Апсуа «A-MAJOR» лига щардагIвы гвыпла йызсуа DOTA-2 компьютер хъвмарра йшалалыз ашвъа йанырцIатI.

Базба Селма

Апсны апны киберспорт аъазлуштI! DOTA-2 компьютер хъвмаррала йгIвбахауа «A-MAJOR» анкъвакъвра август а 5 йгIашIарышвта а 11-дза Апсны апны йакIвшуштI. Ауаса ауи гьакIвым йшIыцра хъаду!

СынчIва анкъвакъвра ауи апхъала йаъаз йгьапшызлушым, ужвы Апсны йауу агIарысабапыгIвчва «Dota 2 Tournament in the beautiful country of soul Abkhazia» квпшыра  апсуа логотип рымата йзалалуаштI. 

DOTA-2 VALVE корпорация йлырхыз, гвыпла йызсуа, щардагIвы злу компьютер хъвмаррапI. Ахъвмарра хвгIвы-хвыгIв йнадзауа гIвгвыпкI аситI, ауат йызпшIагылакву р-«Трон» шаладрыхъвашуш йащтапI. Ахъвмарра ъадзакIвшауа ахъвмарыгIвчва йырпшIагылаквугьи, агъа йчIву йа заджвгьи йылам «акрипквагьи» йрыцайситI. Заджв дущыпхьадзагьи удырракви ухьапщи йрылахIитI, ауат лшара шIыц гIауыртитI, йуысабапхуш апкъыгIваква рылаухвгIитI. Хъвмаррипхьадза жвагIвфырчва алапI. Dota шIчIвара-шIчIварата йгьшам, заманлагьи йгьашIакIым. Ахъвмарра 15 дакъикъакIла йалгагьи, сахIатпхьадзара йнайыргьи йауаштI, ауаса айхIарала сахIаткI айхIа йгьасуам.

Ахъвмарра апны согIа ду пшцIапI. Ауи апшта, асквш 2021 агIан агвыпква доллар мильуан 40 амаркIытI, киберспорт апны ауи агIарбара уахьчIвала йгьзахъымсстI.

Адуней апны рахIа щардагIвы зсуа ахъвмарра Апсуа лига шалалыз, агIарысабапыгIвчва рыхъазла ауи магIныта йаму гIахIайхIвтI чкIвыныргIа рыцынхарали спорт тшауацIнарыхрали АААК ахъвшара аунашвахъцIагIв Берзениа Валерий.

«Хысквша цIитIта Апсны акиберспорт жвлара DOTA-2 хъвмаррала анкъвакъвраква акIвнаршитI. Асквш 2024 Апсны апны ауи ахъвмарра йаднакIылыз зымгIва рыхъаз лкIгIара амапI. Йауа ухIварыквын магIны зму гIвуыскI ншатI. СынчIва Апсны Республика акиберспорт АдкIылара» (АКРА) ашвъа йаныта йгIандыршатI. Йхъадахугьи – ахъвмарра гIанзыршаз хIахIвара дырхъйан «A-MAJOR» лига хIанырцIатI. Датшата йухIвушызтын, DOTA-2 анкъвакъвра уанапшуа йгьи йангIахъутIуа «A-MAJOR» апсуа лигагьи убитI. «Ауи акIвпIта, анкъвакъвра йалу зымгIва «Dota 2 Tournament in the beautiful country of soul Abkhazia» квпшыра ахъвмарыгIвчва зтагIву ашвъа йаныпI», – йхIватI Берзениа.

Берзениа йшихIвазла, Апсны апны адунейла мчыта тшгIадырбарныс зылшуш чкIвыныргIа щардагIвыпI.

«Киберспорт ауагIа рыцIа-рыцIа йрылалитI. Абар Адуней Олимп комитетгьи (МОК) киберспортла Олимп хъвмарра адгалра йадгылтI. Апсны апны ачкIвынчва гврыхваква щардагIвыпI, адуней апны киберспорт рахIагьи тшауацIнахырквын йапшым авиртуал хъвмарыртаква рпны ауат хIкъраль йшаквнагауа апшта йгIадырбарныс, йхIаракIу анкъвакъвраква йызрылалырныс закIгьи гьазхIвам», – йхIватI ауи.

Сом зыкь 200 согIата йъапшцIу «A-MAJOR» йгIвбахауа акиберспорт анкъвакъвра 9 гвыпкI алазлуштI. 

Анкъвакъвра VOID хъвмарырта клуби Апсны акиберспорт АдкIылари йадыргалтI йгьи «А-мобаил» оператор ацхърагIарала йакIвшитI.

https://www.twitch.tv/apsuacybersport

https://www.youtube.com/@ApsuaCybersport