Асквш 2024 агIан АААК йджвыквнацIауа апроект шIыцква йрыуапI акытква рапхьартаква рапхьагIвчва ажвлара хачIвлыхра ащатаква йырзыбжьара.
Хвтаба Алиса
Ари апроект АААКи чкIвыныргIи спорти руысквала АкъральыгIва комитети дахIврала йшацынхауа йашвапхакIпI. Апсны йауата цапхьартакI йгIалырхуа закIы-закI проект дырхъйарныс лшара рымазлуштI. Ауыс гIалазгазгьи, йадызгалуагьи, ацIайква ахачIвлыхри афинанс гIальми рыщатаква йырзызбжьуш арыпхьагIвчва гIаланазыркIуагьи АААК акIвпI, ахча ауи аунашвачпагIв Эгьзакь Мусса йазгIауищтитI. Апроект архъйара грантла йацхърагIитI чкIвыныргIи спорти руысквала АкъральыгIва комитет.
Атренингква рагIан апхьагIвчва йазалху дырра раура йахъазымкIва ауат адырраква шгIадрысабапуашгьи тшазырбжьуштI. УахьчIвала ауи збальыгъ йнадзаз чкIвыныргIа рыдынхалрала рахIа сабап злу амальпI. АпхьагIвчва рыжвлара джьгарра гIазрыцIсуа рныбыжь йапщылу апсахракви айчважвара азгIашыкъри ракIвпI. Ауи чкIвыныргIа дырра йазнарыпшгIитI, йапшым ауысква гIащтIднарыхитI.
ГIвба-гIвба мшы йакIвшалуш атшыбжьараква йрыуата йапхъахуз АдзыгIвбжьа кыт апны 9-11 аклассква рапхьагIвчва рыхъазла йадыргалтI. Апроект акIвзыршауа жвлара хачIвлыхрала аъачIвагIагIвчва Чкадуа Лани Цквитария Мати аздзыргIвчва ахачIвлыхра ащатаква йрыхадыргIвазатI, ауи апш дырра уымазларныс злабзийу рархIвтI.
«АпхьагIвчва жвлара магIны зму апроектква ргIвуа, бюджет лырхуа тшырбжьара йахъазымкIва ацапхьартакI рпынгьи закIы-закI проект дырхъйарныс лшара рауаштI. ХIынхара йапхъахуз амш ажвлара хачIвлыхра йазынархан: проблемата йаъу закI шгIарылухуаш, амурадкви ахачIвкви шуыргылуаш гIаргвынхIыргIвытI, апроект ашвъа тамамта йштагIвуаш апшта ауи шаъу дхIырбатI», – йгIалылкIгIатI Чкадуа Лана.
Атеория анддырдыр амщтахь йгIвбахуз амш ауат адырраква шрызгIарысабапуа дырхъвыхтI.
АпхьагIвчва хгвыпкIта тшыршан гвыпипхьадза дара рпроект акомиссия йшддырбуш тшаздрыхIазыруан. Апроектква затахъу йалыргата йгIвра, ауат хчата рыуа закIы злауырхъйуш грант гIапшцIгара – ари акIвын агвыпква хачIвыта йрымаз.
Аспорт пещ ъамапсымала йадгалра, апхьарта апшцIа апны аквчIвартаква аларгылта тшпсщарта чпара, айшва уадзхъачIвата уызлахъвмаруаш ахъвмаргаква хвгIата чкIвыныргIа ртшпсщара дырра рызгIалгауата ларпшратагьи йырзалуата йадгалра – арат ахпроекткI аъачIвагIагIвчви апхьагIвчва ахIбачви гIвымшкI рынхара йацIыхъватшарахатI.Апроект агIаджвыквцIагIвчва йрыуазаджву арыпхьарали жвлара джьгаррали згIвадарахчарали АААК ахъвшара анхагIвы Хьышба Науыр йгIаликIгIатI:
«Атренингква гвыпла анхара анадзара шагъьхуш, ацIайква ансимшы йзынйауа абаргвыраква зладрыдзуаш амальква шгIарауаш йацхърагIитI. Адуней апсуа-абаза конгресси чкIвыныргIи спорти руысквала АкъральыгIва комитети рынхагIвчва злу акомиссия уахьчIва агIамта рыцIа йаквыргIапсу, рыцIа йузырхъйушта йаъу агIаджвыквцIара гIалнахитI. МагIын ду амапI акыт йауу ацIайква тшазыркIкIыта апроблемаква йрыквчважварныс, ауат амалькI шрызгIарауаш йазхъвыцырныс, йатахъхузтын – ауи ауыс ахъазла акъральыгIва йа ажвлара адкIылара ахча шгIауырщтуаш йрыхIварныс лшара ъарзыгIанхIыршауа», – йгIаликIгIатI ауи.
