КIвтIол кыт апны май а 1 атшын атшрыгIвраква рыгIамта гIахъыртIытI, агIапыни анхари ргвыргъьахъв йазынархата анкъвакъврагьи адыргалтI.
Анкъвакъвраква джвыкврымцIаскIва асасчви адгалагIвчви Апсны ауагIа р-Абашта айсра йаладзызи совет айсчви рчвахъабага синква хIврапшдза рзыщтIарцIатI.
Анкъвакъвраква рпрограмма йалан тшыла топасра, дартс, тшрыгIвра йгьи апсуаква йырцIасу ахъвмарра «АимцакIьачара».
АААК агвып ЧIлоуи КIвтIоли кытква ркомандаква «АимцакIьачара» йдрыхъвмартI. Анйара апны 4:0-ла айгIайра асасчва йыргатI. Ахъвмарра судья хъадата йакIвйыршатI чкIвыныргIи физкультури тшауацIдрыхрала АААК ахъвшара аунашвахъцIагIв Берзениа Валерий.
Аспорт амастер Когониа Омар йыхьыз зхъхIвалгIаз дротик аущтрала анкъвакъвра йалан Уарча, Баслахв, КIвтIол кытква йрыуаз ахгвыпкI. Апхъагылара апшвымаква ргвып «Бзана» йтнагатI, йгIвбахауа агыларта Уарча йауу «Квдры» йакIытI, йхпахауа – «Баслахв».
Аспорт амастерква айщчва Палавандзиа Алхаси Гарики рыхьызла йакIвшаз тшылатопла анкъвакъвра апны КIвтIол йауу атшчва айгIайтI, йгIвбахауа агыларта «Баслахв», йхпахауа – Уарча йауу «Квдры» йыркIытI.
Абашта айсра Ду йаладзыз айсчва йырчвахъабагаз атшква метр 1200 йгIарыгIврала анкъвакъвраква рпны зымгIва дгIарапхъыстI Кардиа Дмитрий, ауи дйыщтагIайтI Саканиа Дамей, хыгIвхауата Лагиндзиа КIандид дгIадзатI. Метр 1600 рпны анкъвакъвраква Апсны ауагIа р-Абашта айсра йаладзыз айсчва йырхъмаштылган. Ауаъа айгIайра Уазган Сандро йтигатI, йгIвбахауа агыларта Гвымба Саир йкIытI, йхпахауа – Бжьаниа Беслан.
Метр 2000 рпны апхъанысра Ачба Дауыр йыхьыз ахъхIвалгIан. Араъа зымгIва рацкIыс ласыта йтшы гIайрыгIвтI Кардиа Дмитрий, гIвыджьхауата Трапщ Оскар дгIайтI, хыгIвхауата – Лагиндзиа КIандид. АйгIайыгIвчва акубоккви амедалькви аграмотакви рырттI.
Тшыла аспорт анкъвакъвраква адыргалтI чкIвыныргIи спорти руысквала Апсны Республика АкъральыгIва комитет, Очамчыра район аунашвахъцIарта, КIвтIол кыт аунашвахъцIарти абзазагIвчви. Адуней апсуа-абаза конгресс анкъвакъвраква радгалра ахчала йацхърагIатI.
1 /17
2 /17
3 /17
4 /17
5 /17
6 /17
7 /17
8 /17
9 /17
10 /17
11 /17
12 /17
13 /17
14 /17
15 /17
16 /17
17 /17
швталра йа тшаншвцIара атахъыпI.