыгIва музейла йгIалагатI. АцIайква апещква зымгIва йырнардылуамцара апхъанчIви заман йгIашIарышвта уахьчIвамшдза Апсны атурых рархIвтI. АпхьагIвчва йрымагIальаматдзата апсуаква рбзазари ргвбайари йырпщылу апкъыгIваква йырпшуан, йрымаджьащахъвахатI ауат апсабара турых ахъвшара аэкспонатквагьи. Амдара йаналга асабиква амузей апшцIа апны йаму, апхъанчIвиква апсчва ъацIарцIуз ахIатгвын ддырбатI. Ауи амщтахь ауат Воронов Юрий йчвахъабага йазцан апхьахьа йбзазари йынхари йырзынархаз агIахIвахра джьащахъва йаздзыргIвытI.

СогIвым амузейква рпны: АААК асквш 2024 агIан «Аимадара» проект атаджвыквнажьхитI

© АААК

ЙгIвбахауа тыпта ауат апсуа литература ащатащтIацIагIв Гулиа ДырмытI йтдзы-музей йдырцатI. Апещква руацIа гIамдарала йгIашIамсуата асасчва шIаква агIвгIвы йгIайыквчважвауа афильмгьи ддырбатI, амузей апны йзызсакъуа йынкъвыргауа, йгIвыта йрыму ауи йбжьы йаздрыдзыргIвтI.

«ЗымгIвагьи йшырдыруа апшта, асквш 2024 Гулиа ДырмытI йысквшта йдыртлапIитI. Ауи абзирала уагIата йхIызгIайуа агалагьи йщардагIвхатI. Угвы йалахIитI акъала абзазагIвчва йырхъазымкIва, уахьчIва апшта, акытква йгIартыцIта уагIа ъахIызгIайуа. Гулиа ДырмытI апсуа кыт, ауи акультура, алкIгIараква бзибара ду рызйыман», – лхIватI амузей адиректор Корсайа Светлана.

Ауи йшылхIвазла, Арасадзыхь апхьагIвчва ауысагIв йыршIыйара бзита йырдыруата йгIацIцIтI, аджв аджв дапикъьахуа збарла ауи йуысаква гIархIватI. Ауи амщтахь амдагIвчва ргвып а-Конгресс анхагIвчва рыцта СогIвым амимункIырта йцатI. Ауаъагьи тшытракI рыла пшытI.

Ауи амш асабиква райхIарагIв амимункIырта рыцIа ргвы йгIатахатI. МачIкIгьи йацIырхIауамца дасузлакIгьи амимунква йырчатI, рчпащаква йырхъвыхтI.

«Амдара швабыж йджьащахъван. ШIыцрата йыгIдырыз зъарайа! ЗымгIва рацкIыс лахIвара гIахIылазцIаз амимункIырта акIвпI – хIыуа щардагIвы ауаъа зынгьи йгьаъамызтI», – лхIватI апхьагIв Амычба Миранда.

АдгалагIвчва «Аимадара» проект надырдзара, шIыпIата йгIаланакIуа дрыщардара ргвыгъапI.

«ХIара апхъахьылагьи асабиква дырра шIыц гIазлырхуа амдараква адыгIгалуаштI. ЙахьчIва амдара йащтагIайуата ацIайква Апсуа къральыгIва драмтеатр апны «Йари лари» ргылчIв йапшырныс билет рызгIахIахвтI. Аспектакль Гулиа ДырмытI йгIвыра «АчкIвыни апхIвыспи рсальамшвъаква» йгIахъырхын йдыргылтI», – йгIаликIгIатI Симониа Херсон.

Уыс щардала йырчвыз амш амара нурква гIазквпхуз АмхIаджьырква рдзытшпурам апны амдарала йалдыргатI. АпхьагIвчва щыбжьан йырчара шатахъызгьи гьырхъмаштылтI – ачара а-Конгресс акъарула йадыргалтI.

«Аимадара» проект чкIвыныргIа йджьащахъву, турых зпщылу ашIыпIаква шырдыруаш йазынархапI. АдгалагIвчва йыргвыгъапI ареспублика акытква йырту асабиква апхъахьылагьи кIара узырдыруа амдараква рзадыргалларныс.