УагIата 200-гIв алан, 17-гIв согIа гIатыргатI, анкъвакъвра упсып унаркIуан, йыншуз уаланахIвауата йаъан – СогIвым апны дзцарала апхъанысра хынхауата аспортсменкви аспортбзибагIвчви азнакIкIытI.
Бганба Щазина
Анкъвакъвраква рпрограмма йалан 16 сквшадза йырту ацIайква рквта метр 100, 200 йгьи 500, ахIбачва рквта метр 500, 1000 йгьи 3000 рпны апхъанысраква.
Йапхъанысквуз щымта «Апра» гъбадгылырта апны адзы тштадрышвын щыбжьан надзауата MarNero маратшашIарпхарта апны йгIатыцIхтI.
АхIвссаква дрыуата метр 3000 зымгIва рапхъа дакъикъа 54-ла дгIадзцатI 17 сквша йырту аспортсменка Гилязетдинова Роксана. Ахъачва зымгIва дгIарапхъаныстI Белгород йауу Сабиров Евгений. Ауи дакъикъа 58 гIайырбатI. Метр 1000 апны йайгIайтI Кравец Александри Варнавская Елизавети. Метр 500 апны апхъагылара тыргатI Яблоков Глеби Квашак Анни.
Анкъвакъвра йалаз Апсны аспортсменкви аспортбзибагIвчви йгьырхъазымызтI, ауи йгIалалтI Россия йапшым акъалаква йгIартыцIта йгIайквазгьи. Анкъвакъвраква рпны йапшым адзцащаквала угIадзца йауан: брасс, батерфляй, хвитта дзцара, бгъала дзцара.
Триатлонла Апсны а-Федерация ахъада Барцыц Борис йшгIаликIгIазла, сквшигIадзагьи анкъвакъвра йгIалалуа ауагIа рпхьадзара рыцIа-рыцIа йалахIитI, тшауацIырхитI ауат ъауу ашIыпIаквагьи.
«Уайгвыргъьушта йаъапI йгIалалквауа рыцIа-рыцIа йъащардагIвхауа. ЙгIадзцакваз йрыуата рахIа йахIбаз сквшы 80 дыртапI. Ауи йгIадзынгылуа абанпара йагъьу швапхата дырзал йауаштI. Йапхъанысквуз ашварагIвара йачвыхIхчара ахIатырла хIкъаруква адхIкIылын – пхастакIгьи гьынхIмыршатI», – йхIватI ауи.
СынчIва анкъвакъвра уалалра ахъазла йапхъахауата ахча тира атахъын. ЙгIатнырхыз ахча шабгу «Ашана» культура-гвчIагIвчпара фонд зхъпшылуа АгIвдза Фридонна лайъазара йазыртиуаштI.
АйгIайыгIвчвагьи йапхъахауата сом 15-нзыкь, 10-нзыкь, 5-нзыкь йнадзуз ахча согIала рыхьыз рхIватI. АсогIаква радгалра йацхърагIатI чкIвыныргIи физкультури тшауацIдрыхрала АААК ахъвшара.
«Адуней апсуа-абаза конгресс» чкIвыныргIа рквта физкультура тшауацIнарыхра гватра ду азалнахитI. Ажва аламкIва, хIара хIкъраль апны спорт гIаншарата йаъу зымгIва хIдыргвыргъьитI. SwimSukhum спорт бзи йызбауа зымгIва – ныбыжьла, ъачIвагIала йалыуымхуашта – йыргвыргъьахъвпI. УагIа щарда гIазлазкIуа аспорт акIвпI ауагIа абзазаща згIвада рыцIа бзита йаквзыргвышхвауа», – лхIватI чкIвыныргIи физкультури тшауацIдрыхрала АААК ахъвшара аъачIвагIагIв Квициниа Есма.
Триатлонла Апсны а-Федерация арат анкъвакъвраква «А-Мобайл», чкIвыныргIи спорти руысквала АкъральыгIва комитет, СогIвым къала аунашвахъцIарта чкIвыныргIи спорти руысквала аунашвахъцIарта, чкIвыныргIи физкультури тшауацIдрыхрала АААК ахъвшара ацта йаднагалтI.
швталра йа тшаншвцIара атахъыпI.