Апсуа-абаза уагIахъа адкIылра, абадырраква щаквыргылра, чкIвыныргIа абарбара – АААК йахачIв хъадапI. Арат амурадква уырзынадзара ахIатырла аргваныта уабадырра атахъыпI. Ауи апш лшара раутI АГУ астуденткви «Алашара» адкIылара ацхърагIагIвчва шIакви. Ауат Адуней апсуа-абаза конгресс йаднагалыз атшыбжьара йалан.ЧкIвыныргIи физкультури тшауацIдрыхрала АААК ахъвшара аъачIвагIагIв Квициниа Есма йакIвшаз атренинг магIныта йамаз, чкIвыныргIа нбжьагIвра шгIарбжьалуа гIалхIватI.

«АААК йахачIв хъаду – апсыуати абазати адуней шабгу йыкву адкIылра акIвпI. Ауи амурад акIвпI хIара хIинтенсив ззынарху. ГIвымшкI руацIа атренинг йалакваз абадыруан, анатгьи аратгьи ргвы йтыхъуа ауысква йрылачважвун, апхъахьыла йацыта йдырхъйа йауашта йырбауа апроектквала ажванахъа гIаргуан. СгвыгъитI хIацынхара Апсни Абазашти ршIара йалата йдырхъйуш проект гIалцIуашта», – лхIватI Квициниа.

Йапхъахуз амш асеминар йалакваз йгIадрайгваз аъачIвагIагIв Инал-ипа Арда дрыцта рыштаква рпны гIаншарата ргвы ззакъвпуа, уыжвгIанчIви дуней апны ацIасква ррыдзра йапшу уызрыгвжвайуа апроблемаква, цри бызшва амагIны, ауагIа апсабара йшазаъу йрыквчважватI. Апхъахьыла рацынхара анархара хъадаква ангIалыркIгIа ажвлара проектква лырхуа йалагатI.

Агуманитар программаква р-Квта адиректорква рсовет йалу Инал-ипа Арда АААК алата йдырхъйаз аинтенсив ахъазла лгвгIанаграква хIыцагIвылшатI.

«Адуней апсуа-абаза конгресс агIаджвыквцIарала хIара гIвымшкI ажвлара проектква хIрыдынхалитI. ЧкIвыныргIа йрыздыргылыз ахачIвы рымагIальаматдзата йдырхъйитI, джьгарта тшгIадырбитI. Ауат гвалымста йъаным, йзынйауа апроблемаква рыхъазла ргвы ъацхIауа уайгвыргъьушта йаъапI. Ауыс шагъьхуш закIыла йацхърагIарныс йъазыхIазыру уаргвышхвитI», – йгIалылкIгIатI Инал-ипа.

Асеминар йгIвбахуз амш АААК ЙхIаракIу асовет йалу, АГУ адоцент Ашуба Арда апсуа-абаза уагIахъа рыбызшва, ргвбайара, ртурых шазакIу йазынархаз йлекцияла йгIалагатI.

«АзцIгIарата йгIасыртуазла гвы асттI чкIвыныргIа азаджв азаджв йахьыла йшахъуа. Ауат рыцIа щарда рдырра ртахъыпI. Абызшва, ацIасква злапшу, йагIвыргауа шгIаргвынгIвуаш йащтапI. Угвы йалахIитI ауатква зымагIальамату ашIаква уанырпшуа. Аспорт, акультура уысква, ажвлара алалраква хIрылалуата азаджв азаджв йпны рыцIа щарда хIцаларыквын ауи азыгIальаматра рыцIагьи йалахIуштI», – йхIватI Ашуба.

Аинтерактив лекция амщтахь чкIвыныргIа атшыбжьара атаджвыквырцIахтI. ЙгIвбахуз амш шабгаз ауат хгвыпкIта тшыршан рпроектква йрыдынхалуан.

Аинтенсив алгауата гвыпипхьадза рпроектква ауатыкв йгIатарцIатI.

«Алашара» адкIылара ацхърагIагIвчва шIаква йрыуазаджву Хвыжь Умар йгвып дрыцта йдрыхIазырыз апроект дгIаквчважватI.

