Бганба Шазина

Акласс ахIбаква йцауа жвагIыгIвапхьагIвчви ауат рарыпхьагIвчви йапхъахауата Апсны амарагIайрытала йаъан. Йъацушыз дара апхьагIвчва шахIваз апшта йлырхтI: Уатап кыт апны Абраскьыл йхIатшпы, Моква акьльиса йгьи Черниговка кыт ъабжьачIву йпшдзадзу абыхъвбжьара.

АмгIва аурала амдагIвчва Апсны йгIаквчважвауа агIахIвахраква, ахабарыжвква, алокIхабарква рырхIвуан. Асасчва шIаква рахIа йджьарщуз асталактиткви асталагмиткви ракIвын.

«Апхьарта апны хIара Абраскьыл йхIатшпы аунашва ъархIвауа агIвыраква хIрыпхьалитI, ауаса зынгьи ауаъа хIгьаъамызтI. Араъа швабыж йджьащахъвапI, саргьи Апсны ахIатшпква рыцIа бзита йыздырра ахъазла спелеологта сапхьарныс сазхъвыцитI», – йхIватI амдагIвчва рыуа заджвы.

ХIызту асквш ауацIа апроект апкъ йтата амдараква рзадыргалхьатI Арасадзыхь, Мгвыдзырхва, АдзыгIвбжьа йгьи Ачандара кытква рапхьагIвчва. АшIыпIа хъвшараква рыцынхарала АААК ахъвшара аъачIвагIагIв Симониа Херсон йшихIвауала, апроект йгIвбахауа ашIчIвара акыт шIыцква гIаланакIуаштI.

«СквшигIадзагьи апроект йалахIцIарныс йахIвауа АААК ашIыпIа хъвшараква рыцIа-рыцIа йщардахитI. АпхьагIвчва райхIарагIв арат ашIыпIаква йапхъахауата йгIайитI. СынчIва апхьагIвчва 150-гIв райхIа гIаланахIыркIтI. Ужвыгьи гIвамдаракI адыгIгалра хIгвыгъапI. Ужвы Апсны амараташвартала хIцуштI», – йхIватI ауи.

Апроект амурад хъада тшгьапсахуам – Апсны йаъу турых зпщылу ашIыпIаква амдара, аджьащахъвараква тшрыхаргIвазара, асабиква ртшпсщара гIамта сабап алата йадгалра. Тванаархув аквтанай апхьарта арыпхьагIв Шамба Дмитрий йгIаликIгIатI уылаквала йубауа рыцIа лахIвара ду шгIауыланацIауа.

«Апсны апны турых-архитектура чвахъабага шщарду зъара йухIвалакIгьи – мшкIы уамдарыквын агалагьи йагъьапI. АцIайква рылаквала йырбауа рыцIа йгвныркIылитI. Са кьангьаш гьазгIазгуам ари амш ауат сквшщардала ргвы йшгIатахуш», – йхIватI Шамба.

АААК апроект «Аимадара» асквш 2019 йгIашIарышвта йакIвшитI. Ауи агIамта ауацIа ауи Апсны апхьартаква рапхьагIвчва 1000-гIвы райхIа гIаланакIтI.