Апсни Къарча-Черкеси йгIартыцIта йызгIайыз агвып йрайгватI Адыгея Республика а-Хъада ХъвымпIыл Мурат. Ауи анйара адгалра дагIаджвыквцIагIвхатI Адуней апсуа-абаза конгресс аунашвачпагIв, «Алашара» адкIылара апрезидент Эгьзакь Мусса.
Агвып йалан СогIвым апны АААК ауысхарта унашва ахъызцIауа Реквава Темур, ахъвшараква рунашвахъцIагIвчва Хагба Изольди Жьыба Дмитрийи, «Алашара» адкIылара аунашвахъцIагIв Гьадыгв Мурати культура ахъвшара унашва ахъызцIауа Джьмакъвыл Нателли.
«АААК ЙхIаракIу асовет аунашвачпагIв Эгьзакь Мусса йгIахIыхъвдаквицIаз ауыс хIырхъйауата Адыгея Республика а-Хъада хIйынйатI. Анйара пхата йакIвшатI. ХIара йшхIылшуз апш йауацIыхта а-Конгресс анхара, агIатгара хъадаква хIрыквчважватI. СгвыгъитI ауи анйара щарда йнамихуата ауыс бзиква гIанарыцIсуашта. ХIара ареспублика а-Хъада пхата дъагIахIпылыз ахъаз швабыж хIизыразпI», – йгIаликIгIатI Реквава Темур.
Анйара апны АААКи «Алашари» рщтийыгIвчва рынхара анархара хъадаква гIархIватI, ужвы йдырхъйауа апроекткви апхъахьыла мурадта йрымуи йрыквчважватI.
«Адыгея Республика а-Хъада ХъвымпIыл Мурат хIирайгван а-Правительства атдзы хIаъан. ЦIыпх Адыгея йауу ауысхагIвчва КъЧР йаъан, ужвы хIара хIрызгIайтI. Анйара кIара гIанарыцIсуата йаъан: хIара хIызладгыл йауаш анархараква гIалхIкIгIатI, апхъахьыла йацхIырхъйуш апроектквагьи хIрыквчважватI», – йхIватI Гьадыгв Мурат.
Адыгея а-Хъада ХъвымпIыл Мурат АААКи «Алашари» йакIвдыршауа анхара магIын ду шаму дацIачIвагъватI, апхъахьылагьи ацынхара шшIымчIвуш дшазгылугьи йхIватI.
КIьыдата йрыквгIашIастI абызшваква ргIащаквыжьри арыпхьарала агIаджвыквцIаракви. Ауи апшта йауацIыхта йрыквчважватI КIьарашв Т.М. йыхьыз зхъу Адыгея Республика агуманитар рхъвыхраква ринститут йархъйауа апроектква. ХъвымпIыл Мурат йгIаликIгIатI АААКи «Алашара» адкIылари швапхата йдырхIахьу арыпхьагIвчвагьи абызшвала аъачIвагIагIвчвагьи ргватра азынадырхарныс шаквнагауа.
«Адыгея апынгьи цри бызшва ардыррали ахчарали кIара рчпахьата йаъапI. Кьангьаш гьазгIазгуам проект лызхуа хIуысхартаква сабапра алата йызлацынхуш анархараква шрауаш, ауагIахъа бызшваква рарыпхьарала амаль шIыцква шрызлыхуаш, чкIвыныргIа рыхъазла бызшва нархара зму алагерква адгалрала агIаджвыквцIара штшауацIнадрыхуаш. МагIын ду амапI ауи ацынхара хIуагIахъаква ргвбайара азхIара йазынхауата, абадырра шIыцква гIанарыцIсуата йчпара», – йхIватI ХъвымпIыл Мурат.
Адыгея апны ахымшкI сасра культура программагьи аланакIуан. РахIа угвы йгIатахауата йаъан Майкъвап апны «Еутых Асйа лхьапщ щтIацIарта» музей ацара. Ауи запш аъам атурых йгьи акультура байараква ъазкIкIу тып джьащахъвапI. ЙгIашвгвалахIыршвахпI цIыпх декабрь агIан Эгьзакь Мусса йцхърагIарала асуратчпагIв Еутых Асйа йылчпаз, хьапщ адынхалрала азъазара ашедеврква йрыуазакIу «Ахьапщ гIвыга» Санкт-Петербург апны АкъральыгIва Эрмитаж азкIкIраква йшрыларцIаз.
швталра йа тшаншвцIара атахъыпI.