«Спорт, абызшва тшауацIдрыхра йгьи экология йырзынархаз апроектква хIрылапштI. Ауат ауагIа ажвлара бзазара джьгарта йгIалазыжьуаш проект джьащахъвапI. Сара Абаза уагIа рыбызшва, рцIасква, ргвбайара гIащаквыжьра йазынарху апроект алыхра салан. ХIгвып ачкIвынчвагьи саргьи ауи анархара рыцIа йгIалхтI, йауа ухIварыквын Абазашта апынгьи, Апсны апынгьи ашIаква глобализация йаланахIвитIта руагIахъара йачвыхъарахитI», – йгIаликIгIатI ауи.

Хвыжь Умар атренинг чкIвыныргIа араргвануата йшаъу дацIачIвагъватI йгьи ауи адызгалыз йразыра ажваква рзынайырхатI.

«Арат агIвымшкI руацIа араъа щардагIвы агIвзачвахатI. Ауат азазаъаща пхаква щарда йхIызнагуашшва йызбитI, атренинг апны гвышхварата йгIахIырбаз апроектква хIанрыдынхалуагьи йгIахIырбушта сгвыгъитI», – йгIацицIатI ауи.

Анхара йангIалшвтра чкIвыныргIа культурала рдырраква йрылазырхIуш тшпсщарагьи рзадыргалуан. Ауи апшта ауат кIьыдата Апсны ахчаква рмузей йдырцатI. АшIаква атурых йапшымыз агIамтаква рагIан Апсны апны йгIацIырщтуаз ахчата йныкъвуз рархIвтI. Йызтахъыз йара-йара йазалху аджыпхала ахча гIатирышвттI. АААК ахьызла сасыпхьадза апсуа уагIахъа рахча апсар согIата йырттI.

ГIвымшкI руацIа аргваныта айчважвара, ацынхара чкIвыныргIа лахIвара щарда рызгIанырыжьтI.

«Алашара» адкIылара апны чкIвыныргIа рызхIарала ахъвшара унашва ахъызцIауа Джьмакъвыл Стелла а-Конгресс агвып атшыбжьара ъадыргалыз ахъаз дшырзыразу лхIватI.

«ЙгIалскIгIара стахъыпI атренинг угвы ахвгIауата йшадыргалыз. АшIаква рыцIа бзита йабадыртI, йайщчву ауагIахъаква злапшу, йызлапшым гIаргвынгIвытI. Ари анйара сабапра злазлуш нхара ду ащтагIайуашта хIгвыгъитI. Аразыра ажваква расхIвра стахъыпI АААК анхагIвчва, йалкIгIата Квициниа Есма – швабыж пхата хIдрайгватI, атшыбжьара бзита йадыргалтI, апрограмма джьащахъван, атшпсщара сахIатквагьи гальаматын. ХIычкIвынчва зымгIвалагьи йразыпI. Араъа йгIахIхъвыцыз зымгIва хIырхъйарныс хIазыгвжважвауата хIцахитI», – лхIватI ауи.

Анйара шакIвшаз йазыразта йгIанхатI адгалагIвчвагьи. АААК апны ОСАЗ хъвшара аъачIвагIагIв Хьышба Науыр апроект апхъахьыла тшауацIнахуашта дгвыгъитI.

«Анчва дырзыразхатI атшыбжьара зпны йакIвхIыршаз чкIвыныргIи спорти руысквала СогIвым къала аунашвахъцIарта. КIьыдата ажва пха лзысхIвара стахъыпI здырраква чкIвыныргIа йрыцагIвызшаз Инал-ипа Арда», – йхIватI Хьышба.

Ауи йшихIвазла, анйара аргIапсща ангIалырхуаз йгьымгIващатI.

«ХIара чкIвыныргIа спортла йанкъвакъвуа йа сасра азаджв азаджв йпны йцауа йахъазымкIва ажвлара проблемаква алдыргауатагьи тшадыркIылра хIтахъыпI», – йхIватI ауи.

Анхара йангIалшвтра чкIвыныргIа культурала рдырраква йрылазырхIуш тшпсщарагьи рзадыргалуан. Ауи апшта ауат кIьыдата Апсны ахчаква рмузей йдырцатI.

АшIаква атурых йапшымыз агIамтаква рагIан Апсны апны йгIацIырщтуаз ахчата йныкъвуз рархIвтI. Йызтахъыз йара-йара йазалху аджыпхала ахча гIатирышвттI. АААК ахьызла сасыпхьадза апсуа уагIахъа рахча апсар согIата йырттI.

Адуней апсуа-абаза конгресс ари ашвапха гIанарысабапта Апсны йауу чкIвыныргIа адуней шабгу апсуа-абаза диаспораква рыцIа йауацIыхта йрабанардыруаштI.