Айкьангьашраква рымщтахь акомиссия йалакву жвлара нархара зму проекткI гIалырхтI. Ага ауатыкв йгIатаргаз апроектква зымгIва магIны рымата йаъазтынгьи, апхьарта апшцIа апны апхьагIвчва рыхъазла тшпсщарта адызгалра зтахъхаз агвып рпроект рыцIа йгIалыркIгIатI. Йауа ухIварыквын, апхьарта автобус йъадзазпшуа ацIайква заман ауыра апахь йгылра йа ахIвра йылачIвара атахъхитI. КвчIварта аъазлузтын азпшра ауи апшта йгьарыгIапсушым.
Апроект унашва ахъызцIауа чкIвыныргIи физкультури тшауацIдрыхрала АААК ахъвшара анхагIвы Квициниа Есма апхьарта аунашвачпагIвчвагьи арыпхьагIвчвагьи апроектква ргIвра йшгIаламщщыз гIалылкIгIатI.
«АпхьагIвчва апроектлыхра йангIаланауыркIуа ауат ракъыль дрыпшгIитI, рыршIыйара гIадырбитI, ажвлара йырпщылу ауысква шуырхъйуш амальква гIарауа тшырбжьитI. АпхьагIвчва йгIахIдырбаз ахпроекткIгьи агIамта йгIанаргылуа ахачIвква йырзынархапI, сабап рылапI, йатахъыпI. Ауат дара апхьагIвчва ракIвпI йызгIаджвыквцIару – ртахъыраква йгIарыквхта йгIархIватI. ХIара – а-Конгресси чкIвыныргIи спорти руысквала АкъральыгIва комитети рынхагIвчвала йалу агвып – ари йапшу проект пхатша адгалра джьауапкIра ду азхIымата хIадгылтI, йауа ухIварыквын ауи ацIайква ахачIвлыхра ащатаква днардырра йахъазымкIва даргьи закI шрылшауа, зымгIва йрыхъвуш уыс бзикI архъйара ркъару шырзалацIауа рыладнархIвитI. ЧкIвынипхьадза йшйызхIуш апшта лшара йзыгIаныршара – магIын ду зму уыспI, хIара хIунашвачпагIв Эгьзакь Мусса ХIабальа йпагьи ауагIахъа рарыпхьара, ртшауацIыхра, рзгIвадара йырзынарху апроектква йанакIвызлакIгьи йрыцикIитI», – лхIватI ауи.
ЧкIвыныргIи спорти руысквала АкъральыгIва комитет чкIвыныргIа йырзынарху аполитикала ахъвшара аунашвачпагIв Къара-Уасман-оглы Идрис ауыс «мчыта йшджвыквлыз» гIаликIгIатI.
«Акомиссия йалакваз йыргвапхадзауата апроект йацыркIтI, хIаргьи аквчIвартаква змазлуш йхъгIву атып ауыхвара хъвдаквцIарата йнахIахвитI. Ауи апхьагIвчва йыртшпсщартахуштI, автобусгьи ауаъа йазпшуаштI. АпхьагIвчва йгIахIдырбаз анахьанат апроектквагьи гватрадъа йгьгIаныгIжьуашым», – йгIаликIгIатI ауи.
Апхьарта аунашвачпагIвчвагьи атшыбжьара йалаквазгьи чкIвыныргIа рдырраква йрыладырхIарныс, акыти ажвлари йрыхъвуш уыс дырхъйарныс лшара ъарзыгIандыршаз ахъаз ауыс йадгалагIву АААК анхагIвчва йшырзыразу рархIвтI.
швталра йа тшаншвцIара атахъыпI.